استانا قالاسى اكىمدىگىنىڭ ءباسپاسوز ورتالىعىندا وتكەن ونلاين بريفينگتە اپاتتى ۇيلەردىڭ تۇرعىندارىن كوشىرۋ ماسەلەسى تالقىلاندى.
الدىمەن ءسوز العان تۇرعىن ءۇي جانە تۇرعىن ءۇي ينسپەكتسياسى باسقارماسىنىڭ ءبولىم باسشىسى تولەگەن احمەتوۆ «نۇرلى جەر» تۇرعىن ءۇي-كوممۋنالدىق دامىتۋدىڭ 2020-2025 جىلدارعا ارنالعان مەملەكەتتىك باعدارلاماسىنا سايكەس, ەلوردادا تۇرعىن ءۇي قورىن رەنوۆاتسيالاۋ جوباسىنىڭ ىسكە اسىرىلىپ جاتقانىن جەتكىزدى. ءبولىم باسشىسىنىڭ مالىمدەۋىنشە, جوبانىڭ ءبىرىنشى كەزەڭى 2013-2017 جىلدار ارالىعىندا ءوتتى, ونىڭ بارىسىندا 228 اپاتتى ءۇي بۇزىلىپ, 3400-دەن استام وتباسى جاڭا دا جايلى تۇرعىن ءۇي الدى.
2018 جىلدان باستاپ 2022 جىلعا دەيىنگى كەزەڭگە ەسەپتەلگەن ەكىنشى كەزەڭدى ىسكە اسىرۋ شەڭبەرىندە 1082 پاتەرلى 56 اپاتتى ءۇيدىڭ تۇرعىندارىن كوشىرۋ جوسپارلانعان. ال 2018 جىلى 86 پاتەرلى 9 اپاتتى جاعدايداعى ءۇيدىڭ تۇرعىندارى جاڭا قونىستارىنا كوشتى.
– 2019 جىلى 197 پاتەرلى 16 اپاتتى ءۇيدىڭ تۇرعىندارى ابىلاي حان داڭعىلى مەن «ارتەم» بازارى اۋدانىندا ورنالاسقان كوپپاتەرلى تۇرعىن ءۇي كەشەنىنە كوشىرىلدى. 2020 جىلى 209 پاتەرلى 5 اپاتتى ءۇيدىڭ تۇرعىندارى قاراساي باتىر كوشەسى مەن قورداي كوشەسىندە ورنالاسقان تۇرعىن ءۇي كەشەنىنە قونىستاندى. بىلتىر ەلوردادا 257 پاتەرلىك 8 اپاتتى ءۇيدىڭ تۇرعىندارى ابىلاي حان داڭعىلى مەن قاراساي باتىر كوشەسىنىڭ بويىنداعى جاڭا ۇيلەرگە كوشىرىلدى, – دەدى
ت.احمەتوۆ.
قازىرگى ۋاقىتتا اتالعان ۇيلەردى فيزيكالىق بۇزۋ بويىنشا جۇمىس جۇرگىزىلىپ جاتىر. 2018-2021 جىلدارى بارلىعى 749 پاتەرلىك 38 ءۇيدىڭ تۇرعىندارى كوشىرىلدى. ال اعىمداعى جىلى استانادا 333 پاتەرگە 18 اپاتتى ءۇيدىڭ تۇرعىندارىن كوشىرۋ جوسپارلانىپ وتىر. قالا اۋداندارى اكىمدەرىنىڭ اپپاراتتارىمەن بىرلەسىپ, 2023-2027 جىلدارعا ارنالعان بۇزۋ جوسپارى قۇرىلدى.
«قالالىق جىلجىمايتىن مۇلىك» مكك-ءنىڭ ديرەكتورى الەكساندر ستروچكوۆتىڭ ايتۋىنشا, بيىلعى 8 اي ىشىندە 39 الەۋمەتتىك نىساننىڭ قۇرىلىسى ءۇشىن 343 مەنشىك يەسىنەن جالپى اۋدانى 42,7 گا قۇرايتىن جەر ۋچاسكەسى الىندى. تولەنگەن وتەماقىنىڭ جالپى سوماسى 8,5 ملرد تەڭگەنى قۇرادى.
سونىمەن بىرگە جالپى اۋدانى 14,41 گا قۇرايتىن جەر ۋچاسكەلەرىن الۋ بويىنشا جۇمىس جۇرگىزىلىپ, مەنشىك يەلەرىنە الىناتىن جەر ۋچاسكەلەرىنىڭ ورنىنا نارىقتىق قۇنى بىردەي جەر ۋچاسكەلەرى ۇسىنىلدى. بۇل بيۋدجەت شىعىندارىن 4 ملرد تەڭگەدەن ارتىق سوماعا ۇنەمدەۋگە مۇمكىندىك بەردى.
– بۇگىنگى تاڭدا استانا قالاسى اكىمدىگىنىڭ قاۋلىلارى شەڭبەرىندە 86 تۇرعىن ءۇي ساتىپ الىندى. سونىمەن قاتار اپاتتى تۇرعىن ۇيلەرگە جانە ۆل 110 كۆ كابەل كانالىن جۇرگىزۋ ءۇشىن بۇزۋعا جاتاتىن ۇيلەرگە باعالاۋ جاساۋ بويىنشا جۇمىس جۇرگىزىلۋدە. قالعان جىلجىمايتىن مۇلىك نىساندارىن ساتىپ الۋ قۇنى شامامەن 10,5 ملرد تەڭگە قۇرايدى, – دەدى ا.ستروچكوۆ.
سونداي-اق اعىمداعى جىلدىڭ 10 تامىزىندا استانا قالاسىنىڭ كولىك جانە جول-كولىك ينفراقۇرىلىمىن دامىتۋ باسقارماسىنا ءبيشى قايىڭ تۇيىق كوشەسى, سىرداريا جانە ش.جيەنقۇلوۆا كوشەلەرىن كەڭەيتۋ ءۇشىن جەر ۋچاسكەلەرى بەرىلدى. اكىمدىكتىڭ جەر ۋچاسكەلەرىن مەملەكەت مۇقتاجى ءۇشىن ماجبۇرلەپ يەلىكتەن شىعارۋ تۋرالى قاۋلى قابىلدانىپ, قارجىلاندىرۋ بولىنگەن جاعدايدا, باسقارما وسى كوشەلەردى كەڭەيتۋ شەگىنە تۇسەتىن تۇرعىن ۇيلەردى ساتىپ الۋ جانە بۇزۋ جۇمىسىن باستايدى.
