استانا قالاسى قوعامدىق كەڭەسىنىڭ وتىرىسىندا مۇقتاج ازاماتتارعا الەۋمەتتىك كومەك جانە ەلوردانىڭ جاڭا التىنشى اۋدانىنا اتاۋ بەرۋ ماسەلەلەرى قارالدى.
بىلتىر كۇزدە ەلوردا ءماسليحاتىنىڭ شەشىمەن بەكىتىلگەن «استانا قالاسىندا الەۋمەتتىك كومەك كورسەتۋدىڭ, ونىڭ مولشەرىن بەلگىلەۋدىڭ جانە مۇقتاج ازاماتتاردىڭ جەكەلەگەن ساناتتارىن ايقىنداۋ ەرەجەسىنە» وزگەرىستەر مەن تولىقتىرۋلار ەنگىزىلدى. ءتيىستى وزگەرىستەرمەن جۇمىسپەن قامتۋ جانە الەۋمەتتىك قورعاۋ باسقارماسىنىڭ باسشىسى يليا سكۋب تانىستىردى.
ونىڭ ايتۋىنشا, اتالمىش قۇجاتقا سايكەس اسىراۋشىسىنان ايىرىلۋىنا بايلانىستى جاردەماقى الاتىندارعا كوممۋنالدىق تولەمدەر تولەنەدى. الايدا بۇل تولەمدەردى بەرۋ ءتارتىبى, قاجەت قۇجاتتار ءتىزىمى ناقتىلانباعان ەدى. قالالىق تۇرعىن ءۇي جانە تۇرعىن ءۇي ينسپەكتسياسى دا جالدامالى پاتەرگە 50 پايىز مولشەرىندە سۋبسيديا بەرگەندە كوممۋنالدىق تولەمدەردى وتەيدى.
– بۇل جاعداي ەكى جاقتى قارجىلاندىرۋدى تۋدىرىپ وتىر. سوندىقتان ءتيىستى ەرەجەگە سۋبسيديا الاتىندار كوممۋنالدىق تولەمدەرگە كومەكتى جۇمىسپەن قامتۋ جانە الەۋمەتتىك قورعاۋ باسقارماسىنان الماسىن دەگەن وزگەرىس ەنگىزىپ وتىرمىز, – دەدى يليا سكۋب.
باسقارما باسشىسى زەينەتكەرلەرگە, مۇمكىندىگى شەكتەۋلى جاندارعا جانە ەرەكشە قاجەتتىلىگى بار بالالارعا ارنالعان قاتاركولدەگى بەيىمدەۋ ورتالىعىنداعى باعا وزگەرگەنىن ايتتى. ءبارىنىڭ قىمباتتاۋىنا بايلانىستى ءتيىستى ورتالىق ۇسىناتىن قىزمەتتىڭ باعاسى ءوستى. سوندىقتان مەملەكەتتەن بۇعان بەرىلەتىن كومەك ارتىپ وتىر. ماسەلەن, بۇرىن زەينەتكەر ەم الۋ قارجىسىنىڭ 25 پايىزىن تولەسە, مەملەكەت 75 پايىزىن وتەپ بەرەتىن. ەندى مەملەكەت تاراپىنان 80 پايىز كومەك بەرىلسە, زەينەتكەر 20 پايىزىن تولەيدى. قوعامدىق كەڭەس مۇشەلەرى بۇل شەشىمدى ءبىراۋىزدان قولدادى.
ەلوردانىڭ جاڭا اۋدانىنا اتاۋ بەرۋگە قاتىستى قالالىق ونوماستيكا كوميسسياسىنىڭ شەشىمىمەن تىلدەردى دامىتۋ جانە ارحيۆ ءىسى باسقارماسىنىڭ باسشىسى ساكەن ەسىركەپ تانىستىردى. ونىڭ مالىمدەۋىنشە, ءتيىستى كوميسسيا, تۇران, ساۋران, جەرۇيىق, سارايشىق اتاۋلارىنان سوڭعىسىن تاڭدادى. بايانداماشى بۇل اتاۋدىڭ تاريحي مانىنە, ءمان-ماڭىزىنا توقتالدى. سارايشىقتا عىلىمنىڭ دا نەگىزى قالانعانىن ايتتى. ماسەلەن, كۇننىڭ جەردىڭ اينالاتىنىن كوپەرنيكتەن بىرنەشە عاسىر بۇرىن سارايشىقتا تۇرعان سايف ساراي دالەلدەپ كەتكەنىن جەتكىزدى. بۇل شەشىم دە قوعامدىق كەڭەس تاراپىنان قولداۋ تاۋىپ, كەڭەس توراعاسى زۋلفۋحار عايىپوۆ تاريحي شەشىم قابىلداپ وتىرعاندارىن ەرەكشە اتاپ ءوتتى.
