قارۋلى كۇشتەردىڭ ەلوردالىق اسكەري ءبولىمنىڭ جاس ساربازدارى انت بەردى, دەپ حابارلايدى astana-akshamy.kz
68665 اسكەري بولىمىنە بيىلعى كوكتەمدە شاقىرىلعان جاس جاۋىنگەرلەردىڭ اسكەري انت قابىلداۋ ءراسىمى «وتان قورعاۋشىلار» الاڭىندا ءوتتى.
ءىس-شاراعا قۇرلىق اسكەرلەرى باس قولباسشىسى باسقارماسىنىڭ وكىلدەرى, 68665 اسكەري ءبولىمىنىڭ وفيتسەرلەرى, قارۋلى كۇشتەردىڭ ارداگەرلەرى, ساربازداردىڭ تۋىستارى مەن جاقىندارى قاتىستى. وسى كوكتەمدە اسكەرگە شاقىرىلعان 165 بوزبالا ءبىر اي ىشىندە جاس جاۋىنگەر كۋرسىنان ءوتىپ, ساپتىق جانە اتىس دايىندىقتارىنىڭ نەگىزىن يگەردى. العاشقى اتىس جاتتىعۋلارىن ورىنداپ, جارعىلاردى, اسكەري تەحنيكا مەن قارۋ-جاراقتىڭ تاكتيكالىق-تەحنيكالىق سيپاتتامالارىن زەردەلەدى. اسكەري ءبولىمنىڭ تاريحىمەن جانە داستۇرلەرىمەن تانىستى.
كومانديرلەر تاۋەلسىز ەل قارۋلى كۇشتەرىنىڭ قالىپتاسۋ تاريحىنداعى ايتۋلى تۇلعا – تۇڭعىش قورعانىس ءمينيسترى, كەڭەس وداعىنىڭ باتىرى, حالىق قاھارمانى, دارىندى اسكەري قولباسشى ارميا گەنەرالى ساعادات قوجاحمەتۇلى نۇرماعامبەتوۆتىڭ 100 جىلدىق مەرەيتويى قارساڭىندا اسكەري انت بەرىپ تۇرعانىن جاس جاۋىنگەرلەردىڭ ەسىنە سالدى. باس شتاب باستىعى – قر قارۋلى كۇشتەرى قۇرلىق اسكەرلەرى باس قولباسشىسىنىڭ ءبىرىنشى ورىنباسارى گەنەرال-مايور مەرەكە كوشەكباەۆ جاس وتان قورعاۋشىلاردى ايتۋلى وقيعامەن قۇتتىقتادى.
– وتاندى قورعاۋ ءاربىر ازاماتتىڭ پارىزى ءارى بۇل بورىش قاتارداعى جاۋىنگەردەن گەنەرالعا دەيىن تاۋەلسىز قازاقستاننىڭ ەگەمەندىگى مەن تۇتاستىعىن قورعاۋعا دايىن بولۋعا مىندەتتەيدى. سىزدەردىڭ مەرزىمدى قىزمەتتى ابىرويمەن اتقارىپ, تۋىستارىڭىز بەن جاقىندارىڭىزعا امان-ەسەن ورالۋلارىڭىزعا تىلەكتەسپىن, – دەپ اتاپ ءوتتى گەنەرال-مايور مەرەكە كوشەكباەۆ.
68665 اسكەري ءبولىمىنىڭ جاۋىنگەرلەرى جينالعاندارعا قويان-قولتىق ۇرىس تاسىلدەرى مەن قارۋ-جاراقپەن دەفيلە كورسەتتى. ۇلتتىق اسكەري-پاتريوتتىق ورتالىق شىعارماشىلىق ۇجىمىنىڭ كۇشىمەن كونتسەرتتىك باعدارلاما ۇسىنىلدى. ءىس-شارا سالتاناتتى شەرۋمەن اياقتالدى.
سالتاناتتى بولىمنەن كەيىن قولباسشىلىق ساربازداردىڭ اتا-انالارىمەن كەزدەسىپ, ولاردىڭ سۇراقتارىنا جاۋاپ بەردى.
