استانا قالاسىنىڭ بايقوڭىر اۋدانىنداعى ەڭ ۇلكەن ساياباق – 2004 جىلى سالىنعان «اتاتۇرىك» ساياباعى. ول قاراوتكەل كوپىرىنىڭ جاعاسىندا ورنالاسقان.
اۋدانى 6,5 گەكتار جەردى الىپ جاتقان ساياباقتا جاسىل جەلەكتىڭ كوپتەگەن ءتۇرى بار. وتكەن جىلى ويىن الاڭدارى مەن ۆوركاۋت ايماعى, كونكي الاڭى, سونداي-اق تۇرعىنداردىڭ تىلەگىن ەسكەرە وتىرىپ, يوگا الاڭى سالىنىپ, ۆەلوجول جابدىقتالدى.
جاقىندا جالپى اۋدانى 17000 شارشى مەتردەن اساتىن ەسكى توسەنىش اۋىستىرىلىپ, ساياباق اۋماعى اباتتاندىرىلدى. سونداي-اق بۇرىن تۇرعان «اركاداعى مەبيۋس» قۇرىلىمى قايتا جانداندىرىلىپ, جارىقتاندىرۋ جۇمىسى جۇرگىزىلدى.
«اتاتۇرىك» ساياباعى ءوزىنىڭ جايلى جانە «جاسىل» اتموسفەراسىمەن تانىمال. بۇگىندە مۇندا ساياباقتىڭ باستى شىرشاسىنىڭ اينالاسىندا اتكەنشەكتەر مەن ورىندىقتارى بار شاتىردىڭ استىندا جاڭا بالالار ويىن الاڭى پايدا بولدى. سونىمەن قاتار XIII عاسىرداعى تۇرىك اقىنى, تۇرىك پوەزياسىنىڭ نەگىزىن قالاۋشى جانە سوپىلىق ءىلىمنىڭ وكىلى يۋنۋس ەمرەگە ارناپ ەسكەرتكىش ورناتىلعان. ونىڭ تۇرىك ادەبيەتىنە قوسقان ۇلەسى وتە اۋقىمدى.
ساياباقتا كۇزدە گۇلدەيتىن اعاشتار دا بار, قالا تۇرعىندارى وسى جەرگە كەلىپ ۋاقىت وتكىزىپ, تىنىش دەمالا الادى.
