استاناداعى جاستار تەاترىنىڭ تالانتتى ۇجىمى 2024 جىلدىڭ 1-10 مامىر ارالىعىندا تۇركيا مەملەكەتىنىڭ ترابزون قالاسىندا وتەتىن XXIV حالىقارالىق قارا تەڭىز جاعالاۋى تەاترلار فەستيۆالىنە قاتىستى. جاستار تەاترى تۇركيانىڭ تورىندە ماحاببات جايىندا تاماشا ميۋزيكلدى كورەرمەن نازارىنا ۇسىندى.
16 جىلدىق تاريحىندا 16 گران-پري جۇلدەسىن يەلەنگەن جاستار تەاترىنىڭ ونەرپازدارى 3-4 مامىر كۇنى
ت.احمەتجاننىڭ «تاپتىم. عاشىق بولدىم. جوعالتتىم» ميۋزيكلىن ساحنالادى.
كول جاعاسىنا دەمالۋعا كەلگەن جاس جىگىت جاعالاۋدان ءوزىنىڭ قيالىنداعى ارۋىن جولىقتىرادى. الايدا ماحاببات بار جەردە قارسىلىقتىڭ دا قاتار جۇرەتىن اكسيوماسى بۇل وقيعادان دا اينالىپ وتپەيدى, سۇلۋدىڭ نەكەلى جارى بار ەكەن.
ءيا, ماحاببات بار جەردە قارسىلىق قاتار جۇرەدى. قايشىلىقپەن بەتپە-بەت كەلگەندە, سەزىمنىڭ دە, ونەردىڭ دە ىشكى قارسىلىق قالىپتاستىرارى ءسوزسىز. ماحاببات قولجەتىمسىز بولعان سايىن, وعان دەگەن ەسسىز قۇشتارلىقتىڭ ءورشي تۇسەرى – ءومىر زاڭدىلىعى. مىنە, وسى شاراسىزدىقتىڭ شىڭىندا ۇلى سەزىم – ماحاببات تۇر.
سوزبەن ايتىپ جەتكىزگىسىز سەزىمدەردىڭ اسەرى مۋزىكا تىلىندە ءۇن قاتقاندا ءتىپتى كۇشەيە تۇسپەك. جۇرەك قىلىن شەرتەر مۇڭلى دا سىرلى اۋەن تەربەگەن عاشىقتاردىڭ ماحاببات حيكاياسى كورەرمەنىن دە بەي-جاي قالدىرماسى انىق.
قازاق تىلىندە قويىلعان سپەكتاكلدەردىڭ تۇرىكشە نۇسقاسى ارنايى ەكران ارقىلى كورسەتىلىپ وتىردى.
جاستار تەاترىنىڭ ۇجىمى تابيعاتى تاماشا تۇركيا ەلىنىڭ اۋاسىمەن تىنىستاپ, ءوز ونەرلەرىن كورسەتىپ, ونەر ساپارىنان تاجىريبە جيناقتاپ, جاقسى اسەرمەن قايتتى.
