مەملەكەت باسشىسى جۋىردا ايماقتىق جاستار كادر رەزەرۆىنە ىرىكتەۋ باستالاتىنىن مالىمدەدى, دەپ حابارلايدى astana-akshamy.kz.
اكىمدەر ونىڭ اشىق ءارى ءادىل ءوتۋىن قامتاماسىز ەتۋگە ءتيىس. سونىمەن قاتار كادرلىق رەزەرۆتى جاساقتاۋ بارىسىندا ءار وبلىستىڭ الەۋمەتتىك-ەكونوميكالىق ەرەكشەلىگىن ەسكەرۋ ماڭىزدى. پرەزيدەنت مەملەكەتتىك قىزمەتشىلەرگە ءتان جاڭا مادەنيەت قالىپتاستىرۋ, قۇندىلىقتاردى وزگەرتۋ ماسەلەسىنە ايرىقشا توقتالدى. ونىڭ ايتۋىنشا, بارلىق سالادا, اسىرەسە مەملەكەتتىك ورگانداردا زاڭ مەن ءتارتىپ ۇستەمدىگى بولۋعا ءتيىس.
– زاڭ مەن ءتارتىپ ورناماسا, قازىرگىدەي كۇردەلى گەوساياسي جاعدايدا ەلىمىزدى ساقتاپ قالۋ قيىن بولادى. مۇنى ءبارى تۇسىنگەنى ءجون. تەك مەملەكەتتىك قىزمەتشىلەر عانا ەمەس, جالپى قوعام زاڭعا باعىنۋعا ءتيىس. بۇل دەموكراتيا شەكتەلەدى دەگەن ءسوز ەمەس, كەرىسىنشە, ەلىمىزدىڭ ەگەمەندىگىن نىعايتىپ, دەموكراتيانى دامىتا تۇسەدى, – دەدى مەملەكەت باسشىسى.
قاسىم-جومارت توقاەۆتىڭ پىكىرىنشە, بيلىك وكىلدەرى ءاردايىم حالىقپەن بىرگە, ياعني ازاماتتارمەن تىعىز بايلانىستا جۇمىس ىستەۋى قاجەت. كەز كەلگەن ماسەلەنى ۋاقىتىلى شەشىپ وتىرۋ – نەگىزگى مىندەت. «حالىق ۇنىنە قۇلاق اساتىن مەملەكەتتە» ءدال وسىنداي قۇندىلىقتار ورنىعۋى كەرەك.
