مەملەكەت باسشىسى قاسىم-جومارت توقاەۆ ۇلتتىق قۇرىلتايدىڭ ەكىنشى وتىرىسىندا كىتاپ ماسەلەسىنە ەرەكشە توقتالدى. پرەزيدەنت ءوز سوزىندە: «شىن مانىندە, كىتاپ وقيتىن ەل زيالى ۇلتقا اينالادى. ءبىز جاس ۇرپاقتىڭ كىتاپقا قۇشتارلىعىن وياتۋىمىز كەرەك» دەگەن ەدى. وسى باستامانى مينيسترلەر مەن قوس پالاتا دەپۋتاتتارى بىردەن قولداپ, ءبىلىم وردالارىنا تانىمدىق-اعارتۋشىلىق ادەبيەتتەر تارتۋ ەتىپ جاتىر.
استانا قالاسى تەحنولوگيالىق كوللەدجىنە سەنات دەپۋتتارى, سەناتتىڭ الەۋمەتتىك-مادەني دامۋ جانە عىلىم كوميتەتىنىڭ توراعاسى نۇرتورە ءجۇسىپ, جوعارى پالاتىنىڭ حالىقارالىق قاتىناستار, قورعانىس جانە قاۋىپسىزدىك كوميتەتىنىڭ مۇشەسى عالياسقار سارىباەۆ جانە سەناتتىڭ الەۋمەتتىك جوبالار جەتەكشىسى بايان ومىرزاققىزى قوناق بولدى. سەناتورلار وقۋ ورنى كىتاپحاناسىنىڭ ماتەريالدىق-تەحنيكالىق بازاسىمەن جانە كىتاپ قورىمەن تانىسىپ, كىتاپتار سىيلادى. ءبىلىم بەرۋ مەكەمەسىنىڭ پەداگوگيكالىق جانە ستۋدەنتتەر قۇرامىمەن كەزدەسۋ وتكىزدى. ستۋدەنتتەردىڭ ساۋالدارىنا جاۋاپ بەرىپ, سۇحبات ءوربىتتى. كەزدەسۋدە كرەاتيۆتى يندۋستريا, جاساندى ينتەللەكت جانە زامان وزگەرىستەرى تۋرالى كەلەلى اڭگىمە بولدى. سونداي-اق اتالمىش وقۋ ورنىندا Amanat پارتياسى ايەلدەر قاناتىنىڭ باستاماسىمەن «اناعا قاراپ بوي تۇزەيمىن» اتتى ءىس-شارا ءوتتى. ونى ۇيىمداستىرۋعا Amanat پارتياسى ايەلدەر قاناتىنىڭ ءتورايىمى, استانا قالاسى ءماسليحاتىنىڭ دەپۋتاتى سالتانات جەنالاەۆا ۇيىتقى بولدى. پىكىر الماسۋ بارىسىندا ۇلگىلى-ونەگەلى اڭگىمەلەر ايتىلدى.
«جيىننىڭ باستى ماقساتى – انا مەن قىزى اراسىنداعى ءناپ-نازىك بايلانىستى نىعايتا ءتۇسۋ, ءتاتتى-دامدىلەر دايىنداي ءجۇرىپ سىرلاسۋ, بالانى ۆيرتۋالدى الەم ەمەس, اتا-انا مەن قوعام تاربيەلەۋ كەرەك ەكەنىن ۇعىندىرۋ, مىقتى ماماننان بۇرىن جاقسى ادام قالىپتاستىرۋعا ۇندەۋ. قازىرگى قوعامدا مۇنداي جيىندار كوپتەپ ءوتۋى كەرەك دەپ ەسەپتەيمىن. بالا مەن اتا-انانىڭ اراسىنداعى بايلانىس مىقتى بولعاندا عانا سانالى ۇرپاق كوبەيەتىنى انىق» دەدى تەحنولوگيالىق كوللەدج ديرەكتورى ءلاززات مۇراتقىزى.
