«جاسىل ەل» باعدارلاماسى بويىنشا ەلوردادا جازدا 4 200 جاستى جۇمىسقا ورنالاستىرۋ جوسپارلانۋدا, دەپ حابارلايدى astana-akshamy.kz
بۇل تۋرالى قالالىق جاستار ساياساتى ماسەلەلەرى باسقارماسىنىڭ باسشىسى سامات يبراەۆ استانا قالاسىنىڭ كوممۋنيكاتسيالار قىزمەتىندە وتكەن بريفينگتە ايتتى.
«جاسىل ەل» جوباسى 2005 جىلدان باستاپ جاسوسپىرىمدەر مەن جاستاردىڭ قورشاعان ورتانى قورعاۋ سەزىمىن تاربيەلەۋ, سونداي-اق ەڭبەككە ىنتالاندىرۋ ماقساتىندا ىسكە اسىرىلۋدا.
باعدارلامانىڭ باستى شارتى ادامنىڭ جاسى بولىپ سانالادى, ياعني 14 جاستان 35 جاسقا دەيىنگى وقۋشىلار, ستۋدەنتتەر جانە جۇمىسسىز جاستار قاتىسا الادى.
«وتكەن جىلى جازعى ۋاقىتتا 4200 جاس جۇمىسقا ورنالاستىرىلدى, بيىل 4200 ءجاسوسپىرىم مەن جاستاردى جۇمىسقا ورنالاستىرۋ جوسپارلانۋدا. جاستار 64 مىڭ تەڭگە مولشەرىندە جالاقىمەن جانە «جاسىل ەل» ارنايى نىسانىمەن قامتاماسىز ەتىلەدى. مەكتەپ وقۋشىلارى جوبا بويىنشا جۇمىس ىستەۋ ءۇشىن وقۋ ورنىنداعى الەۋمەتتىك پەداگوگقا جۇگىنۋى كەرەك», – دەدى سامات يبراەۆ.
14-17 جاس ارالىعىنداعى جاسوسپىرىمدەر كۇنىنە 4 ساعاتتان اسپايتىن جۇمىسقا تارتىلادى. ولار ەلوردالىق ساياباقتاردى تازالاۋمەن, مەكتەپ اۋلالارىن كوگالداندىرۋمەن اينالىساتىن بولادى.
وتىنىمدەردى قابىلداۋ 31 مامىردا ب.سوقپاقباەۆ كوشەسى, 14/4 كب 13 مەكەنجايى بويىنشا باستالادى.
باسقارمادا قۇرىلىس كومپانيالارىنا جۇمىسقا ورنالاستىرىلعان جۇمىسسىز جاستار جۇمىس ورنىنان جالاقى, سونداي-اق «جاسىل ەل» جوباسى شەڭبەرىندە 64 مىڭ تەڭگە كولەمىندە قوسىمشا سىيلىقاقى الاتىنىن اتاپ ءوتتى.
بۇل سەگىز ساعاتتىق جۇمىس كۇنى رەتىندە قاراستىرىلادى. قوسىمشا اقپارات الۋ ءۇشىن @Elorda_jastary Instagram پاراقشاسىنا جازا الاسىز.
