ەلوردادا بۇزۋدى تالاپ ەتەتىن 206 ءۇي, ونىڭ ىشىندە 18 اپاتتى جاتاقحانا بار. ولار 2029 جىلعا دەيىن سۇرىلەتىن بولادى. وسىعان بايلانىستى قازىرگى ۋاقىتتا 2023-2029 جىلدارى بۇزۋعا جاتاتىن 4710 پاتەرگە ارنالعان 206 اپاتتى ءۇيدىڭ تىزبەسى قالىپتاستى. سۇرىلەتىن ۇيلەردىڭ تىزبەسى تۋرالى اقپارات اكىمدىكتىڭ رەسمي سايتىندا جاريالانعان.
استانا اكىمىنىڭ قالا تۇرعىندارىمەن بولعان كەزدەسۋلەرىندە ءجيى كوتەرىلەتىن وزەكتى پروبلەمانىڭ ءبىرى – وسى اپاتتى ۇيلەر پروبلەماسى. اسىرەسە ەلوردادان سىرتقارى ورنالاسقان ەلدى مەكەندەردە بۇل ماسەلە «كۇيىپ» تۇر.
اسەم شاھاردىڭ قاق ورتاسىندا قالانىڭ سيقىن بۇزىپ, ءسانىن كەتىرىپ تۇرعان وسىنداي توزىعى جەتكەن ەسكى ۇيلەردىڭ قاشان سۇرىلەتىنى جەرگىلىكتى جۇرتشىلىقتى ءجيى الاڭداتادى. سەبەبى مۇنداي ۇيلەردىڭ قالا كوركىنە نۇقسان كەلتىرىپ قانا قويماي, تۇرعىنداردىڭ ومىرىنە قاۋىپتى ەكەنى دە شىندىق.
قالا اكىمىنىڭ ايتۋىنشا, سوڭعى ءتورت جىلدا باس قالاداعى 38 ءۇيدىڭ تۇرعىنى جاڭا قونىسقا كوشىرىلىپ, توزىعى جەتكەن ەسكى ۇيلەر ءسۇرىلدى. دەگەنمەن استانادا اپاتتى ۇيلەردىڭ قاتارى ازايماي وتىر. بۇل باعىتتا «ەلوردا دامۋ» باعدارلاماسى جۇزەگە اسىرىلىپ جاتىر.
بۇگىندە باس قالادا بۇزۋدى تالاپ ەتەتىن 206 ءۇي, ونىڭ ىشىندە 18 اپاتتى جاتاقحانا بار. ولاردىڭ بارلىعىن 2029 جىلعا دەيىن ءسۇرىپ, تۇرعىندارىن جاڭا ۇيمەن قامتاماسىز ەتۋ كوزدەلىپ وتىر
– اتالعان باعدارلاما ىسكە قوسىلعان ساتتەن باستاپ بارلىعى 4200 وتباسى بۇزۋدى تالاپ ەتەتىن ەسكى ۇيلەردەن كوشىرىلدى. 2030 جىلعا دەيىن اپاتتى جاعدايداعى 4,5 مىڭعا جۋىق پاتەردى ءسۇرۋ كوزدەلىپ وتىر. بيىل وسىنداي ءۇي تۇرعىندارىنا 300-400 پاتەر پايدالانۋعا بەرىلەدى. الداعى ۋاقىتتا جىل سايىن 700-گە جۋىق پاتەر بەرۋ جوسپارلانۋدا, – دەدى جەڭىس قاسىمبەك ەلدى مەكەن تۇرعىندارىمەن بولعان كەزدەسۋلەردىڭ بىرىندە.
توزىعى جەتكەن ەسكى ۇيلەر قالانىڭ بارلىق اۋدانىندا بار. وتكەن عاسىردىڭ 50-60-جىلدارىندا سالىنعان مۇنداي باسپانالاردىڭ كەيبىرىنىڭ قابىرعالارى قۇلاپ, اينەكتەرى سىنىپ, ءىشى كوك ساسىپ, ادام تۇرۋعا جارامسىز بوپ قالعان. سۋمەن جانە ەلەكترمەن جابدىقتاۋدا دا پروبلەمالارى بار, شاتىرىنان سۋ اعىپ تۇرعان ۇيلەردە تۇرۋدىڭ ءوزى ءبىر قيامەت. استاناداعى اپاتتى ۇيلەردىڭ بىرىندە تۇرىپ جاتقان ەلوردالىق بالكۇمىس قۋاتقىزىنىڭ پىكىرىنشە, مۇنداي ۇيلەردىڭ يەلەرى كوبىنە جىلجىمايتىن مۇلكىن ايلىعى شايلىعىنان اسپايتىن, ورتالىقتان پاتەر جالداۋعا شاماسى جوق, جاعدايى تومەن وتباسىلارعا جالعا بەرىپ, وزدەرى قالانىڭ باسقا بۇرىشىنان پاتەر تاۋىپ الادى ەكەن.
«بۇل ۇيلەردە كوبىنە پاتەر جالداۋشىلار تۇرادى. سىز تارتقان بولمەلەر قىسى-جازى ءبىر جىلىمايدى, ونىڭ ۇستىنە ۇيدە ورتالىقتان كەلەتىن سۋ دا, جىلۋ دا جوق. ەسەسىنە مۇنداعى پاتەر قۇنى الدەقايدا ارزان. سوندىقتان وسىنداي ۇيدە تۇرعان بىزگە الدەقايدا ءتيىمدى» دەدى ب.قۋاتقىزى.
جالپى جوسپار بويىنشا 2029 جىلعا دەيىن رەسپۋبليكا بويىنشا 1,5 مىڭ ءۇي بۇزىلۋى ءتيىس. ال ونداعى 40 مىڭعا جۋىق تۇرعىن جاڭا ۇيمەن قامتاماسىز ەتىلەدى. مامانداردىڭ مالىمدەۋىنشە, 2022 جىلى رەسپۋبليكا بويىنشا 114 ءۇي سۇرىلگەن
ال اكىمدىكتەگىلەر اپاتتى ۇيلەردىڭ تۇرعىندارى ءۇشىن الداعى ءۇش جىلدا 3000-عا جۋىق جاڭا پاتەر سالىناتىنىن العا تارتىپ وتىر. ماسەلەن, چەحوەۆ كوشەسىندەگى №3 جانە №1 ۇيلەردىڭ كارىز جۇيەسى جۇمىس ىستەمەيدى. باراك تيپتەس وسى ۇيلەردىڭ ءبىر بولىگى 2024 جىلى بۇزىلاتىن نىساندار تىزىمىنە ەنگىزىلمەكشى. سونداي-اق سارىارقا اۋدانىنىڭ اگروقالاشىق ەلدى مەكەنىندە كەلەسى جىلى توزىعى جەتكەن ءۇش ءۇيدى بۇزۋ جوسپارلانىپ وتىر جانە الداعى ءۇش جىلدا وسىنداي ەسكى ۇيلەردىڭ تۇرعىندارى ءۇشىن 2,5-3 مىڭعا جۋىق پاتەر سالۋ كوزدەلىپ وتىر. وزگە دە اپاتتى ۇيلەر بويىنشا ءتىزىم قالا اكىمدىگىنىڭ رەسمي سايتىندا ۇنەمى جاڭارتىلىپ وتىرادى.
– بايقوڭىر اۋدانىندا جوعارى ۆولتتى ەلەكتر بەرۋ جەلىلەرىنىڭ استىندا ورنالاسقان ۇيلەر بار. ولار كۇلتەگىن, اسان قايعى, سىرداريا جانە لەرمونتوۆ كوشەلەرىندە ورنالاسقان. وتكەن جىلى بۇل ۇيلەردىڭ ءبىر بولىگى ساتىپ الىنعان بولاتىن. بيىل دا جۇيەلى تۇردە ۋچاسكەلەردى ساتىپ الۋ, ۇيلەردى بۇزۋ جۇمىسى جالعاسادى. وسىلايشا, تۇرعىندار ۇزاق جىلدان كەيىن جاڭا قونىسقا كوشىپ, دەنساۋلىعىنا الاڭدامايدى. باعدارلاما نەگىزىندە كەلەشەكتە بۇل جەكە سەكتوردىڭ ورنىنا الەۋمەتتىك نىساندار, جاڭا تۇرعىن ءۇي كەشەندەرى مەن قوعامدىق كەڭىستىكتەر پايدا بولادى, – دەدى قالا باسشىسى.
بۇگىندە باس قالادا بۇزۋدى تالاپ ەتەتىن 206 ءۇي, ونىڭ ىشىندە 18 اپاتتى جاتاقحانا بار. ولاردىڭ بارلىعىن 2029 جىلعا دەيىن ءسۇرىپ, تۇرعىندارىن جاڭا ۇيمەن قامتاماسىز ەتۋ كوزدەلىپ وتىر.
جالپى جوسپار بويىنشا 2029 جىلعا دەيىن رەسپۋبليكا بويىنشا 1,5 مىڭ ءۇي بۇزىلۋى ءتيىس. ال ونداعى 40 مىڭعا جۋىق تۇرعىن جاڭا ۇيمەن قامتاماسىز ەتىلەدى. مامانداردىڭ ءمالىمدەۋىنشە, 2022 جىلى رەسپۋبليكا بويىنشا 114 ءۇي سۇرىلگەن.
ءيا, اپاتتى ۇيلەردى ازايتۋ – الداعى كۇننىڭ ماڭىزدى مىندەتى. سول سەبەپتى مەملەكەت باسشىسى ەلوردالىقتاردىڭ تۇرعىن ءۇي جاعدايىن جاقسارتۋ ءۇشىن ءتيىستى مەكەمە باسشىلارىنا تاپسىرما بەرگەن بولاتىن. بۇگىندە جۇكتەلگەن مىندەت جوسپار بويىنشا جۇزەگە اسىپ, تۇرعىن ءۇي كەشەندەرىن جوندەۋ, ليفتتەردى اۋىستىرۋ, جەڭىلدەتىلگەن الەۋمەتتىك تۇرعىن ءۇي سالۋ, ۇزاققا سوزىلعان قۇرىلىستاردى اياقتاۋ جۇمىسى ءتيىمدى ناتيجە بەرىپ وتىر. تۇرعىن ءۇي-كوممۋنالدىق ينفراقۇرىلىمدى دامىتۋدىڭ 2026 جىلعا دەيىنگى تۇجىرىمداماسىنا سايكەس, استانا قالاسىندا تۇرعىن ءۇي قورىن جاڭارتۋ, اپاتتى ەسكى تۇرعىن ۇيلەردى بۇزۋ جوباسى ىسكە اسۋدا.
