استانا قالاسى اكىمدىگىنىڭ ەسىل اۋدانى بويىنشا بەلسەندى ۇزاق ءومىر ءسۇرۋ ورتالىعىنىڭ «سىر ساندىق» تانىمدىق ەرىكتىلەر كلۋبى بۇقارالىق اقپارات قۇرالدارى قىزمەتكەرلەرى كۇنىنە وراي «جۋرناليست – جارقىن ىستەر جارشىسى» – ۇرپاقتار ساباقتاستىعى» جوباسى اياسىندا ارداگەر جۋرناليستەر مەن بىرقاتار باق قىزمەتكەرلەرىمەن كەزدەسۋ ۇيىمداستىردى.
قوناقتاردىڭ اراسىندا ارداگەر جۋرناليستەرمەن قاتار قازاق راديوسى, «ەگەمەن قازاقستان», «ايقىن», «استانا اقشامى», «ۆەچەرنيايا استانا» رەسپۋبليكالىق گازەتتەردىڭ, «Bag.kz» اقپارات اگەنتتىگىنىڭ, «Qazaqstan» ۇلتتىق ارناسىنىڭ قىزمەتكەرلەرى بولدى. جۋرناليستەردى قالالىق بەلسەندى ۇزاق ءومىر ءسۇرۋ ورتالىعىنىڭ ديرەكتورى مۇحتار ەركەتاەۆ كاسىبي مەرەكەلەرىمەن قۇتتىقتاپ, ىزگى لەبىزىن جەتكىزدى.
جۋرناليستەرگە ماماندىعىنا قاتىستى ءتۇرلى سۇراقتار قويىلدى. «ۇلى دالا قىراندارى» رەسپۋبليكالىق الەۋمەتتىك-مادەني قوزعالىسى توراعاسىنىڭ ورىنباسارى, قازاقستان جۋرناليستەر وداعىنىڭ مۇشەسى بەيبىتبەك ابدىكارىموۆ جۋرناليستيكاعا كەلگەن جولى تۋرالى ايتىپ بەردى. «استانا اقشامى» گازەتىنىڭ شولۋشىسى ايگۇل ۋايس باس قالا باسىلىمىنىڭ تاريحى مەن باعىتىمەن تانىستىردى. باسىلىمىمىز تۋرالى زەينەتكەر ۇستاز سۇلۋشاش قۇلماليەۆا جىلى پىكىرىن ءبىلدىرىپ, وسى گازەت ۇنەمى وزەكتى ماسەلەلەردى كوتەرەتىنىن ايتىپ, باس رەداكتوردىڭ ورىنباسارى عالىم قوجابەكوۆ پەن شەف-رەداكتور تولەن تىلەۋبايدىڭ ەسىمدەرىن ەرەكشە اتاپ ءوتتى.
«اسىل مۇرا» دومبىراشىلار ءانسامبلى, «ەسىل تولقىندارى» حالىقتىق ارداگەرلەر ءانسامبلى, «ساعىنىش سازى» ۇلتتىق ۆوكالدىق ءانسامبلىنىڭ ءانشىسى سالتانات شامينا كۇمبىرلەگەن كۇيلەر مەن اسەم اندەرمەن قوناقتاردىڭ كوڭىلىن كوتەردى. ورتالىق اتىنان ارداگەر جۋرناليستەر مەن باق قىزمەتكەرلەرىنە العىس حاتتار, ەستەلىك سىيلىقتار تاپسىرىلدى.
