ەلوردادا «Silk Way Creative Games» XIV ۇلتتىق دەلفي ويىندارى اشىلدى. استانا قالاسىنىڭ اكىمدىگى مەن ۇلتتىق دەلفي كوميتەتى بىرلەسىپ ۇيىمداستىرعان اۋقىمدى شارا 17 قىركۇيەككە دەيىن جالعاسادى. اشىلۋ سالتاناتىنا قوعام جانە مادەنيەت قايراتكەرلەرى, پارلامەنت دەپۋتاتتارى قاتىستى.
– ۇلتتىق دەلفي ويىندارى – مادەني مۇرانى ساقتاۋدىڭ, جاس تالانتتاردى ىزدەۋدىڭ جانە قولداۋدىڭ, جاس ۇرپاقتى ەستەتيكالىق تاربيەلەۋدىڭ, جەكە تۇلعانىڭ رۋحاني قالىپتاسۋىنا كومەكتەسەتىن مادەنيەتارالىق ديالوگ پەن مادەني دامۋدىڭ ءتيىمدى قۇرالى, جاس ونەرپازداردىڭ كەشەندى جارىستارى, – دەيدى استانا قالاسى مادەنيەت باسقارماسىنىڭ مادەنيەت جانە ونەردى دامىتۋ ءبولىمىنىڭ باسشىسى اقەركە جۇمانباەۆا.
ونىڭ ايتۋىنشا, بيىلعى 30 ءساۋىر مەن 5 قىركۇيەك ارالىعىندا ۇلتتىق دەلفي كوميتەتى وڭىرلىك ىرىكتەۋ تۋرلارىن وتكىزدى. ونىڭ قورىتىندىسىندا ءار وبلىستىڭ ۇزدىكتەرى انىقتالىپ, وڭىرلىك قۇرامالار جاساقتالدى. وسى جىلى ۇلتتىق دەلفي ويىندارى ەلىمىزدە 14-رەت ءوتىپ جاتىر, ال استانا بۇل اۋقىمدى مادەني شارانى 4-رەت ۇيىمداستىردى. بيىل وعان ەلىمىزدىڭ بارلىق وبلىسى مەن رەسپۋبليكالىق ماڭىزى بار قالالاردان 500 جاس ونەرپاز قاتىسىپ جاتىر. ويىندار 10-15 جانە 16-25 جاس ارالىعىنداعى ونەرپازدار اراسىندا 14 اتالىم بويىنشا ۇيىمداستىرىلدى. اتاپ ايتقاندا, فورتەپيانو, سكريپكا, اكادەميالىق ءان ايتۋ, حالىق اسپاپتارى, حالىق ءانى, حالىق ءبيى, زاماناۋي بي, فوتوگرافيا, كيىم ديزاينى, كوركەم وقۋ, تەاتر ونەرى, بەينەلەۋ ونەرى, ساندىك-قولدانبالى ونەر, ىم-يشارا تىلىندە ءان ايتۋ. كورنەكتى مادەنيەت قايراتكەرلەرىنەن قۇرالعان قازىلار القاسىنىڭ قۇرامىندا 50-گە تارتا ادام بار. ويىندار جەڭىمپازدارى بيىلعى 6-10 قازاندا بىشكەك قالاسىندا وتەتىن حالىقارالىق دەلفي ويىندارىندا ەلىمىزدىڭ نامىسىن قورعايدى. وسىنداي حالىقارالىق ويىندار استانادا 2006 جانە 2012 جىلدارى وتكەن.
ۇلتتىق دەلفي ويىندارى – مادەني شارا عانا ەمەس, الەۋمەتتىك جوبا. ماسەلەن, بيىلعى بايقاۋدىڭ ءبىر ەرەكشەلىگى, ەرەكشە قاجەتتىلىگى بار بالالار مەن جاسوسپىرىمدەر ءۇشىن ىم-يشارا تىلىندە ءان ايتۋ اتالىمى قوسىلدى. وعان ەلىمىزدىڭ جەتى وڭىرىنەن 25 ادام قاتىسىپ جاتىر.
ونەرپازداردىڭ سايىستارىن جەكسەنبى كۇنىنە دەيىن جاستار سارايىنان, ەركەعالي راحماديەۆ اتىنداعى مەملەكەتتىك اكادەميالىق فيلارمونيانىڭ كونتسەرت زالىنان, م.وتەمىسۇلى اتىنداعى جانە ءال-فارابي اتىنداعى وقۋشىلار سارايىنان تاماشالاۋعا بولادى.
ۇلتتىق دەلفي كوميتەتىنىڭ ديرەكتورى قۇرالاي تۇسپەكوۆانىڭ ايتۋىنشا, اتالمىش ۇيىم الەۋمەتتىك ورتاعا تالداۋ جۇرگىزىپ, ەلدەگى جاڭا مادەني ۇردىستەردى ەنگىزۋمەن اينالىسادى. سول ءۇشىن ويىندار قارساڭىندا كونفەرەنتسيا وتكىزىلىپ, وندا جوسپارلار تالقىلانىپ, جەتىستىكتەر ايتىلادى. بيىل ستراتەگيالىق سەسسيا ۇيىمداستىرىلىپ, وندا «ادال ازامات» يدەياسى تالقىلاندى.
– پرەزيدەنتتىڭ بۇل تاماشا باستاماسىنىڭ قوعامدا قابىلدانىپ, جۇزەگە اسۋىن قالار ەدىك. بۇل ءۇشىن ناقتى قادامدار جاساۋعا تىرىسامىز. ستراتەگيالىق سەسسيانىڭ مىندەتى – مادەنيەت قايراتكەرلەرى مەن مەملەكەتتىك ورگاندارمەن بىرلەسكەن كۇش-جىگەردىڭ ارقاسىندا «ادال ازامات» قاسيەتتەرىنە يە قازاقستاندىقتى كورە الاتىنداي بىرلەسكەن ۇسىنىستار ازىرلەۋ, – دەدى قۇرالاي تۇسپەكوۆا.
