باس قالانىڭ اقمولا وبلىسىمەن شەكتەسەتىن اۋداندارىندا بىرقاتار ماسەلە بار. ولار بىرتىندەپ شەشىلۋدە. استانا قالاسى ءماسليحاتى مەن اقمولا وبلىسى دەپۋتاتتارىنىڭ بىرلەسكەن وتىرىسىندا وسى ماسەلەلەر كەڭىنەن تالقىلاندى.
بۇل رەتتە ءماسليحات توراعاسى ەرلان كاناليموۆ وتىرىستا قالا ماڭىنداعى ايماقتاردى دامىتۋ, ينفراقۇرىلىمدى جاقسارتۋ جانە جەتىلدىرۋ ماسەلەلەرى قوزعالعانىن ايتا كەلە, اسىرەسە ەلورداعا جاقىن جەردە ورنالاسقان ارشالى ەلدى مەكەنىنىڭ تۇرعىندارى قوعامدىق كولىك قاتىناسىن دامىتۋدى قالايتىنىن ءوزىنىڭ الەۋمەتتىك جەلىدەگى پاراقشاسىندا جازدى.
– اقمولا وبلىسىنىڭ دەپۋتاتتارىمەن بىرلەسكەن وتىرىستا اقمولا وبلىسىنىڭ استانامەن شەكتەسەتىن اۋداندارىنىڭ بىرقاتار ماسەلەسى كوتەرىلدى. بىرىنشىدەن, بۇل – ءارتۇرلى سالاداعى قالا ماڭىنداعى ايماقتاردى, ينفراقۇرىلىمدى دامىتۋ جانە جەتىلدىرۋ. سونداي-اق جيىندا قوعامدىق كولىكتىڭ جۇمىسىنا قاتىستى دا سۇراق قويىلدى. مىسالى, ارشالى تۇرعىندارى اۆتوبۋستاردىڭ ىسكە قوسىلۋىن سۇرايدى. سونىمەن بىرگە جەر ۋچاسكەلەرىن تىركەۋ ماسەلەلەرىن وڭايلاتۋ, ەسىل وزەنىن بىرلەسىپ تازارتۋ, قتق ستيحيالىق ۇيىندىلەرىن جويۋ ماسەلەلەرىن شەشۋ, جۇمىسقا ورنالاستىرۋ جانە تاعى باسقا ماسەلەلەر تالقىعا ءتۇستى, – دەدى ەرلان كاناليموۆ.
حالىق قالاۋلىلارىنىڭ بىرلەسكەن وتىرىسىندا اۋماقتىق رەسۋرستاردى وڭتايلاندىرۋ, اباتتاندىرۋ جانە كوگالداندىرۋ جۇمىستارىنىڭ دا جۇيەلى جۇرگىزىلىپ كەلە جاتقانى ءسوز بولدى. وسىعان وراي, استانا قالاسى مەن اقمولا وبلىسىنىڭ ءماسليحات دەپۋتاتتارى الداعى جوسپارلارىن بىرلەسىپ ازىرلەۋ تۋرالى كەلىسىمگە كەلدى.
– اقمولا اەك ەلەكترمەن جابدىقتاۋدى جاقسارتۋ, جەرلەۋدى اباتتاندىرۋ ماسەلەسى وزەكتى بولىپ قالا بەرەدى. كەلەسى بىرلەسكەن كەڭەستى اكك جانە مەملەكەتتىك ورگاندار وكىلدەرىنىڭ قاتىسۋىمەن وتكىزەمىز, – دەدى ەرلان كاناليموۆ.
اقمولا وبلىسىنىڭ باس قالامەن شەكتەسەتىن اۋداندارىنىڭ ماسەلەلەرىن تالقىلاۋعا قاتىستى بىرلەسكەن وتىرىستار الداعى ۋاقىتتا جالعاسادى.
