استانالىق دارىگەرلەر توبى مىڭداعان ادامعا ءومىر سۇرۋگە ەكىنشى مۇمكىندىك بەرەتىن جانە مەديتسينا الەمىن وزگەرتەتىن بىرەگەي قۇرىلعى ويلاپ تاپتى. ALEM (Astana Life Ex-situ Machine) اتتى بىرەگەي قۇرىلعىنىڭ سالتاناتتى تۇساۋكەسەرى ءوتتى. ونى «جۇرەك ورتالىعى» قوعامدىق قورى تاپسىرىس بەرۋشى جانە جوبا ۇيلەستىرۋشىسى رەتىندە ۇيىمداستىردى.
ALEM – بۇل دونورلىق ورگانداردى ۇزاق ۋاقىت تاسىمالداۋعا جانە ونى ادام دەنەسىنەن تىس ەمدەۋگە مۇمكىندىك بەرەتىن قۇرىلعى, قازىرگى ۋاقىتتا ونىڭ تەڭدەسى جوق.
قازاقستاندا ترانسپلانتولوگيا تاريحى باستاۋ العاندا دارىگەرلەر دونورلىق ورگانداردى تاسىمالداۋعا ارنالعان امەريكالىق قۇرىلعىنى پايدالانىپ كەلدى, الايدا ونىڭ مۇمكىندىگى قاجەتتىلىكتەردى وتەمەدى, ال پايدالانۋ تىم قىمباتقا ءتۇستى. وسى ۋاقىتقا دەيىن دونورلىق جۇرەكتى تەك 4-6 ساعات ىشىندە تاسىمالداۋعا بولاتىنىن, كەيىن ونىڭ ترانسپلانتاتسيالاۋعا جارامسىز بولىپ قالاتىنى بۇكىل الەمگە ءمالىم. بىراق ۇلتتىق عىلىمي كارديوحيرۋرگيا ورتالىعىنىڭ دارىگەرلەرى بۇل ماسەلەنىڭ شەشىمىن تاپتى, سونىمەن قاتار الەمدىك رەكورد ورناتتى.
«بۇل – ورگاندى ۇزاق ۋاقىت (24 ساعاتتان استام) ساقتاۋعا مۇمكىندىك بەرەتىن دونورلىق ورگانداردى ساقتاۋ جانە ەمدەۋ جۇيەسى. سايكەسىنشە, وسى ۋاقىت ىشىندە قاجەتتى پروتسەدۋرالاردى نەمەسە وپەراتسيالاردى, مىسالى, جۇرەك ترانسپلانتاتسياسىن نەمەسە وكپە ترانسپلانتاتسياسىن جاساپ ۇلگەرۋگە بولادى. سونداي-اق وسى ۋاقىت ىشىندە ورگاننىڭ ترانسپلانتاتسياعا جارامدىلىعىن انىقتاۋعا مۇمكىندىك بەرەدى» دەپ ءتۇسىندىردى University Medical Center باسقارما توراعاسى, كارديوحيرۋرگ دارىگەر يۋري پيا.
ALEM قۇرىلعىسىنىڭ بولاشاعى جارقىن جانە تەك ترانسپلانتاتسياعا عانا ەمەس, سونىمەن قاتار حيرۋرگياعا, ونكولوگياعا, پەرفۋزيولوگياعا دا كوپ سەپتىگىن تيگىزبەك. مىسالى, وسى قۇرىلعى ارقىلى حيرۋرگتار رەپلانتاتسيا ءۇشىن اۋرۋحاناعا ۇزاق ۋاقىت تاسىمالداناتىن كەسىلىپ الىنعان, جاراقاتتانعان اياق-قولداردى قۇتقارا الادى. يۋري پيانىڭ پىكىرىنشە, قازىرگى ۋاقىتتا الەمدە بۇل قۇرىلعىنىڭ انالوگى جوق, ويتكەنى اپپاراتتىڭ قۇرامىندا ءبىزدىڭ دارىگەرلەر تولىعىمەن ازىرلەگەن بىرەگەي بولىكتەر بار. 2024 جىلى جوبانى اۋقىمدى مىندەتتەر كۇتىپ تۇر, ونىڭ ىشىندە كلينيكالىق زەرتتەۋلەرگە شىعۋ جانە ءوندىرىستى باستاۋ بار.
