استانادا «JOLTAP» الەۋمەتتىك جوباسى جۇزەگە اسىپ جاتىر. جوبا ەلوردالىقتاردىڭ نارىققا قاجەتتى ماماندىقتاردى مەڭگەرىپ, جۇمىسقا ورنالاسۋىنا مۇمكىندىك تۋدىرىپ وتىر.
وتكەن جىلدىڭ قىركۇيەك ايىنان باستاپ ىسكە قوسىلعان «JOLTAP» الەۋمەتتىك جوباسى كۇنى بۇگىنگە دەيىن ناتيجەلى جالعاسۋدا. سونىڭ ارقاسىندا استانالىقتار قىسقا مەرزىمدى باعدارلامالار ارقىلى بەلگىلى ءبىر كاسىپ تۇرىنە تەگىن وقۋعا مۇمكىندىك الدى. ەلوردا اكىمدىگىنىڭ باستاماسىمەن قولعا الىنعان جوبا اياسىندا مەملەكەتتىك قولداۋ شارالارى, اتاۋلى الەۋمەتتىك كومەك, بيزنەس اشۋعا قۇجاتتاردى رەسىمدەۋ جانە جۇمىس تابۋ ءۇشىن كەڭەس بەرىلەدى.
«JOLTAP» جوباسى اياسىندا قالا تۇرعىندارى ەكى قىسقا مەرزىمدى باعدارلاما بويىنشا تەگىن ءبىلىم الا الادى. ءبىرىنشى باعدارلاما ناۋبايشى, باريستا, ساتۋشى-كاسسير, قوعامدىق تاماقتاندىرۋدىڭ امبەباپ قىزمەتكەرى, تىگىنشى سياقتى 5 جۇمىسشى ماماندىعىن وقىتۋعا ارنالعان. ەكىنشى باعدارلاما – «Freelance مۇمكىندىك» دەپ اتالادى, بۇل 7 تسيفرلىق داعدىلاردى وقىتۋدى ۇسىنادى. ولار: تارگەتولوگ, SMM, ۆيدەوگراف, ماركەتپلەيس مەنەدجەرى, موبيلوگراف, گرافيكالىق ديزاينەر جانە ۆەب-ديزاينەر.
قالالىق اكىمدىكتىڭ باستاماسىمەن جانە «جاڭا مۇمكىندىك» قوعامدىق قورىنىڭ قاتىسۋىمەن جۇزەگە اسىرىلىپ جاتقان اۋقىمدى جوبانىڭ اياسىندا ەلوردانىڭ 18 بەن 50 جاس ارالىعىنداعى كەز كەلگەن تۇرعىنى تسيفرلىق جانە جۇمىسشى ماماندىقتارى بويىنشا قىسقا مەرزىمدى وقىتۋدان تەگىن ءوتىپ, سەرتيفيكات الادى. بۇگىندە جوبا اياسىندا 2 مىڭنان استام ەلوردالىق ءتۇرلى ماماندىقتار بويىنشا وقىتۋ كۋرستارىنان وتكەن.
وسى ۋاقىتقا دەيىن جوباعا قاتىسۋشىلاردىڭ ءبىر بولىگى تەحنيكالىق ماماندىقتاردى يگەرسە, ەندى ءبىر بولىگى تسيفرلىق سالانىڭ ءتىلىن مەڭگەردى. سولاردىڭ بىرنەشەۋى تومەندە پىكىر ءبىلدىردى.
ابىلبەك سادىقوۆ, 30 جاستا:
– استاناعا كوشىپ كەلگەن سوڭ, ءبىراز ۋاقىت قۇرىلىستا جۇمىس ىستەدىم. الايدا كەيىن كومپانيادا قىسقارتۋ بولىپ, سوڭعى كەلگەندەرمەن بىرگە جۇمىسسىز قالدىم. سودان ءبىر كۇنى كوشەدە كەتىپ بارا جاتىپ وسى جوبا تۋرالى جارنامانى كوزىم شالدى. سودان قالاداعى «بارشاعا مۇمكىندىك» مودۋلدىك پۋنكتىنىڭ بىرىنە بارىپ, دانەكەرلەۋشى سالاسى بويىنشا تەگىن وقىتۋ كۋرسىنا جازىلدىم. بۇل قاڭتار ايىنىڭ ورتاسى بولاتىن, ال وقىتۋ اقپان ايىنىڭ باس كەزىندە باستالدى. كۇن سايىن ساباققا قاتىسىپ, ءبىر ايدىڭ ىشىندە جاڭا ماماندىقتى مەڭگەرىپ شىقتىم. كۋرس بارىسىندا كوپتەگەن سۇراققا جاۋاپ الىپ, ءبىرشاما جاڭا نارسەنى ۇيرەندىم.
مەن ءدارىس العان توپتا ادام كوپ بولمادى, دەگەنمەن ساباقتار وتە قىزىقتى جانە مازمۇندى ءوتتى. قازىرگى كەزدە قالاداعى زاۋىتتاردىڭ بىرىندە دانەكەرلەۋشى بولىپ جۇمىس ىستەپ ءجۇرمىن. بۇل جوبانىڭ كوپكە تيگىزەر پايداسى مول. سەبەبى «JolTap» ارقىلى ءار ادام ءوزى ءۇشىن جاڭا ماماندىقتى يگەرە الادى جانە بىلىكتىلىگىن ارتتىرادى. باستىسى بۇل جوبا – جۇمىس ىستەيمىن دەگەن ءار ادامعا جاقسى مۇمكىندىك.
ەلەونورا ناحيپوۆا, 50 جاستا:
– بۇعان دەيىن دۇكەندە ساتۋشى بولىپ جۇمىس ىستەدىم. جاڭا جوبا تۋرالى كەزدەيسوق ءبىلدىم. «JOLTAP» مۇمكىندىكتەرى تۋرالى مەن باعدارلاما پاۆيلونىنىڭ جانىنان ءوتىپ بارا جاتقاندا ءبىلدىم. ءوزىم قوسىمشا جۇمىس ىزدەپ جۇرگەن ەدىم. سودان نە بولسا دا, كىرىپ سويلەسىپ, ءمان-جايدى بىلەيىن دەپ شەشىم قابىلدادىم. كەڭەسشى ماعان باعىتتار مەن شارتتار تۋرالى ايتىپ بەردى. وسىلايشا, مەن وقۋعا جازىلدىم. ول كەزدە مەن دۇكەندە ساتۋشى بولىپ جۇمىس ىستەپ جۇرگەن ەدىم جانە جاڭا داعدىعا يە بولعىم كەلدى. ءسويتىپ بۇل جەردە كاسسامەن جۇمىس ىستەۋدى ۇيرەنۋدى كوزدەپ, كاسسير-ساتۋشى ماماندىعىن تاڭدادىم.
جالپى, «JOLTAP»-تا وقۋ ماعان ۇنادى. كۋرستاردا ءوز سالاسىنىڭ ماماندارى ساباق بەردى, ءبارى وڭاي جانە تۇسىنىكتى بولدى. ءبىز جاڭا ءبىلىم مەن داعدىلاردى تەز مەڭگەردىك. كۋرستى اياقتاعان كەزدە مەن جۇمىس ىستەگەن دۇكەنگە كاسسا ورناتىلعان ەدى. قازىر مەن كاسسادا ساتۋشى كاسسير بولىپ جۇمىس ىستەيمىن. اكىمدىككە جانە وسى جوبانى ەنگىزگەندەردىڭ بارلىعىنا العىسىم شەكسىز.
مارجان باۋىرجان, 35 جاستا:
– بۇگىندە جولداسىم ەكەۋمىز 4 بالانى تاربيەلەپ وتىرمىز. ءوزىم ون جىلدان بەرى بالا كۇتىمىنە بايلانىستى دەكرەتتىك دەمالىستامىن. بالا-شاعاما, وتباسىما ءوزىم كيىم-كەشەك تىككىم كەلەتىن. ءبىر كۇنى الەۋمەتتىك جەلىدەن وسى جوبا تۋرالى حابارلاندىرۋدى كورىپ قالدىم. سودان دەرەۋ قالاداعى پۋنكتتەردىڭ بىرىنە بارىپ, تىگىنشى كۋرسىنا جازىلدىم. ارادا كوپ ۋاقىت وتپەي كۋرستى باستاپ كەتتىم. ءسويتىپ, ءبىر ايدىڭ ىشىندە تىگىنشىلىكتى تولىق مەڭگەرىپ شىقتىم.
كۋرس ءبىر اي بويى كۇندەلىكتى بولدى. كىرىسپە ساباقتا تىگىن تىگۋدىڭ نەگىزىن جانە تۇرلەرىن ۇيرەندىك. ودان ءارى كيىمدى ءپىشۋ مەن تىگۋدى كورسەتتى. وقىتۋ پروتسەسى وتە قىزىقتى ءوتتى. وقىتۋشىلار بارلىعىن قاراپايىم تىلمەن ءتۇسىندىرىپ بەردى. كەيىن العان ءبىلىمدى ءىس جۇزىندە كورسەتىپ, ۇيرەتتى. كۋرستى اياقتاعان سوڭ سەرتيفيكات الدىم.
ءار ادام از ۋاقىتتا تەگىن ماماندىق يگەرە الادى. مەنىڭ ويىمشا, تىگىن تىگۋدى ءار كەلىنشەك بىلگەنى ابزال. وسى جوبانىڭ ارقاسىندا جاڭا ورتا, جاڭا تانىستار تاپتىم.
جومارت جولامانوۆ, 38 جاستا:
– بۇعان دەيىن مەن ەكسپەديتور-جۇرگىزۋشى بولىپ جۇمىس ىستەدىم. «JOLTAP» باعدارلاماسى تۋرالى تانىسىمنان ەستىپ, باردىم. مەنى جوبانىڭ شارتتارى قىزىقتىردى, ەكى باعىت بويىنشا وقۋعا ءوتىنىش قالدىردىم. الدىمەن ەلەكترمەن دانەكەرلەۋشى جانە موبيلوگراف بولعىم كەلدى. دانەكەرلەۋ بويىنشا وقىتۋ ەرتەرەك باستالدى, مەن وقۋعا تولىعىمەن قاتىستىم, سوندىقتان ەكىنشى باعىتتان باس تارتۋعا ءماجبۇر بولدىم.
قازاقستاندا كاسىبي دانەكەرلەۋشىلەرگە قاجەتتىلىك بار ەكەنىن بىلەتىنمىن. بىرەۋ ءۇشىن بۇل ماماندىق قيىن بولۋى مۇمكىن. مۇندا مۇقيات بولۋ جانە زەيىن قاجەت. كەيبىر جەرلەردە بۇل قاۋىپتى. بىراق مەن پايدالى ماماندىق تاپقىم كەلدى. الدىمەن نارىقتى زەرتتەپ, كاسىبي دانەكەرلەۋشىلەردىڭ شىنىمەن دە وتە لايىقتى جالاقىسى بار ەكەنىن, ولاردىڭ ەڭبەگى قوعام ءۇشىن كوپ پايدا اكەلەتىنىن بىلگەن سوڭ وسى سالا بويىنشا وقۋعا كىرىستىم.
ساباقتار جوعارى دەڭگەيدە ءوتتى. ءبىرىنشى كۇننەن باستاپ ءبارى جاقسى ۇيىمداستىرىلدى. وقۋدان كەيىن بىردەن جۇمىس تاپتىم. ولاردىڭ اعىمىندا سىناق جۇرگىزىلىپ, دانەكەرلەنگەن تۇستاردىڭ ساپاسىن كورسەتۋ قاجەت بولدى. تاپسىرمانى ويداعىداي ورىنداپ, قازىرگى تاڭدا YDA تۇرىك كوپسالالى زاۋىتىندا جۇمىس ىستەپ ءجۇرمىن. وقۋ جانە جۇمىسقا ورنالاسۋ پروتسەسى شامامەن ءبىر ايعا سوزىلدى. بۇگىندە بارلىق دوستارىم مەن تانىستارىمدى وسى تەگىن باعدارلاماعا قاتىسىپ, جاڭا كاسىپ ۇيرەنۋگە شاقىرامىن.
ءيا, «JOLTAP» جوباسى ارقىلى كەز كەلگەن ماماندىقتى ءبىر ايدا مەڭگەرىپ شىعۋعا بولادى. ەلوردالىقتار وسى جوباعا قاتىسىپ, موبيلوگراف, SMM, تارگەت سەكىلدى ترەندتەگى ماماندىقتاردى ۇيرەنىپ ءجۇر. ءارى وسى باعىت بويىنشا جۇمىسقا ورنالاسىپ جاتىر. قىسقا مەرزىمدى وقىتۋعا جازىلۋ قالاداعى «بارشاعا مۇمكىندىك» مودۋلدىك پۋنكتتەرىندە وتەدى.
ەلوردادا «بارشاعا مۇمكىندىك» مودۋلدىك پۋنكتتەرى كەلەسى مەكەنجايلاردا ورنالاسقان:
* جاستار سارايى, رەسپۋبليكا داڭعىلى, 34;
* «Ailand» ودو, قورعالجىن تاسجولى, 2;
* «ۆسترەچا» ءسۇ ابىلاي حان داڭعىلى, 31;
* «ازيا پارك» سوو, قابانباي باتىر داڭعىلى, 21;
* «تۇلپار» سو, ش.ءۋاليحانوۆ كوشەسى, 24;
* «Euromall» ءسۇ, قوسشىعۇلۇلى كوشەسى, 23;
* «Mechta» ءسۇ, سىعاناق كوشەسى, 3;
* «راحمەت» ءسۇ, تىلەنديەۆ داڭعىلى, 15;
* «ەمو, بەيبىتشىلىك كوشەسى, 9;
* «راحمەت» ءسۇ, مومىشۇلى داڭعىلى, 10;
* «جانۇيا», بەيبىتشىلىك كوشەسى, 14.
استانا تۇرعىندارى وسى مەكەنجايلاردا ورنالاسقان «بارشاعا مۇمكىندىك» مودۋلدىك پۋنكتتەرىندە ۇسىنىلاتىن بارلىق مۇمكىندىكتى پايدالانۋ ارقىلى تەگىن وقىپ, جاڭا كاسىپتى مەڭگەرە الادى.
