بۇگىندە ايەلدەرگە ارنالعان ۆاگوندارى بار پويىزدار 8 باعىت بويىنشا ءجۇرىپ جاتىر, دەپ حابارلايدى astana-akshamy.kz
«جولاۋشىلار تاسىمالى» اق ءباسپاسوز قىزمەتىنىڭ اقپاراتى بويىنشا, ۇلتتىق تاسىمالداۋشى كومپانيا «ايەلدەر تاسىمالى» جوباسىن ودان ءارى دامىتۋ بويىنشا الەۋمەتتىك ساۋالناما جۇرگىزگەن. ساۋالناماعا 600-دەن استام رەسپوندەنت قاتىسقان.
ساۋالناما ناتيجەلەرى بويىنشا, بيىل جازدا تاعى ءۇش باعىت بويىنشا ايەلدەر ۆاگوندارىن ىسكە قوسۋ تۋرالى شەشىم شىعارىلعان. ولار – №354/353 «استانا-سەمەي»; №24/23 «اقتوبە-الماتى»; №25/26 «الماتى-شىمكەنت».
سونداي-اق, كومپانيا وكىلدەرىنىڭ ايتۋىنشا, بۇگىندە ايەلدەر ۆاگوندارى بار پويىزدار مىناداي 8 باعىت بويىنشا جۇرەدى: №77/78 «الماتى-ماڭعىستاۋ»; №351/352 «الماتى-وسكەمەن»; №45/46 «پاۆلودار-تۇركىستان»; №37/38 «ماڭعىستاۋ-سەمەي»; №47/48 «اتىراۋ-استانا»; №33/34 «اقتوبە-الماتى-1»; №4/3 «استانا-الماتى-2»; №71/72 «استانا-شىمكەنت».
ۇلتتىق تاسىمالداۋشىنىڭ مالىمەتىنە سۇيەنسەك, 2024 جىلدىڭ ءبىرىنشى توقسانىندا 70 مىڭنان اسا ايەل «ايەلدەر ۆاگوندارى» قىزمەتىن پايدالانعان. 2023 جىلعى كورسەتكىشتەرمەن سالىستىرعاندا جولاۋشىلار سانى 2 ەسەگە وسكەن.
سونداي-اق «جولاۋشىلار تاسىمالى» اق ءباسپاسوز قىزمەتىنىڭ وكىلدەرى جەتى جاسقا دەيىنگى ەر بالالارعا ايەلدەر ۆاگوندارىندا جۇرۋگە رۇقسات ەتىلگەنىن ەسكە سالدى.
