استانا قالاسىنىڭ جاستار ساياساتى ماسەلەلەرى باسقارماسىنىڭ قولداۋىمەن جانە رەسپۋبليكالىق ستۋدەنتتىك قۇرىلىس جانە جاستار جاساقتارى قوزعالىسى قوعامدىق قورىنىڭ ۇيىمداستىرۋىمەن «جاسىل ەل» ستۋدەنتتىك قۇرىلىس جانە جاستار ەڭبەك جاساقتارىنىڭ XX ەڭبەك ماۋسىمىنىڭ سالتاناتتى اشىلۋى ءوتتى.
– «جاسىل ەل» جوباسىنىڭ جيىرماسىنشى ماۋسىمى اياسىندا 4200 ادامدى جۇمىسپەن قامتىپ, ونىڭ ىشىندە كوپبالالى وتباسىلاردان شىققان بالالارعا, الەۋمەتتىك از قامتىلعان وتباسىلارعا جاردەمدەسەمىز. ەڭ اۋەلى ولارعا ارنايى ۋنيفورما بەرىلەدى. ودان بولەك 65 مىڭ تەڭگەنىڭ كولەمىندە سىياقى تولەنەدى. 14 پەن 16 جاس ارالىعىنداعى جاسوسپىرىمدەر كۇنىنە 4 ساعاتتان وزدەرىنىڭ وقۋ ورىندارىندا مەكتەپ قابىرعاسىندا جۇمىس ىستەيدى. قازىرگى تاڭدا ەكولوگيا ماسەلەسى زور ماڭىزعا يە. جوبا ۇرانى – «استانا – تازالىق پەن ءتارتىپتىڭ ۇلگىسى». جاستار جازعى دەمالىستارىن پايدالانا وتىرىپ, قورشاعان ورتانىڭ تازالىعىن ساقتاۋعا ۇلەس قوسادى, – دەدى «جاسىل ەل» جاساعى باسشىسىنىڭ ورىنباسارى اسىلبەك ابدراشيد.
«جاسىل ەل» جاستار ەڭبەك جاساقتارى باعدارلاماسى رەسپۋبليكانىڭ بارلىق وڭىرلەرىندە جانە استانا قالاسى بويىنشا جۇزەگە اسىرىلا باستادى. وسى جيىرما جىلدىڭ ىشىندە استانا قالالىق «جاسىل ەل» شتابى قالامىزدا ەلەۋلى ەڭبەك اتقارىپ, 14 پەن 35 جاس ارالىعىنداعى جۇمىسسىز جاستار مەن ستۋدەنتتەردى جازعى ەڭبەك ماۋسىمىندا جۇمىسقا ورنالاستىرىپ كەلەدى.
– «جاسىل ەل» جوباسىنىڭ ۇيىمىندا بولۋ وتە كەرەمەت مۇمكىندىكتەر سىيلاۋدا. ولارعا العىسىمدى بىلدىرەمىن. وسى جوبانىڭ ارقاسىندا تەك جۇمىسپەن قامتىلۋ ەمەس, ءبىر-بىرىمىزگە كومەكتەسۋ ارقىلى دوستىعىمىز نىعايۋدا, ەلىمنىڭ تازالىعىنا ۇلەسىمدى قوسۋ مەن ءۇشىن زور مارتەبە, – دەدى «جاسىل ەل» جوباسىنىڭ قاتىسۋشىسى دانيال قوتقان.
انەل امانگەلديەۆا, ل.گۋميلەۆ اتىنداعى ۇلتتىق ۋنيۆەرسيتەتىنىڭ ستۋدەنتى
