استانا قالاسىنىڭ اكىمى جەڭىس قاسىمبەك جاڭادان سالىنىپ جاتقان مەكتەپتەر تۋرالى ايتتى.
– قالادا 14 مەكتەپتىڭ قۇرىلىسى ءجۇرىپ جاتىر, ونىڭ 11-ءىن كەلەسى وقۋ جىلىندا اشۋدى جوسپارلاپ وتىرمىز. بىرقاتار مەكتەپتىڭ قۇرىلىس بارىسىمەن تانىستىم. ولار قاراساي باتىر مەن بۇلانتى كوشەلەرىنىڭ قيىلىسىندا, كوكسەڭگىر كوشەسىنىڭ بويىندا, ۇلى دالا داڭعىلى مەن ساۋران كوشەسىنىڭ قيىلىسىندا, تۇران داڭعىلىنىڭ بويىندا, تۇران داڭعىلى مەن №24 كوشەنىڭ قيىلىسىندا ورنالاسقان. ماسەلەن, قاراساي باتىر مەن بۇلانتى كوشەلەرىنىڭ قيىلىسىنداعى ءبىلىم ورداسى 87 جىل بۇرىن سالىنعان ەسكى مەكتەپتى الماستىرۋعا مۇمكىندىك بەرەدى. جاڭا وقۋ ورنى ەكى اۋىسىمدا 2400 وقۋشى ورنىنا ەسەپتەلەتىن بولادى, – دەدى قالا اكىمى.
سونىمەن قاتار قالا اكىمى اپاتتى دەپ تانىلعان مەكتەپتەردىڭ ورنىنا جاڭا ءبىلىم ورداسى سالىنىپ جاتقانىن جەتكىزدى. «كوكسەڭگىر كوشەسىندەگى مەكتەپ (كيرپيچنىي ەلدى مەكەنى) وسىعان دەيىن اپاتتى دەپ تانىلعان, قازىر بۇل مەكتەپتىڭ ورنىندا جاڭا وقۋ ورنىنىڭ قۇرىلىسى ءجۇرىپ جاتىر. قازىر بۇل ەلدى مەكەندە باسقا مەكتەپ جوق, سول سەبەپتى وقۋشىلار وزگە اۋداندارعا قاتىناپ وقيدى. سونداي-اق تۇران داڭعىلى مەن №24 كوشەنىڭ قيىلىسىنداعى جانە ۇلى دالا داڭعىلى مەن ساۋران كوشەسىنىڭ قيىلىسىنداعى ءبىلىم وشاقتارى №85 مەكتەپ-ليتسەيىنىڭ جانە №89 مەكتەپ-ليتسەيىنىڭ ءۇش اۋىسىمدى پروبلەماسىن شەشۋگە مۇمكىندىك بەرەدى. بۇل مەكتەپتەردىڭ ارقايسىسى ەكى اۋىسىمدا 2400 وقۋشىعا ارنالعان. بۇدان بولەك, مەملەكەت باسشىسىنىڭ تاپسىرماسى بويىنشا الداعى ەكى جىلدا استانادا «جايلى مەكتەپ» جوباسى اياسىندا 24 مەكتەپ سالىنادى» دەپ جازدى ەلوردا اكىمى.
