جىل باسىنان بەرى ەلوردادا موپەد جۇرگىزۋشىلەرىنىڭ قاتىسۋىمەن 90 جول-كولىك وقيعاسى تىركەلدى, دەپ حابارلايدى astana-akshamy.kz
بۇل دەگەنىمىز, ەكى اپتادا ءبىر جكو بولىپ تۇرادى دەگەن ءسوز. سول سەبەپتى ءتارتىپ ساقشىلارى بۇل ساناتتاعى جۇرگىزۋشىلەردى ۇدايى نازارىندا ۇستاپ وتىر.
استانا قالاسىنىڭ پوليتسيا قىزمەتكەرلەرى جول-كولىك وقيعالارىن ازايتۋ ماقساتىندا تۇراقتى نەگىزدە موپەدتەر مەن موتوروللەرلەردى قاۋىپسىز جۇرگىزۋ, ولاردىڭ جول قوزعالىسى ەرەجەلەرى تالاپتارىن ساقتاۋى بويىنشا پروفيلاكتيكالىق جانە ءتۇسىندىرۋ جۇمىستارىن جۇرگىزەدى.
جاز مەزگىلى باستالىسىمەن ەلوردا جولدارىندا اتالعان كولىكتەردى باسقارىپ, جول ەرەجەسىن ورەسكەل بۇزىپ, جول-كولىك وقيعاسىنا ءجيى ۇشىرايتىن جۇرگىزۋشىلەر كەزدەسىپ جاتادى. ماسەلەن “قۇقىقتىق ءتارتىپ” جەدەل-پروفيلاكتيكالىق ءىس-شاراسى بارىسىندا ءبىر تاۋلىكتە جول ەرەجەسىن بۇزعاندار ءۇشىن كوممۋنالدىق تۇراققا 92 موپەد قويىلعان.
جىل باسىنان موپەد جۇرگىزۋشىلەرىنىڭ قاتىسۋىمەن 90 جول-كولىك وقيعاسى تىركەلىپ, 22 ادام ءارتۇرلى اۋىرلىقتاعى دەنە جاراقاتتارىمەن اۋرۋحاناعا جەتكىزىلىپ, العان جاراقاتتان 1 ادام قايتىس بولعان. سونداي-اق ەلەكتروسكۋتەر جۇرگىزۋشىلەرىنىڭ قاتىسۋىمەن 9 جول-كولىك وقيعاسى تىركەلگەن.
ەستەرىڭىزگە سالا كەتەيىك, ەلوردادا 20-30 ماۋسىم ارالىعىندا قوعامدىق ءتارتىپتى ءتيىستى دەڭگەيدە ساقتاۋ ماقساتىندا “قۇقىقتىق ءتارتىپ” جەدەل-پروفيلاكتيكالىق ءىس-شاراسى جۇرگىزىلىپ جاتىر.
