پوليتسيا قىزمەتكەرىنىڭ ىشكى ومىرلەرى تۇڭعيىق تا جۇمباق بولىپ سەزىلەدى. الايدا قىزمەتتىك فورماسىن كيىپ, قاشاندا ءار قادامىن اڭدىپ باساتىن بۇل سالانىڭ ماماندارى سىرت كوزگە قاتىگەز كورىنگەنىمەن, ولار دا – جىلى جۇرەك پەن نازىك سەزىمنىڭ يەسى. ساقشىلاردىڭ دا وتباسى, بالا-شاعاسى بار. ءبىر شاڭىراق استىندا, ءبىر قىزمەت سالاسىندا دا بىرگە ءجۇرىپ, «وتان وتباسىنان باستالادى» دەگەن قاعيدانى قاتاڭ ۇستانىپ, جۇپ بولىپ جۇرتقا قىزمەت ەتىپ جۇرگەن ءتارتىپ ساقشىلارىنىڭ قاتارىندا مۇقۇشەۆتار وتباسىن ايرىقشا اتاپ وتۋگە بولادى.
اتالعان وتباسىنىڭ وتاعاسى بولىپ وتىرعان رينات سەرىكۇلى, 1987 جىلى شىعىس قازاقستان وبلىسى كۇرشىم اۋدانى بۋراباي اۋىلىندا دۇنيەگە كەلگەن. ول ءوزىنىڭ بالالىعى تۋرالى ايتقاندا, اۋىل تۋرالى ەسكە الماۋ مۇمكىن ەمەستىگىن ايتادى. سونىمەن قاتار ول ءوزىنىڭ وقۋشى كۇننەن العىر بولعانىن دا جاسىرمادى.
– مەن 1994 جىلى شىعىس قازاقستان وبلىسى كۇرشىم اۋدانى بۋراباي اۋىلىندا ورنالاسقان بۋراباي ورتا مەكتەبىنە 1-سىنىپقا وقۋعا ءتۇسىپ, 3 سىنىپقا دەيىن سوندا وقىدىم. 1997 جىلى وتباسىلىق جاعدايعا بايلانىستى لەنينوگورسك قالاسىنا كوشىپ, سول جەردەگى №15 ورتا مەكتەبىندە وقۋىمدى جالعاستىردىم. 2003 جىلى جوعارىدا اتالعان مەكتەپتى ءبىتىرىپ, سول جىلى ورتا ءبىلىم الۋ ماقساتىندا ريددەر قالاسىنداعى كاسىپتىك-تەحنيكالىق مەكتەپتىڭ 7-باستاۋىش كاسىپتىك وقىتۋ ورتالىعىنا وقۋعا ءتۇستىم. 2007 جىلى ريددەر قالاسىنىڭ قالالىق اسكەري كوميسسارياتى قازاقستان رەسپۋبليكاسىنىڭ قارۋلى كۇشتەرىنە مەرزىمدى قىزمەتكە شاقىرىلىپ, زايسان قالاسىندا ءبىر جىل اسكەري مىندەتىمدى وتەدىم. 2009 جىلى اتالعان قالاداعى نۇرعاليەۆ اتىنداعى گۋمانيتارلىق كوللەدجگە وقۋعا ءتۇسىپ, 2011 جىلى وسى كوللەدجدى قۇقىقتانۋ ماماندىعى بويىنشا ءبىتىردىم. سول جىلى قازاقستان – امەريكا ەركىن ۋنيۆەرسيتەتىنە, زاڭ فاكۋلتەتىنە سىرتتاي وقۋعا قابىلدانىپ, 2014 جىلى اتالعان ۋنيۆەرسيتەتتى ءتامامداپ, 2008 جىلدان باستاپ ريددەر قالاسىنىڭ پوليتسيا دەپارتامەنتىندە, 2023 جىلدىڭ قاڭتار ايىنان باستاپ استانا قالاسى پد پوليتسيا باسقارماسى جەدەل-كريميناليستيكالىق بولىمىندە قىزمەت اتقارىپ كەلەمىن, – دەپ ءوز ءومىرىن جىپكە تىزگەندەي قىلىپ ايتىپ بەرگەن ول قازىرگى كەزدە حالىقتىڭ پوليتسيا قىزمەتكەرلەرىنە دەگەن سەنىمىن نىعايتۋ جولىندا جۇمىس ىستەپ كەلە جاتقانىن ايتادى.
– نەگىزى حالىق ءبىزدى باسقاشا ويلايدى. شىن مانىندە ءبىز دە ادامبىز. مىسالى, مەنىڭ دە تۋىس-تۋعاندارىم, كورشىلەرىم بار. مەن ءوزىم سولارعا جاقسى قارىم-قاتىناس پەن ۇلگى كورسەتۋ ارقىلى پوليتسيانىڭ ەل الدىنداعى ابىروي بەت-بەدەلىن كوتەرۋگە جۇمىس جاساپ ءجۇرمىن دەپ ويلايمىن. ويتكەنى «ۇلتقا قىزمەت ەتۋ بىلىمنەن ەمەس, مىنەزدەن» دەگەن ءاليحان بوكەيحانوۆتىڭ ءسوزى بار. پوليتسەيلەر, ەڭ ءبىرىنشى, حالىققا سول مىنەزى ارقىلى قىزمەت ەتىپ باستاي ءبىلۋى كەرەك دەپ ويلايمىن, – دەيدى ول.
ارينە, «مىقتى جىگىتتىڭ ارتىندا جاقسى ايەل تۇرادى» دەمەكشى, مۇقۇشەۆتار وتباسىنىڭ وشاعىنىڭ وتىن وشىرمەي, بەرەكەسىن كىرگىزىپ وتىرعان ريناتتىڭ اياۋلى جارى رابيعا ەركەبايقىزى دا پوليتسيا قىزمەتكەرى بولىپ جۇمىس ىستەيدى.
جالپى ەرلى-زايىپتىلاردىڭ ەكەۋى دە قۇقىق قورعاۋ ورگاندارىندا 18 جىلدان استام قىزمەت ەتىپ كەلەدى. ولار 2010 جىلى شىعىس قازاقستان وبلىسىنىڭ ريددەر قالاسىندا قىزمەتتە ءجۇرىپ تانىسقان. العاشقى تانىستىقتارىن ەسىنە العان رابيعا مۇقۇشەۆا كۇيەۋىنىڭ باتىلدىعى مەن سىپايىلىعىنا ءتانتى بولعانىن ايتادى.
– قىز بالا ءۇشىن ەڭ اۋەلى وزىنە قورعان كەرەك. ارينە, مەندە پوليتسيا قىزمەتكەرى بولعانىممەن, تابيعاتىم ءبارىبىر نازىكتىكتەن جارالعان. سوندىقتان دا مەن ريناتتى كورگەندە ءبىرىنشى وزىمە قورعان, وتباسىما تىرەۋ بولاتىن ازامات ەكەنىن سەزىندىم. بىراق ءبىز دە بىردەن قول ۇستاسىپ كەتكەن ماحاببات بولعان جوق. «ۇيلەنۋ وڭاي, ءۇي بولۋ قيىن» دەپ اتالارىمىز ايتپاقشى, رينات ەكەۋمىز بولاشاق تاعدىرىمىزدى قوسۋ جولىندا كوپ ويلاندىق. اقىرى ءبىر-بىرىمىزگە سۇيەۋ بولا الاتىنىمىزعا سەنگەن كەزدەن باستاپ باس قۇراۋعا بەل بۋدىق. قازىرگى تاڭدا ەكى بالامىز بار. باقىتتى وتباسىمىز. ەر ازامات ءوز موينىنداعى وتباسىنا دەگەن جاۋاپكەرشىلىگىن تولىقتاي سەزىنگەن كەزدە ۇيدە بەرەكە بولادى دەپ ەسەپتەيمىن. ال رينات ماعان ادال جار, بالالارىما جاقسى اكە بولا ءبىلدى. مەن ونىڭ بويىنداعى قازاقى قاسيەتى مەن ەر-جىگىتكە ءتان مىنەزىن قۇرمەتتەيمىن, – دەيدى رابيعا ەركەبايقىزى.
ءيا, اققۋ مەن قازداي, جۇپتارىن جازباي جۇرگەن قوس پوليتسيا ءۇشىن ءاربىر كۇن ماحاببات, ءاربىر مينۋت ەستەلىك. رابيعا ءوزىنىڭ وتباسى
تۋرالى ويىن ايتا كەلە, شاڭىراقتى شايقالتپاي ۇستاۋدىڭ سىرى نەدە ەكەندىگىنە دە توقتالدى.
– بەرىك وتباسىن قۇرىپ, ونى ۇستاپ تۇرۋدىڭ سىرى – ىستىق ماحاببات پەن ادال سەنىمدە. ءبىز ادەتتە وتباسىنىڭ بەرەكەسى, سول ۇيدەگى سۇيىسپەنشىلىككە بايلانىستى دەپ جاتامىز. مەنىڭشە, ادامدار دا سۇيىسپەنشىلىك بولماسا ۇيلەنبەس ەدى. سوندىقتان شاڭىراق كوتەرگەن جاستارعا سۇيىسپەنشىلىكتەن باسقا, توزىمدىلىك پەن كەشىرىمدىلىك دە اۋاداي قاجەت. ەكى ادام ءبىرىن-ءبىرى تىعىرىققا تىرەمەي تۇسىنگەن كەزدە عانا ول وتباسىندا باقىتتىڭ ساۋلەسى جارقىراي تۇسەدى, – دەيدى ول.
شىنىندا دا باقىت قاجىرلىقپەن قايراتى توعىسقان ەكى ادامنىڭ ەسىگىنەن عانا قارايتىنى انىق. سوندىقتان دا دومبىرانىڭ قوس ىشەگىندەي, تۇيەنىڭ ەكى وركەشىندەي بولىپ ءومىر مەن تۇرمىستى, ماماندىق پەن جۇمىستى بىرگە الىپ جۇرگەن رينات پەن رابيعاداي جاندار قاشاندا ەلدىڭ ەلەۋلىسى, حالىقتىڭ قالاۋلىسى بولا بەرگەي.
شاپاعات ءابدىر
