استانا اكىمدىگى لوندون, بەرلين, ماسكەۋ جانە سەۋل سياقتى الەمدىك مەگاپوليستەردىڭ تاجىريبەسى مەن ۇلگىلەرىنە سۇيەنە وتىرىپ, باس قالانىڭ جاڭا «ديزاين-كودىنىڭ» جوباسىن ازىرلەۋدە.
ەلوردا اكىمدىگىنىڭ مالىمدەۋىنشە, 2023 جىلعى 31 قازاندا ءماسليحات شەشىمىمەن قالانىڭ بۇرىنعى «ديزاين-كودىن» كوزدەيتىن قالا قۇرىلىسىنىڭ رەگلامەنتى كۇشىن جويدى.
قازىرگى كەزدە ورتالىق ۋاكىلەتتى ورگان ساۋلەت, قالا قۇرىلىسى جانە قۇرىلىس ماسەلەلەرى بويىنشا قر كەيبىر زاڭنامالىق اكتىلەرىنە, ونىڭ ىشىندە قالانىڭ ستيليستيكالىق بىرىڭعاي كەلبەتىن, جايلى جانە قاۋىپسىز قالالىق ورتانى قالىپتاستىرۋدى قامتاماسىز ەتەتىن قر قۇرىلىس كودەكسىنە وزگەرىستەر مەن تولىقتىرۋلار ەنگىزۋ بويىنشا جۇمىس جۇرگىزۋدە. بۇل وزگەرىستەر اباتتاندىرۋ ەلەمەنتتەرىن, اقپاراتتىق قۇرىلىمداردى (ماڭدايشالار, قالالىق ناۆيگاتسيا), جارنامالىق قۇرىلىمداردى, ستاتسيونارلىق ەمەس وبەكتىلەردى (ماۋسىمدىق كافەلەر, دۇڭگىرشەكتەر) كوگالداندىرۋدى, جارىقتاندىرۋدى, قاسبەتتەردى, قورشاۋلاردى ورنالاستىرۋعا اسەر ەتەدى.
«ديزاين-كود» جوباسىن كوپشىلىك تالقىلاۋ ءۇشىن «اشىق نقا» ينتەرنەت-پورتالىندا ورنالاستىرىلاتىن بولادى
زاڭنامالىق اكتىلەرمەن جۇمىس اياقتالعاننان كەيىن «ديزاين-كود» جوباسىن كوپشىلىك تالقىلاۋ ءۇشىن «اشىق نقا» ينتەرنەت-پورتالىندا ورنالاستىرىلاتىن بولادى. ەسكيزدەر بيۋدجەت بولىنگەننەن كەيىن دايىندالا باستايدى.
– استانا ءوزىنىڭ ساۋلەتتىك كەلبەتىن ۇنەمى دامىتۋعا جانە جەتىلدىرۋگە ۇمتىلادى. قازىرگى ۋاقىتتا قالا ينفراقۇرىلىمدى جاقسارتۋ, جايلى قالالىق ورتانى قۇرۋ جانە ەكولوگيالىق تۇراقتى اۋدانداردى دامىتۋ بويىنشا جوبالاردى بەلسەندى تۇردە جۇزەگە اسىرۋدا, – دەپ حابارلادى اكىمدىك قازاقپارات ءتىلشىسىنىڭ سۇراۋىنا جاۋاپ رەتىندە.
ۆەدومستۆو استانانىڭ جاڭا ساۋلەتتىك كەلبەتى الەمدىك وزىق تاجىريبەلەر مەن قالالىق اباتتاندىرۋداعى يننوۆاتسيالاردى ەسكەرە وتىرىپ قالىپتاساتىنىن اتاپ ءوتتى.
– قالا تۇراقتى جانە ىڭعايلى قالالىق ءومىر سالتىن ناسيحاتتايتىن وزىق تەحنولوگيالاردى, ينفراقۇرىلىمدى جانە ديزايندى ەنگىزۋ ءۇشىن لوندون, بەرلين, ماسكەۋ جانە سەۋل سياقتى مەگاپوليستەردى قوسا العاندا, ءارتۇرلى الەمدىك قالالاردىڭ سان الۋان ۇلگىلەرى مەن تاجىريبەلەرىنە جۇگىنەدى. استانا بۇل قالالاردىڭ كوگالداندىرۋ, كەدەرگىسىز جانە ينكليۋزيۆتى ورتا قۇرۋ, سونداي-اق دەكوراتيۆتى جارىقتاندىرۋ جانە ستاندارتتالعان شاعىن ساۋلەت نىساندارى مەن كوشە جيھازدارىن قولدانۋ ارقىلى بىرىڭعاي كورىنىس جاساۋ ماسەلەلەرىندەگى تاجىريبەسىنە جۇگىنەدى, – دەلىنگەن حابارلامادا.
الايدا قالادا جاڭا قىزىقتى ينفراقۇرىلىمدىق نىساندار سالۋ جوسپارلارى ءالى جوق. بۇگىندە الەۋمەتتىك نىسانداردىڭ, دەنە شىنىقتىرۋ-ساۋىقتىرۋ كەشەندەرىنىڭ, قوعامدىق كەڭىستىكتەردىڭ قۇرىلىسىنا ەرەكشە كوڭىل ءبولىنۋ دەدى.
– استانادا سوڭعى جىلدارى ارحيتەكتۋراسى بويىنشا كوپتەگەن بىرەگەي جانە مانەرلى نىساندار تۇرعىزىلدى. بۇل – كوپقاباتتى تۇرعىن ءۇي كەشەندەرى جانە قوعامدىق عيماراتتار انسامبلدەرى. ءوز كەزەگىندە, ءاربىر نىسان بىرەگەي, ارينە, الەمدە تەڭدەسى جوق بىرەگەي عيماراتتار مەن قۇرىلىستاردىڭ قۇرىلىسى دا ماڭىزدى, ويتكەنى ول ەلوردانىڭ يميدجىنە, ونىڭ داڭقى مەن بەدەلىنە جۇمىس ىستەيدى. الايدا قالا ادامدار ءۇشىن جوبالانۋى جانە سالىنۋى ءتيىس ەكەنىن ۇمىتپاعان ءجون, – دەدى اكىمدىكتە.
سونداي-اق ۆەدومستۆو استانانىڭ ساۋلەتتىك كەلبەتى قالانى ساۋلەت جاعىنان بىرەگەي عىلىمي, مادەني, ءبىلىم بەرۋ جانە ساياسي كەڭىستىكتىڭ ەڭ ادەمى, جايلى, ورتالىقتارىنىڭ بىرىنە اينالدىرۋعا باعىتتالعان باعدارلامالار اياسىندا قالىپتاسىپ كەلە جاتقانىن اتاپ ءوتتى.
