استانادا وقۋشىلار اراسىندا روبوتوتەحنيكادان Central Asia FIRST حالىقارالىق چەمپيوناتى باستالدى. اتالعان باسەكەدە قازاقستاننان جانە كورشى ەلدەردەن قاتىسۋشىلار وزدەرىنىڭ يننوۆاتسيالىق جوبالارىن ۇسىنادى. 23-25 اقپان كۇندەرى ءال-فارابي اتىنداعى وقۋشىلار سارايىندا ءوتىپ جاتقان سايىستا بيىل الەمنىڭ 5 ەلىنەن 3000-نان اسا قاتىسۋشى باق سىنايدى.
ولاردىڭ قاتارىندا گونكونگ, بىرىككەن اراب امىرلىكتەرى, قىرعىزستان جانە وزبەكستاننىڭ مىقتى روبوتوتەحنيكتەرى بار. ال قازاقستاننىڭ نامىسىن ىرىكتەۋ چەمپيوناتتارى بارىسىندا جولداما ۇتىپ العان 200-دەن استام كوماندا قورعايدى. ونىڭ ىشىندە استانا قالاسىنان 37 كوماندا قاتىستى.
ءداستۇرلى تۇردە وتەتىن جارىسقا استانا قالاسىنىڭ ءبىلىم باسقارماسى, «دارىن» رەسپۋبليكالىق عىلىمي-پراكتيكالىق ورتالىعى جانە «USTEM Foundation» قوعامدىق قورى ۇيىتقى بولدى. ۇيىمداستىرۋشىلاردىڭ دەرەگىنە سايكەس, مەكتەپ وقۋشىلارى 6-10, 10-16 جانە 12-18 – ءۇش نەگىزگى جاس ساناتى بويىنشا باعى مەن بابىن سىنايدى. چەمپيوناتتا, قۇلتەمىرلەر ويىنىنان باسقا, يننوۆاتسيالىق جوبالار بايقاۋى مەن تورەشىلەر سەسسيالارى قامتىلادى.
USTEM Robotics قورىنىڭ باسشىسى اسىلبەك مۋرزاحمەتوۆتىڭ سوزىنشە, چەمپيونات دارىندى جاستاردى انىقتاپ قانا قويماي, روبوتوتەحنيكانى دامىتىپ, روبوت جاساۋدىڭ حالىقارالىق ستاندارتتارىنا جاقىنداتۋعا مۇمكىندىك بەرەدى.
«بيىلعى ماۋسىم تاقىرىبى – كرەاتيۆتى يندۋستريا. كوماندالارعا ينجەنەرلىك قابىلەتىن ۇشتاستىرا وتىرىپ, وسى سالاداعى ماسەلەلەردى شەشۋگە باعىتتالعان جوبالار ۇسىنۋ تالاپ ەتىلدى. چەمپيوناتقا قاتىسىپ جاتقان توپتىڭ ءبىرى كينووپەراتورلارعا ارنالعان ەكزوسكەلەت جاساسا, ەندى ءبىرى سۋرەتشىلەرگە ارنالعان كومەكشى قۇرالدارىن ازىرلەگەن. جارىس ماقساتى تەك جاڭا جوبالاردى جاساۋ عانا ەمەس, سونداي-اق قوعامداعى وزەكتى ماسەلەلەردى انىقتاي الاتىن تولىققاندى ءبىلىمدى وقۋشىلار قاتارىن تاربيەلەۋ كوزدەلگەن. قورىتىندى بويىنشا دا قوعامعا ەڭ پايدالى جوبا ۇسىنعان توپ جەڭىمپاز اتانادى» دەدى سپيكەر.
«حالىقارالىق دەڭگەيدەگى روبوتوتەحنيكا چەمپيوناتىنىڭ ءداستۇرلى تۇردە ەلوردادا ءوتىپ جاتقانى قۋانتادى. قازاقستاندا ينجەنەريا جانە روبوتوتەحنيكا سالالارىن دامىتۋدى ماقسات ەتكەن جوبالار جەمىسىن بەرەدى دەگەن سەنىمدەمىن. بۇل بالالاردىڭ بارلىعى – جاڭا تەحنولوگيالاردى دامىتىپ, ەلدىڭ دامۋىنا ۇلەس قوساتىن بولاشاق IT ماماندار, ينجەنەرلەر مەن عالىمدار. تەحنيكالىق ءبىلىمدى الۋعا ۇمتىلاتىن جاستار قازاقستاننىڭ وركەندەۋىنە ىقپال ەتەتىنى ءسوزسىز. ينجەنەرلىك كوزقاراس بارلىق جەردە بولۋى كەرەك, ونىڭ ارقاسىندا يننوۆاتسيالىق ونىمدەر پايدا بولادى» دەدى «دارىن» رەسپۋبليكالىق-عىلىمي پراكتيكالىق ورتالىعىنىڭ باسشىسى عاجدەنبەك تۇرسىنوۆ.
ءدۇبىرلى دوداعا استانا قالاسىنىڭ «Astrobot» روبوتوتەحنيكا مەكتەبىنىڭ ەكى كومانداسى قاتىسىپ, 6-10 جاس ساناتى بويىنشا ءوز جوبالارىن تانىستىردى. ولاردىڭ قاتارىندا ينجەنەر-كونسترۋكتور توبىنىڭ قاتىسۋشىسى, 7 جاسار ءاليمانسۇر سەرىك بار.
«دوستارىممەن بىرگە سايىسقا دايىنداعان جوبامىزدى اكەلدىك. كوماندادا ءتورت ادامبىز. دوستارىم باعدارلامالاۋمەن اينالىسادى, ال مەن قۇراستىرامىن. ءبىز روبوت-شاڭسورعىش جاسادىق. سەبەبى قازىر ادامداردىڭ قورشاعان ورتانى لاستاپ, قوقىس تاستايتىنى ماسەلەگە اينالدى. وسىنى شەشۋگە ارنالعان جوبامىزبەن ءبىز ماقتانامىز. ءوز باسىم روبوتوتەحنيكادان وتەتىن جارىستاردان قالماۋعا تىرىسامىن» دەدى جاس ونەرتاپقىش.
چەمپيونات جىل سايىن ءارتۇرلى تاقىرىپتا وتەدى. ونەر تاقىرىبى اياسىندا وتەتىن سايىس ناتيجەسى بويىنشا جەڭىمپازدارعا حالىقارالىق جارىستارعا قاتىسۋعا جولداما جانە قازاقستاندىق ءارى شەتەلدىك جوعارى وقۋ ورنى گرانتىن الۋعا مۇمكىندىك بەرىلەدى.
