استانا قالاسىنىڭ كوممۋنيكاتسيالار قىزمەتى الاڭىندا «وقۋ جىلىنىڭ اياقتالۋى جانە بالالاردىڭ جازعى دەمالىسىن ۇيىمداستىرۋ» تاقىرىبىندا استانا قالاسى ءبىلىم باسقارماسى باسشىسىنىڭ ورىنباسارى مارجان كايرباەۆا بريفينگ وتكىزدى. ديالوگ الاڭىندا وقۋ جىلىنىڭ اياقتالۋى, بالالاردىڭ جازعى دەمالىسىن ۇيىمداستىرۋ تۋرالى ايتىلدى.
11-سىنىپتى 11 230 تۇلەك اياقتايدى
2023-2024 وقۋ جىلىندا ەلوردادا 263 مىڭنان استام وقۋشى ءبىلىم الدى. ونىڭ ىشىندە 11-سىنىپتى 11 230 تۇلەك اياقتاسا, 9 سىنىپتى 19 952 وقۋشى ءتامامدايدى. التىن بەلگىگە ۇمىتكەر 294 وقۋشى جانە 717 ۇزدىك اتتەستاتقا ۇمىتكەر.
بيىلعى وقۋ جىلى 25 مامىردا اياقتالادى. 24 مامىر كۇنى مەكتەپتىڭ
1-10 سىنىپ وقۋشىلارى ءۇشىن «ءبىرتۇتاس تاربيە باعدارلاماسى» شەڭبەرىندە «ءبىلىمىم وتانىما» تاقىرىبىنداعى بىرىڭعاي سىنىپ ساعاتتارى وتكىزىلەدى.
11 سىنىپتىڭ مەكتەپ بىتىرۋشىلەرى ءۇشىن وقۋ جىلىنىڭ اياقتالۋىنا ارنالعان «سوڭعى قوڭىراۋ» ءىس-شاراسى 25 مامىردا وتەتىن بولادى.
- ءىس-شارالاردى وتكىزۋگە انيماتورلاردى, مەرەكەلىك اگەنتتىكتەردى, جەكە ستۋديالاردى تارتۋعا, مەرەكەلىك ۇستەلدەردى ۇيىمداستىرۋعا
- جالعا بەرىلەتىن اۆتوكولىكتەردى تارتا وتىرىپ, قالا بويىنشا كوشپەلى ەكسكۋرسيالار وتكىزۋگە
- اكىمشىلىك پەن پەداگوگ قىزمەتكەرلەرگە سىيلىقتار ءۇشىن اقشالاي قاراجات جيناۋعا رۇقسات ەتىلمەيدى.
قورىتىندى اتتەستاتتاۋ – ماڭىزدى سىناق
9 (10)-سىنىپ وقۋشىلارىنىڭ قورىتىندى ءبىتىرۋ ەمتيحاندارى – اعىمداعى جىلدىڭ 29 مامىر – 10 ماۋسىم ارالىعىندا, 4 پاننەن وتكىزىلەدى.
11 (12) سىنىپ ءبىلىم الۋشىلارىنىڭ مەملەكەتتىك ءبىتىرۋ ەمتيحاندارى – اعىمداعى جىلدىڭ 28 مامىرى مەن 11 ماۋسىم ارالىعىندا 5 پاننەن ۇيىمداستىرىلادى.
بيىل العاش رەت 5-8, 10-سىنىپتاردا وقۋشىلاردىڭ باعدارلامالار مازمۇنىن مەڭگەرۋ دەڭگەيىن باعالاۋ ماقساتىندا قازاق ءتىلى مەن ادەبيەتى ءپانى بويىنشا 27-31 مامىر ارالىعىندا ارالىق ەمتيحاندار وتكىزىلمەك.
«قازاق ءتىلى» – قازاق سىنىپتارى;
«قازاق ءتىلى مەن ادەبيەتى» – قازاق تىلىنەن باسقا تىلدە وقىتاتىن سىنىپتار ءۇشىن.
تاپسىرۋ ءتۇرى: جازباشا جانە اۋىزشا (تىڭدالىم, ايتىلىم, وقىلىم, جازىلىم داعدىلارى بويىنشا)
ەلوردا تۇلەكتەرى ءۇشىن اتتەستاتتاردى سالتاناتتى تابىستاۋ اعىمداعى جىلدىڭ 14 ماۋسىمىندا وتەدى. سونداي-اق, ەلوردادا مەكتەپ تامامداعان تۇلەكتەردىڭ ەڭ اۋقىمدى كەشى – «ەلوردا ماقتانىشى-2024» فورۋمى وتەدى.
جازعى دەمالىس قالاي ۇيىمداستىرىلادى؟
دەمالىس كەزەڭىندە بالالاردىڭ ساۋىقتىرۋ دەمالىسىن, بوس ۋاقىتىن جانە جۇمىسپەن قامتىلۋىن ۇيىمداستىرۋ كەزىندە بالالاردىڭ قاۋىپسىزدىگى ءبىلىم باسقارماسىنىڭ باستى نازارىندا.
وسى جونىندە ءبىلىم بەرۋ ۇيىمدارىنىڭ بارلىق باسشىلارىمەن پوليتسيا, توتەنشە جاعدايلار, سانيتارلىق-ەپيدەميولوگيالىق باقىلاۋ, قوعامدىق دەنساۋلىق ساقتاۋ باسقارمالارىنىڭ وكىلدەرىن شاقىرا وتىرىپ, كەڭەستەر, نۇسقامالار جانە وقىتۋ سەمينارلارى وتكىزىلدى. بارلىق باسشىلارعا بالالاردىڭ جازعى دەمالىسىن ۇيىمداستىرۋ كەزىندە قاۋىپسىزدىك تەحنيكاسىن ساقتاۋ تۋرالى ۇسىنىستار, جادىنامالار بەرىلدى.
بۇدان باسقا, ءبىلىم باسقارماسى جازعى دەمالىستى ۇيىمداستىرۋعا تارتىلعان بارلىق مەملەكەتتىك قۇرىلىمداردىڭ ىشىنەن قالالىق ۆەدومستۆوارالىق شتاب قۇردى, قالالىق ءىس-شارالار جوسپارى بەكىتىلدى.
15-20 مامىر ارالىعىندا شتاب مۇشەلەرى, ءبىلىم باسقارماسىنىڭ قىزمەتكەرلەرى مەكتەپ جانىنداعى لاگەرلەردىڭ وقۋشىلاردىڭ جازعى دەمالىسىنىڭ باستالۋىنا دايىندىعىن الدىن الا تەكسەرۋدى باستادى.
2024 جىلدىڭ جازعى كەزەڭىندە جازعى دەمالىستىڭ بارلىق تۇرلەرىمەن 1-10 سىنىپتىڭ 206 468 وقۋشىسى (96%) قامتىلاتىن بولادى.
بالالاردىڭ جازعى دەمالىسىن ۇيىمداستىرۋ ەكى باعىت بويىنشا جۇرگىزىلەدى – ساۋىقتىرۋ جانە جۇمىسپەن قامتۋ.
ءبىرىنشى باعىت – بالالاردى ساۋىقتىرۋ جانە دەمالۋ ماقساتىن كوزدەيدى.
قالانىڭ ءبىلىم بەرۋ ۇيىمدارىنىڭ بازاسىندا 97 مەكتەپ جانىنداعى لاگەر, وقۋشىلاردىڭ قىزىعۋشىلىقتارى بويىنشا 75 بەيىندىك لاگەر, بالالار-جاسوسپىرىمدەر ءتۋريزمى جانە ولكەتانۋ ورتالىعىنىڭ بازاسىندا ورنالاسقان «باتىر» شاتىرلى لاگەرى جۇمىس ىستەيتىن بولادى. الداعى 3 ماۋسىمدا 150 بالا قامتىلادى.
№ 43 قوسىمشا ءبىلىم بەرۋ مەكتەپ-ورتالىعىندا 3 ماۋسىمنان 23 تامىزعا دەيىن 720 بالانى قامتيتىن «اق جەلكەن » سپورت لاگەرى جۇمىس ىستەيدى. از قامتىلعان وتباسىلاردان شىققان بالالاردىڭ جازعى دەمالىسىن تەگىن نەگىزدە ۇيىمداستىرۋ ءۇشىن جالپىعا بىردەي ءبىلىم بەرۋ قورىنىڭ قاراجاتى ەسەبىنەن 7326 بالا تەگىن دەمالادى. سونداي-اق, جاقىن جانە الىس شەتەلدەرگە تۋريستىك ساپارلار كەزىندە 45 820 بالانى قامتيتىن اتا-انالاردىڭ قاراجاتى ەسەبىنەن دەمالىس قاراستىرىلعان.
سونىمەن قاتار, 1-4 سىنىپ وقۋشىلارى «بوبەك», 5-9 سىنىپ وقۋشىلارى «بالداۋرەن-ششۋچينسك», «بالداۋرەن-قاپشاعاي», «بالداۋرەن-بالقاش» رەسپۋبليكالىق ساۋىقتىرۋ لاگەرلەرىندە ساۋىقتىرۋدان وتە الادى. وقۋ-اعارتۋ مينيسترلىگىنىڭ بەرىلگەن كۆوتالارىنا سايكەس, وسى لاگەرلەردە از قامتىلعان جانە كوپ بالالى وتباسىلاردان شىققان 458 بالا جاز بويى دەمالادى.
كانيكۋل كەزىندە بالالار جۇمىسپەن قامتىلادى
دەمالىستا بالالاردى جۇمىسپەن قامتۋدى ۇيىمداستىرۋ ءۇشىن 200 519 بالانى (99%) 4 باعىت بويىنشا قامتۋ جوسپارلانۋدا.
جۇمىسپەن قامتۋ باعىتى بويىنشا بارلىعى 43 417 بالانى قامتيتىن 116 ءىس-شارا وتكىزۋ جوسپارلانعان. «جاسىل ەل» كوگالداندىرۋ بريگادالارىندا, جۇمىسپەن قامتۋ ورتالىقتارى, جوعارعى سىنىپ وقۋشىلارىنىڭ ەڭبەك جاساعىندا, كوگالداندىرۋ بريگادالارى, مەكتەپ ورمانشىلىعى, وندىرىستىك كاسىپورىندا جۇمىس ىستەۋگە, جازعى ماۋسىم كەزىندە كومپانيالاردا كەلىسىم-شارت نەگىزىندە جۇمىس ىستەۋگە, جوندەۋ-قۇرىلىس بريگادالارىندا جانە وتباسىندا اتا-انالارمەن جۇمىس استەۋگە رۇقسات بەرىلگەن.
شىعارماشىلىق جۇمىسپەن قامتۋ باعىتى بويىنشا 99 360 بالانى قامتي وتىرىپ, 300-دەن استام ءىس-شارا وتكىزىلەدى. ءارتۇرلى مەكەمەلەر جانىنداعى قىزىعۋشىلىقتار بويىنشا كلۋبتار مەن ۇيىرمەلەر, اۋلا كلۋبتارى جۇمىس ىستەيدى.
سپورتتىق-تۋريستىك جۇمىسپەن قامتۋ – بارلىعى 3330 بالانى قامتيتىن 483 ءىس-شارا وتكىزىلەدى. 3 كۇندىك جورىقتار, ەكسكۋرسيالار, وبلىس جانە رەسپۋبليكا بويىنشا تۋريستىك تانىسۋ ساپارلارى, كوشپەلى سپورتتىق جيىندار ۇيىمداستىرىلادى.
زياتكەرلىك جۇمىسپەن قامتۋ-بارلىعى 4848 بالالاردى قامتيتىن 11 ءىس-شارا جوسپارلانعان. وليمپيادالىق رەزەرۆتىڭ, كوشباسشىلار اكتيۆىنىڭ جازعى مەكتەپتەرى, «جاس ۇلان», «جاس قىران» مۇشەلەرىنىڭ جازعى تىلدىك مەكتەپتەرى, پىكىرسايىس جاساقتارى وتكىزىلەدى.
گۇلشات ساپارقىزى.
