كولىك مينيسترلىگى جولداردىڭ مەرزىمىنەن بۇرىن توزۋىنىڭ نەگىزگى سەبەپتەرىن ايتىپ بەردى, دەپ حابارلايدى astana-akshamy.kz
ەلىمىزدىڭ اۋماعىندا 60 مىڭعا جۋىق ساموسۆال تىركەلگەن. ونىڭ ىشىندە, ستاتيستيكا مالىمەتتەرىنە سايكەس, قىتايدا وندىرىلگەن 40 مىڭعا جۋىق ساموسۆال شامادان تىس جۇكتەمەمەن جالپى پايدالانىمداعى جولداردا ءجۇرىپ, ينەرتتى ماتەريالداردى تاسىمالدايدى.
وسىلايشا, اتالعان جۇك كولىكتەرىنىڭ سالماعى رۇقسات ەتىلگەن نورمادان ەكى ەسە اسىپ تۇسەدى. ماسەلەن, رۇقسات ەتىلگەن جۇكتەمە 25 توننا بولسا, ساموسۆالدار جالپى سالماعى 35-40 توننا جۇكتى تاسىمالدايدى. بۇل جول توسەمىنىڭ مەرزىمىنەن بۇرىن توزۋىنا اكەلەتىن ءارى كەرى اسەر ەتەتىن فاكتورلاردىڭ ءبىرى.
جول قوزعالىسىنا كارەرلەردە جۇرەتىن اۋىر جۇك كولىكتەرىمەن قاتار اۆتوموبيل جولىنا ۇلكەن سالماق تۇسىرەتىن وزگە دە اۆتوكولىك قۇرالدارى قاتىسادى. ولاردىڭ قاتارىندا بەتون ارالاستىرعىشتار, اۆتوكراندار جانە باسقا دا اۋىر اۆتوموبيلدەر بار.
ەستەرىڭىزگە سالا كەتەيىك, 2022 جىلدىڭ جەلتوقسانىندا اۆتوماتتاندىرىلعان ولشەۋ ستانتسيالارىن ورناتۋ جانە ولاردىڭ جۇمىس ىستەۋ ءتارتىبىن انىقتايتىن زاڭ قابىلدانعان بولاتىن. اتالعان زاڭناما جۇك كوتەرگىشتىگى 12 توننادان اساتىن اۆتوموبيلدەردى ولشەۋ ستانتسيالارى ارقىلى وتۋگە مىندەتتەيدى ءارى زاڭ تالاپتارىن بۇزۋ اكىمشىلىك جازاعا الىپ كەلەدى.
وسى رەتتە كولىكتىك باقىلاۋدى بارىنشا قامتاماسىز ەتۋ ءۇشىن اۆتوماتتاندىرىلعان ولشەۋ ستانتسيالارىنىڭ سانىن ەداۋىر ارتتىرۋ جوسپاردا بار. وسىلايشا, بيىل ەلورداعا كىرەبەرىس جەردە اۆتوماتتاندىرىلعان 6 جاڭا ستانتسيا ورناتىلدى. قازىرگى ۋاقىتتا ولار پيلوتتىق رەجيمدە جۇمىس ىستەپ تۇر.
كولىكتىك باقىلاۋ ورگاندارى قىزمەتكەرلەرىنىڭ ايتۋىنشا, اتالعان شارالاردى قولعا الۋ ارقىلى اۋىر سالماقتى اۆتوموبيل كولىك قۇرالدارىنىڭ قوزعالىسىن باقىلاۋعا قاتىستى ماسەلەلەردى شەشۋ جانە سىبايلاس جەمقورلىق تاۋەكەلدەرىن ازايتۋ كوزدەلىپ وتىر.
