ەلوردادا ناشاقورلىقتىڭ تارالۋىنا قارسى «تاۋەلدىلىكتى سپورتقا ايىرباستا» اكتسياسى ءوتتى. ءىس-شارا سارىارقا اۋدانى اكىمدىگىنىڭ, قالالىق دەنە شىنىقتىرۋ جانە سپورت باسقارماسى مەن جاستار ساياساتى ماسەلەلەرى باسقارماسىنىڭ قولداۋىمەن ۇيىمداستىرىلدى.
اكتسيا اياسىندا ەلوردالىق سپورتشىلار قالا تۇرعىندارىنا ەلەكتروندى تەمەكىنى سپورتتىق قۇرال-جابدىقتارعا ايىرباستاۋدى ۇسىندى.
«كەزەكتى اكتسيا اياسىندا ءبىز تەمەكى جانە ۆەيپ شەگەتىن جاستارعا قولدارىنداعى زياندى زاتتاردى بوكس قولعابىنا, دوپقا, وزگە دە جابدىقتارعا ايىرباستاۋدى ۇسىنامىز. وسىلايشا, ءبىز ەلوردالىقتاردى سالاۋاتتى ءومىر سالتىنا شاقىرا وتىرىپ, دەنى ساۋ ۇرپاق قالىپتاستىرۋعا اتسالىسامىز» دەدى استانا قالاسى جاستار ساياساتى ماسەلەلەرى باسقارماسىنىڭ باسشىسى سامات يبراەۆ.
ەلوردالىق كيوكۋشينكاي-كان كاراتەشى ءاليحان اسۋباەۆ تا مۇنداي شارالاردىڭ ماڭىزدىلىعىن اتاپ ءوتىپ, جاستاردى سپورتپەن اينالىسۋعا شاقىردى.
«وسى اكتسيا ارقىلى ءبىز جاستارعا سپورتپەن شۇعىلدانىپ, دەنساۋلىقتارىن كۇتۋ كەرەكتىگىن كورسەتىپ, دۇرىس جولعا سالعىمىز كەلەدى. ءبىزدىڭ ارەكەتىمىز كوپشىلىككە موتيۆاتسيا بولادى دەپ سەنەمىز» دەدى ءاليحان اسۋباەۆ.
ەلوردا ءماسليحاتىنىڭ دەپۋتاتى, «جاستار رۋحى» جاستار قاناتىنىڭ توراعاسى ارسلانبەك ماعزۇمنىڭ ايتۋىنشا, اكتسيا بارىسىندا جينالعان ەلەكتروندى قۇرىلعىلار مامانداندىرىلعان زاۋىتتا جويىلاتىنىن ايتتى.
– قازىر ءبىز تەرىس تەندەنتسيانى بايقاپ ءجۇرمىز. 25 جاسقا دەيىنگى جاستار اراسىندا ەلەكتروندى تەمەكىنىڭ كەڭ تارالۋى بايقالادى. بۇل ماسەلە وتە وزەكتى. سوندىقتان بۇگىنگى ماقساتىمىز – جامان ادەتتەردەن ارىلۋ ءۇشىن بىرىگىپ جۇمىس ىستەۋ, – دەيدى ارسلانبەك ماعزۇم.
«تاۋەلدىلىكتى سپورتقا ايىرباستا» اكتسياسى ءبىر اي بۇرىن بەلگىلى قازاقستاندىق سپورتشى ۆاسيلي تاحتايمەن بىرگە جۇرگىزىلدى. ۇيىمداستىرۋشىلاردىڭ سوزىنشە, اكتسيا الداعى ۋاقىتتا دا جالعاسادى.
