الەمنىڭ 20-دان استام ەلىنەن 6000 سپورتشى قاتىسقان Astana Half Marathon EXPO 2017 كورمەسىنىڭ الاڭىندا باستالىپ, قاتىسۋشىلار قالانىڭ ورتالىق كوشەلەرىمەن, «بايتەرەك» مونۋمەنتىنىڭ, «حان شاتىر» ساۋدا ورتالىعىنىڭ, تاۋەلسىزدىك سارايى مەن بوتانيكالىق باقتىڭ جانىنان جۇگىرىپ ءوتتى.
«ءبىرىنشى بولۋ باتىلدىعى» كورپوراتيۆتىك قورىنىڭ ۇيىمداستىرۋىمەن وتكەن بۇل مارافوننىڭ ماقساتى – ەلىمىزدىڭ تۇكپىر-تۇكپىرىندە جۇگىرۋگە دەگەن سۇيىسپەنشىلىكتى وياتۋ, سپورت پەن بەلسەندى ءومىر سالتىن ناسيحاتتاۋ, جۇگىرۋدى بارلىق جاستاعى جانە فيزيكالىق مۇمكىندىگى بار ادامدار ءۇشىن قولجەتىمدى ءارى تارتىمدى ەتۋ.
اتالعان قور كەڭەسىنىڭ توراعاسى عالىمجان ەسەنوۆتىڭ ايتۋىنشا, 2022 جىلدان باستاپ قور ءىس-شارالارىنىڭ گەوگرافياسى كەڭەيىپ, الماتى عانا ەمەس, استانا, تۇركىستاندى قامتىعان.
مارافون قاتىسۋشىلارى 21,1 كم (جارتىلاي مارافون), 10 كم (سكانديناۆيالىق جاياۋ ءجۇرۋ) جانە ەكيدەن كوماندالىق ەستافەتاسى سياقتى 4 قاشىقتىقتى باسىپ ءوتتى. سوڭىندا بارلىق جەڭىمپاز بەن جۇلدەگەر سەرىكتەستەر مەن دەمەۋشىلەردىڭ باعالى جانە اقشالاي سىيلىقتارىمەن ماراپاتتالدى. جارىسقا قاتىسىپ, قۋانىشىن جاسىرا الماعان سپورتشىلار مارافوننىڭ ءوز ءومىرى ءۇشىن ماڭىزدى ەكەنىن ايتادى.
– بۇل – مەنىڭ ءۇشىنشى جارتىلاي مارافونىم. كلۋبقا العاش رەت وزىممەن رۋحاني سايكەستىكتەگى دوستار تابۋ ءۇشىن كەلگەن بولاتىنمىن. قازىرگى تاڭدا بۇل ماقساتىم تولىعىمەن ورىندالدى. سونىمەن قاتار جۇگىرۋ ءومىرىمدى وزگەرتكەنىن ايتقىم كەلەدى. وسى جارىسقا دەيىن ەكى جىل بويى كلۋبتا اپتاسىنا ءۇش رەت جاتتىعۋ جاسادىم. وندا مەن كۇندە جۇگىرۋ ءۇشىن 30-40 مينۋتىمدى بولەتىنمىن. ادام سپورتپەن اينالىسۋ ءۇشىن ەرەجە مەن ءتارتىپ بولۋ كەرەك. ءتارتىپ بوس ۋاقىتىڭدى ۇتىمدى پايدالانۋعا جانە سالاۋاتتى ءومىر سۇرۋگە ۇيرەتەدى, – دەيدى جارىسقا قاتىسۋشى ءاليا نۇرعاليەۆا.
شاپاعات ءابدىر
