وتكەن سەنبى كۇنى ءازىربايجان مامبەتوۆ اتىنداعى مەملەكەتتىك دراما جانە كومەديا تەاترىنىڭ VI ماۋسىمى «بوراندى بەكەت» دراماسىمەن اشىلدى. ايگىلى قالامگەر شىڭعىس ايتماتوۆتىڭ شوقتىعى بيىك بۇل تۋىندىسىن قازاقستاننىڭ حالىق جازۋشىسى, مەملەكەتتىك سىيلىقتىڭ لاۋرەاتى شەرحان مۇرتازا قازاقشالاعان. قويۋشى رەجيسسەرى – ۇلانمىرزا قارىپباەۆ. سۋرەتشى – الان سايمين.
شىڭعىس ايتماتوۆقا كسرو مەملەكەتتىك سىيلىعى ءۇش رەت بەرىلسە, سونىڭ سوڭعىسىن ول وسىدان تۋرا قىرىق جىل بۇرىن ءدال وسى «بوراندى بەكەت» رومانى ءۇشىن الدى. اتالمىش تۋىندىنىڭ پرەمەراسى ءازىربايجان مامبەتوۆ تەاترىندا بىلتىرعى ءساۋىر ايىندا ءوتىپ, ساحنا ساڭلاعىنىڭ 90 جىلدىعىنا ارنالدى. بۇل بەكەر ەمەس, سەبەبى مامبەتوۆ اتالعان روماندى ساحنالاعان رەجيسسەردىڭ ءبىرى. تەاتر رەفورماتورىنىڭ قولتاڭباسىنداعى سپەكتاكل «عاسىردان دا ۇزاق كۇن» اتاۋىمەن قاللەكي تەاترىنىڭ رەپەرتۋارىنان جيىرما جىل بويى تۇسپەي كەلە جاتىر.
وتكەن جىلى استانا قالاسى اكىمدىگىنىڭ قولداۋىمەن ۇيىمداستىرىلعان «TeatrALL» ءىى حالىقارالىق تەاتر فەستيۆالى ءازىربايجان مامبەتوۆتىڭ مەرەيتويىنا ارنالدى. وعان ونىڭ اتىنداعى ونەر وشاعى «بوراندى بەكەتپەن» قاتىستى. سپەكتالدى ساحنالاعان ۇلانمىرزا قارىپباەۆ سوندا مامبەتوۆ اتىنداعى ارنايى سىيلىقپەن ماراپاتتالدى. جاس رەجيسسەر سپەكتاكلدە بىرنەشە سيۋجەتتىك لينيانى قامتىدى. درامانىڭ باس كەيىپكەرى ەدىگە بولسا, ايتماتوۆتىڭ تاعى ءبىر كەيىپكەرى قازانعاپتىڭ بەينەسىن اشۋعا تىرىستى. سونىڭ ىشىندە ونىڭ اماناتىنا ەرەكشە كوڭىل بولگەن.
بيىل – اقان سەرى قورامساۇلىنىڭ تۋعانىنا 180 جىل. سوعان وراي ءازىربايجان مامبەتوۆ اتىنداعى مەملەكەتتىك دراما جانە كومەديا تەاترى وسى ماۋسىمدا ءان ءدۇلدۇلى تۋرالى سپەكتاكل ۇسىنباق. اتالمىش قويىلىم قازاقستاننىڭ حالىق جازۋشىسى, مەملەكەتتىك سىيلىقتىڭ لاۋرەاتى ساكەن ءجۇنىسوۆتىڭ «اقان سەرى» رومانى جەلىسىمەن ساحنالانادى. قويۋشى رەجيسسەرى – ۇلانمىرزا قارىپباەۆ. جاڭا تۋىندىنىڭ پرەمەراسى جەلتوقسان ايىنا جوسپارلانىپ وتىر.
