جاز ماۋسىمى باستالىسىمەن ارمانىنا قانات بايلاعان وقۋشىلاردىڭ دەمالىس ورنى مەن بالالار لاگەرى ءوز جۇمىسىن جالعاستىرادى. استانالىق بالالار 29 تامىزعا دەيىن ونكۇندىك جازعى دەمالىسىن وسى لاگەرلەردە وتكىزەدى.
كىم قايدا دەمالادى؟
استانا قالاسى ءبىلىم باسقارماسىنىڭ مالىمەتىنشە, ەلوردادا 2024 جىلى جازعى دەمالىستىڭ بارلىق تۇرىمەن 1-10-سىنىپتىڭ 200 مىڭنان استام وقۋشىسى (96 پايىز) قامتىلادى.
قالالىق ءبىلىم بەرۋ ۇيىمدارىنىڭ بازاسىندا 97 مەكتەپ جانىنداعى لاگەر, وقۋشىلار قىزىققان ءارتۇرلى باعىت بويىنشا 75 بەيىندىك لاگەر اشىلعان.
№43 قوسىمشا ءبىلىم بەرۋ مەكتەپ-ورتالىعىندا 3 ماۋسىمنان 23 تامىزعا دەيىن 720 بالانى قامتيتىن «اق جەلكەن» سپورت لاگەرى جۇمىس ىستەيدى.
از قامتىلعان وتباسىنان شىققان بالالاردىڭ جازعى دەمالىسىن تەگىن نەگىزدە ۇيىمداستىرۋ ءۇشىن جالپىعا بىردەي ءبىلىم بەرۋ قورىنىڭ قاراجاتى ەسەبىنەن 7326 بالا تەگىن دەمالادى.
1-4-سىنىپ وقۋشىلارى «بوبەك», 5-9-سىنىپ وقۋشىلارى «بالداۋرەن-ششۋچينسك», «بالداۋرەن-قاپشاعاي», «بالداۋرەن-بالقاش» رەسپۋبليكالىق ساۋىقتىرۋ لاگەرلەرىندە ساۋىقتىرۋدان وتەدى. وقۋ-اعارتۋ مينيسترلىگىنىڭ بەرىلگەن كۆوتاسىنا سايكەس, مۇندا از قامتىلعان جانە كوپبالالى وتباسىنان شىققان 458 بالا جاز بويى دەمالادى.
جالپى العاندا, بالالاردىڭ جازعى دەمالىسىن ۇيىمداستىرۋ ساۋىقتىرۋ جانە جۇمىسپەن قامتۋ سەكىلدى ەكى باعىت بويىنشا جۇرەدى. ءبىرىنشى باعىت بويىنشا 97 مەكتەپ جانىنداعى لاگەر جانە وقۋشىلاردىڭ مۇددەسى بويىنشا 75 بەيىندىك لاگەر جۇمىس ىستەيدى.
2025 جىلعا دەيىن ۇلتتىق قۇندىلىققا بەيىمدەلگەن تاربيە جۇمىسى لاگەردە عانا ەمەس, قالا مەكتەپتەرىنە دە ەنگىزىلگەن. قاناتقاقتى جوبا ىسكە قوسىلعان 2022 جىلدان بەرى مەكتەپتەردە وڭ وزگەرىس بايقادىق: بالالار ساباققا كەشىگۋدى قويدى, وقۋشىلار اراسىنداعى ءتارتىپ بۇزۋشىلىق ءنول دەڭگەيىنە تومەندەدى. ارينە, پەداگوگتارمەن جۇرگىزىلگەن ۇزدىكسىز تاربيە جۇمىسى الداعى ۋاقىتتا دا جالعاسادى.
– بيىل 20 مەكتەپتە كيىز ءۇي ورناتىلعان ەتنولاگەر, 21 مەكتەپتە سپورت لاگەرى جۇمىس ىستەيدى. جاتتىقتىرۋشىلار بالالارعا ارنايى الاڭداردا سپورت تۇرلەرىن ۇيرەتەدى. ودان بولەك, تانىمال سپورتشىلارمەن كەزدەسۋ وتەدى, – دەدى استانا قالاسى ءبىلىم باسقارماسى قوسىمشا ءبىلىم بەرۋ جانە تاربيە جۇمىسى ءبولىمىنىڭ باس مامانى ءمادينا سۇلەيمەنوۆا.
ەرەكشە ەتنولاگەر
استاناداعى قادىر مىرزا ءالى اتىنداعى №88 مەكتەپ-ليتسەيىندە «اقبوتا» جازعى ساۋىقتىرۋ لاگەرى اشىلدى. اشىلۋ سالتاناتىنا قالالىق ءبىلىم باسقارماسىنىڭ وكىلدەرى, مۇعالىمدەر, مەكتەپتىڭ باستاۋىش جانە 5-8-سىنىپ وقۋشىلارى, ارنايى شاقىرىلعان قوناقتار مەن اتا-انالار قاتىستى.
– ءبىزدىڭ توبىمىز «جۇلدىز» دەپ اتالادى. ماعان لاگەر وتە قاتتى ۇناپ جاتىر. ۇسىنىس ايتقان كلارا ساپارقىزىنا العىسىم شەكسىز. دەنىمىز ساۋ بولۋ ءۇشىن جانار اليمۇراتقىزىمەن كۇن سايىن تاڭعى جاتتىعۋ جاسايمىز. ءارتۇرلى ويىن ويناپ, ۋاقىتىمىزدى وتە قىزىقتى ءارى ءتيىمدى وتكىزەمىز. اسپازشىلار بىزگە ءدامدى تۇسكى اس ازىرلەپ بەرەدى, – دەيدى №88 مەكتەپ-ليتسەيىنىڭ 2-سىنىپ وقۋشىسى ەرجىگىت حاقنازار.
– دوستارىمىزبەن قىزىقتى كينوعا باردىق. بارلىق بالانىڭ ءتىلىن تاۋىپ, ەرەكشە مەيىرىمگە بولەگەن ۇستازدارىمىزعا, لاگەرگە بارۋعا كەڭەس بەرگەن سىنىپ جەتەكشىمىز سالتانات تۇرسىنبايقىزىنا راقمەت! – دەيدى ەرجىگىت ايسۇلتان.
بالالارىنىڭ جازعى كانيكۋلدى مازمۇندى, قىزىقتى وتكىزىپ جاتقانىنا اتا-انالار دا ءدان ريزا.
– مەكتەپ جانىنداعى جازعى لاگەر تاربيەشىلەرىنە راقمەت ايتامىز. بالالارىمىز نەشە ءتۇرلى قىزىق ويىن ويناپ, كينوعا, تسيرككە بارىپ ۇلگەردى. العاشقى بەس كۇنى بالاما ۇناپ جاتىر, – دەيدى اتا-انا اسەمگۇل جۇماعاليەۆا.
– جازعى لاگەر اياسىندا قىزىم وزىنە جاڭا دوستار تاپتى, تانىمدىق ويىنداردى قىزىقتادى. كۇن سايىن مەكتەپتەن جاقسى كوڭىل كۇيمەن كەلگەنىنە قۋانامىن, – دەيدى اتا-انا ماحاببات نۇراحمەتوۆا.
№88 مەكتەپ-ليتسەي ديرەكتورى جانات ايتوۆا ەتنولاگەردە جاس وركەنگە ۇلتتىق قۇندىلىقتار, سالت-داستۇرلەرىمىز, انا ءتىلىمىز بەن ادەبيەتىمىز دارىپتەلەتىنىن ايتتى. مىسالى, ءجۇن ساباپ, ۇرشىق ءيىرۋ, قۇراق قۇرۋ, شي, كەستە توقۋ جانە ت. ب.
– مەكتەبىمىزدە «ەلوردا – باقىتتى بالالىق مەكەنى» اتتى لاگەر اشىلدى. ماقساتىمىز – ەتنولاگەر ارقىلى ۇلتتىق قۇندىلىقتى دارىپتەۋ. ەتنولاگەردە قىزدار جاعى ۇلتتىق تاعامداردى ازىرلەۋدى, قامىر يلەۋ مەن نان جايۋدى, باۋىرساق ءپىسىرۋدى ۇيرەنسە, ۇلدار جاعى باتا بەرۋدى ۇيرەنىپ, ونىڭ ءمان-ماعىناسىن زەردەلەيدى. وسى اپتادان باستاپ سۇتتەن قاتىق-ايران ۇيىتىپ, شىلدە ايىندا ۇرشىقپەن ءجۇن ءيىرىپ, كادىمگى تەكەمەت جاسايمىز. وسىعان 5 قويدىڭ ءجۇنىن كۇتىپ وتىرمىز, كەلگەن بويدا وقۋشىلارمەن بىرگە جۋىپ, كەپتىرىپ, ءجۇن ءيىرىپ, باسقان كيىزىمىزدى, ۇيىتقان قاتىعىمىزدى, بالالار قولىنان شىققان دۇنيەلەردى لاگەر قورىتىندىسى بويىنشا ەل-جۇرتقا كورسەتىپ, ناتيجەسىن, بالا ەڭبەگىنىڭ جەمىسىن پاش ەتسەك دەيمىز. ويتكەنى ءبىزدىڭ ماقسات – ۇلتىن, ءوز قۇندىلىعىن سۇيەتىن, ەل بولاشاعىنا قىزمەت ەتەتىن ادال, ەڭبەكقور, پاراساتتى ۇرپاق تاربيەلەۋ. ۇيدە, يا كوشەدە ۇيالى تەلەفونعا تەلمىرىپ وتىرعانشا, بالالاردىڭ وسىنداي يگى ىسكە ارالاسقانىن دۇرىس دەپ ەسەپتەدىك, سوندىقتان وسى باعىتتاعى تاربيە جۇمىسىن جالعاستىرا بەرەمىز. بالا جازدا سيىر ساۋ, اتپەن سەرۋەندەۋ, قىمىزدى باپتاۋدى ۇيرەنەدى, – دەيدى مەكتەپ ديرەكتورى جانات تۇرىسبەكقىزى.
لاگەردە ءارى تىنىققان, ءارى شىنىققان بالالار ءوز دەنساۋلىعىن نىعايتىپ, جازدا تولىققاندى دەمالىپ, جاڭا وقۋ جىلىن تىڭ كۇشپەن باستاماق.
