جازعى كانيكۋل كەزىندە استانالىق جەتكىنشەكتەر مەكتەپتەر جانىندا اشىلعان لاگەرلەرگە بارىپ دەمالۋدى ۇناتادى. سونداي كوڭىلدى كانيكۋل استاناداعى كارىم مىڭباەۆ اتىنداعى №59 مەكتەپ-ليتسەيىنىڭ «Alpha Camp» اتتى بەيىندىك لاگەرىندە باستالدى. سونىمەن قاتار, ەلورداداعى قادىر مىرزا ءالى اتىنداعى №88 مەكتەپ-ليتسەيىندە «اقبوتا» جازعى ساۋىقتىرۋ لاگەرى بالالارعا ەسىگىن ايقارا اشسا, «WEB CAMP» جازدىق ماۋسىمدىق لاگەرى استاناداعى كاسىپتىك-تەحنيكالىق كوللەدجىندە 10-14 جاس ارالىعىنداعى بالالارعا ارنالعان ساۋىقتىرۋ لاگەرى قىزمەت ەتەدى. بۇل لاگەردىڭ ەرەكشەلىگى سول – «WEB CAMP», ياعني بالالارعا قوسىمشا كومپيۋتەرلىك گرافيكالىق ديزاينداردى مەڭگەرۋگە كومەگىن تيگىزەدى.
4600 بالا وقيتىن مەكتەپتىڭ تەڭ جارتىسى – انا تىلىندەگى سىنىپتار, جارتىسىندا ورىس تىلىندە بالالار ءبىلىم الادى. كەزىندە ءۇش اۋىسىمدا جۇمىس ىستەگەن مەكتەپ وسى وقۋ جىلىندا جاڭا عيماراتقا يە بولىپ, ءبىلىم الۋشىلار ەكى اۋىسىممەن وقي باستادى.
«Alpha Camp» جازعى لاگەرىنىڭ اشىلۋ سالتاناتى مەكتەپتىڭ باستاۋىش عيماراتىنىڭ اۋماعىندا, اشىق اسپان استىندا وتكىزىلدى. 4 مىڭنان استام بالا وقيتىن ارالاس مەكتەپتىڭ 1-4, 5-8-سىنىپ وقۋشىلارى ءۇشىن جۇمىس ىستەيتىن جازعى لاگەردىڭ اشىلۋ سالتاناتىنا پەداگوگ-تالىمگەرلەر, وقۋشىلار, اتا-انالار قاتىستى. قولدارىنا ءتۇرلى ءتۇستى شار ۇستاپ, جالاۋمەن, ءتۇرلى كيىنىپ, ءىس-شارانى ارلەگەن مۋزىكامەن فلەشموب جاساعان تالىمگەرلەر مەن وقۋشىلاردىڭ كوڭىلدى بيلەرى كەلگەندەرگە قۋانىش سىيلادى, بالالاردى قىزىقتى دەمالىسقا جەتەلەدى.
– بىزدە ءپروفيلدى لاگەر 4 ماۋسىم بويى جۇمىس ىستەيدى. تاڭعى 9-دان 3-كە دەيىن ارنايى جاسالعان كەستە بويىنشا بالالار اراسىندا تاماقتانىپ, كۇش جيناپ الىپ, ءتۇرلى قىزىقتى ءىس-شارالارعا قاتىسادى. مەكتەپ جانىنداعى جازعى لاگەردە IT سىنىپتارى, عاجايىپتار الەمىنە ساياحاتتاۋ ءۇشىن گارري پوتتەر ستيلىندە جاسالعان سىنىپتار بار. دارىندى بالالار, تەحنيكاعا بەيىم, زەيىندى بالالارعا ارنالعان قولونەر بۇيىمدارىن جاسايتىن, ءىس تىگىپ, بيسەر توقيتىن ۇقىپتى وقۋشىلارعا, سونداي-اق سپورتپەن اينالىسقىسى كەلەتىن شىمىر جەتكىنشەكتەردى تاربيە ىسىنە باۋلۋ ماقساتىندا 60 تالىمگەر ارنايى دايارلانعان. بۇل سىنىپتاردىڭ بارلىعى بيىلعى وقۋ جىلىندا عانا جاڭادان پايدالانۋعا بەرىلگەن باستاۋىش سىنىپتارىنا ارنالعان جاڭا عيماراتتاردا ورنالاسقان, بالالار ءۇشىن بارلىق جاعداي جاسالعان, – دەيدى مەكتەپ-ليتسەيىنىڭ ديرەكتورى الما جۇمابەكوۆا.
كونتسەرتتىك باعدارلامادا وقۋشىلار ەڭ جاقسى كورەتىن عاجايىپتار مەن سيقىرلار الەمىنە ساياحاتتاپ, حوگۆارتس يگى ىستەر اككادەمياسىمەن تانىستى.
– وسى جازعى لاگەرگە بيىل ءۇشىنشى جىل قاتىسىپ ءجۇرمىن. ماعان تالىمگەرلەردىڭ وقۋشىلارمەن قارىم-قاتىناسى, دوستارىممەن بىرگە ۋاقىت وتكىزۋ وتە ۇنايدى, مۇندا قىزىقتى باعدارلامالار كوپ, بيىل دا سولاي بولاتىن شىعار, – دەيدى 5-سىنىپ وقۋشىسى عالىم
بيجانوۆ.
– مەن جازعى لاگەرگە ءبىرىنشى رەت كەلدىم, مۇندا قىزىقتى بولارىنا سەنەمىن, اشىلۋ سالتاناتىنىڭ ءوزى وتە قىزىقتى بولدى, بۇيىرسا, ەكى اپتاداي ۋاقىت وسىندا بولامىن, – دەيدى 3-سىنىپ وقۋشىسى ەرعازى ءابدىراحمانوۆ.
وقۋشىلار مەكتەپ اۋلاسىندا تىگىلگەن كيىز ۇيدەگى «جاس كازاق» ەتنولاگەرىندە ەلىمىزدىڭ تاريحىمەن, مادەنيەتىمەن سۋسىندايدى, حالقىمىزدىڭ سالت-ءداستۇرى, ادەبيەتى, ەتنوگرافياسىمەن تەرەڭ تانىسىپ, ۇلتتىق قۇندىلىقتارىمىزدى ۇلىقتايدى. تالىمگەر پەداگوگ, قازاق ءتىلى مەن ادەبيەتى ءپانىنىڭ مۇعالىمى زامزاگۇل كەنجەاحمەتقىزى – وقۋشىلارعا قازىرگى تاڭدا تىلىمىزدە سيرەك قولدانىلىپ جۇرگەن اتاۋلاردى, بۇيىم تۇرلەرىن, كيىز ءۇي, مۋزىكا اسپاپتارىنىڭ اتاۋلارى تۋرالى ايتىپ, تاريحىن تارقاتادى, بالالاردىڭ باي, كەرەمەت انا تىلىمىزدە سويلەۋىنە سەپتىگىن تيگىزىپ جۇرگەن تاجىريبەلى پەداگوگ. ءوزى قايماعى بۇزىلماعان تورعاي ءوڭىرىنىڭ تۋماسى, بەلگىلى ەتنوگراف سەيىت كەنجەاحمەتۇلىنىڭ پەرزەنتى ەكەن. ول كىسىمەن الداعى ۋاقىتتا ەتنوگرافيا تاقىرىبىندا سۇحبات جاسايتىن بولىپ كەلىستىك.
– «سپورتكامپ» سپورت لاگەرىندە مىقتىراق جانە ەپتىرەك بولا تۇسەسىزدەر, سونىمەن قاتار بۇلدىرشىندەردىڭ قىزىعۋشىلىعىن ارتتىرۋ ماقساتىندا «ديدجيتال كامپ» تسيفرلىق لاگەرىندە ءتۇرلى قىزىقتى جانە ەرەكشە اقپاراتتارمەن تانىسۋ جوسپارلانۋدا, – دەيدى جازعى لاگەر جەتەكشىسى ايجان ساقانوۆا.
مەكتەپ جانىنداعى جازعى لاگەردە بالالار ۇلتتىق سالت-داستۇرلەرمەن تانىسىپ, ۇلتتىق قۇندىلىقتارىمىزدى, تاريحىمىزدى كەڭىنەن بىلەدى.
