مەملەكەت باسشىسى قاسىم-جومارت توقاەۆتىڭ جارلىعى بويىنشا ءتۇرلى دەڭگەيدەگى اكىمدەر جىلىنا ءبىر رەت ءماسليحات پەن قوعامدىق كەڭەستىڭ الدىندا ەسەپ بەرەدى. سوعان سايكەس استانا قالاسى ءماسليحاتىنىڭ كەزەكتەن تىس سەسسياسىندا قالا اكىمى التاي كولگىنوۆتىڭ ەلوردانىڭ الەۋمەتتىك-ەكونوميكالىق دامۋى تۋرالى ەسەبى تىڭدالدى.
دامۋدىڭ وڭ ديناميكاسى بايقالدى
– ارينە, ىستەلگەن جۇمىس از ەمەس. بىراق ىستەيتىنىمىز ودان دا كوپ. سەبەبى قالامىز ۇلكەيىپ, قالا حالقىنىڭ سانى ارتىپ كەلەدى. سوعان سايكەس شەشىمىن تابۋى ءتيىس ماسەلەلەر دە كوبەيۋدە. حالىقتىڭ سۇرانىسىنا قوسا قازىرگى كۇن تارتىبىندە تۇرعان پروبلەمالار بار. باستى ماقسات – حالىقتىڭ تۇرمىس ساپاسىن ارتتىرۋ, مەملەكەت باسشىسى قاسىم-جومارت كەمەلۇلىنىڭ جولداۋىنداعى باعدارلامالاردى, بەلگىلەنگەن مىندەتتەردى جۇزەگە اسىرۋ, – دەدى التاي كولگىنوۆ.
قالا باسشىسىنىڭ ايتۋىنشا, تۇرعىن ءۇي قۇرىلىسى, شاعىن جانە ورتا بيزنەس, ەكونوميكاعا تارتىلعان ينۆەستيتسيالار, اشىلعان جاڭا جۇمىس ورىندارى, ت. ب. كورسەتكىشتەر بويىنشا دامۋدىڭ وڭ ديناميكاسى بايقالدى. ماسەلەن, كەيىنگى جىلدارى جىل سايىن 3 ميلليوننان استام شارشى مەتر تۇرعىن ءۇي سالىندى. ءۇش جىلدىڭ ىشىندە بەس جىلعى جوسپار ورىندالدى. بيىل 3,5 ملن شارشى مەتر سالۋ جوسپارى بولدى. بىراق ينجەنەرلىك جەلىلەردىڭ قاجەتتىلىگىنە سايكەس بۇل جوسپار 2 ملن شارشى مەترگە ءتۇسىرىلدى.
– ءبىز 4 ميلليون شارشى مەتر سالا الامىز. قۇرىلىسشىلارىمىز تاجىريبەلى, قالانىڭ ءالى دە وسە تۇسۋىنە مۇمكىندىكتەر بار. ەڭ باستىسى, تۇرعىن ۇيگە سۇرانىس بولىپ تۇر. بىراق الدىمەن ۇيلەردى قاجەتتى ينفراقۇرىلىممەن, اباتتاندىرۋمەن, جولدارمەن, الەۋمەتتىك نىساندارمەن قامتاماسىز ەتۋ كەرەك, – دەدى التاي كولگىنوۆ.
باس جوسپار بولجامى
2001 جىلى استانانىڭ باس جوسپارى قابىلدانعاندا, 2030 جىلى ەلوردادا 850 مىڭ ادام تۇرادى دەپ بولجانعانىن ايتقان قالا اكىمى 2010 جىلى قالانىڭ باس قۇجاتىنا وزگەرىستەر ەنگىزىلگەنىن جەتكىزدى. سول كەزدە 2030 جىلى باس قالادا 1 ملن 200 مىڭ ادام تۇرادى دەپ بولجانعان.
–بۇل كورسەتكىشكە ەكى جىل بۇرىن جەتتىك. كورىپ وتىرعاندارىڭىزداي, حالىقتىڭ سانى جىلدان-جىلعا وسۋدە. بيىل باس جوسپارعا قايتادان وزگەرىس ەنگىزىپ جاتىرمىز. وسى كۇزدە ءماسليحات پەن قوعامدىق كەڭەستىڭ, قوعامنىڭ تالقىسىنا شىعارامىز. قازىرگى بولجام بويىنشا 2030 جىلى ەلوردادا 2 ميلليوننان استام ادام تۇراتىن بولادى. باس جوسپارعا ەنگىزىلگەن وزگەرىستەر ەڭ باستىسى حالىققا ىڭعايلى بولۋى كەرەك. سوندىقتان قالانىڭ ءار جاڭا اۋدانىندا الەۋمەتتىك نىساندار – مەكتەپ, بالاباقشا, ەمحانا, قوعامدىق كەڭىستىكتەر, جولدار, ينجەنەرلىك ينفراقۇرىلىم بولعانى شارت, – دەدى قالا اكىمى.
ءۇش جىلدا – 120 مىڭ وقۋشى ورنى
ەلوردانىڭ قارقىندى دامۋىنا, حالىق سانىنىڭ جىلدان-جىلعا ارتۋىنا بايلانىستى قالادا كوپتەگەن مەكتەپ سالىناتىنىن ايتقان التاي كولگىنوۆ ورتا ءبىلىم بەرۋ نىساندارى قۇرىلىسىنىڭ جوسپارىنا توقتالدى.
– مامىر ايىندا مەكتەپتەن 8 مىڭنان استام بالا شىعارساق, قىركۇيەك ايىندا ءبىرىنشى سىنىپقا 25 مىڭنان استام بالا قابىلدايمىز. ءۇش اۋىسىمدا وقىتاتىن مەكتەپتەردىڭ سانىن جوسپارلى تۇردە ازايتۋ جانە بولدىرماۋ ءۇشىن جىل سايىن كەمىندە 10 مەكتەپ سالۋ قاجەت. مىسالى, 3 جىل ىشىندە 70 مىڭ وقۋشى ورنىنا 34 مەكتەپ سالىندى. تەك بيىل عانا 23 مىڭنان استام وقۋشى ورنى قۇرىلۋدا.
مەملەكەت باسشىسىنىڭ جولداۋىنا سايكەس ءبىز جايلى, ءىرى گاباريتتى مەكتەپتەر سالۋعا كىرىستىك. قازىر ەكى اۋىسىمدا 80 مىڭ وقۋشى ورنىنا ارنالعان 20 ءىرى مەكتەپ جوبالاپ جاتىرمىز. ەگجەي-تەگجەيلى جوسپارلاۋ جوسپارىندا ءاربىر شاعىن اۋداندا وقۋ ورىندارى بولۋى ءۇشىن باعىتتار بەكىتىلدى, – دەدى التاي كولگىنوۆ.
ونىڭ ايتۋىنشا, استانادا 2025 جىلعا دەيىن تاعى ەكى اۋىسىمدا 120 مىڭ وقۋشى ورنى قۇرىلادى. 44 مەكتەپ سالۋ جوسپارلانىپ وتىر. مەكتەپ سالۋ ءۇشىن 70-تەن استام ۋچاسكە انىقتالعان. اتالعان جەر ۋچاسكەلەرىنىڭ اۋدانى ەكى اۋىسىمدا 240 مىڭ وقۋشى ورنىنا ارنالعان وقۋ ورىندارىن سالۋعا مۇمكىندىك بەرەدى. 2021 جىلى 15 مەكتەپ سالىندى, بيىل دا 15 مەكتەپ قۇرىلىسى جۇرگىزىلىپ جاتىر. سونىڭ 11-ءى كەلەسى وقۋ جىلدىڭ باسىنا قاراي پايدالانۋعا بەرىلەدى. جالپى الەۋمەتتىك نىسانداردى سالۋ ءۇشىن بولىنەتىن جەر تەلىمدەرىنىڭ سانى جىل سايىن ۇلعايادى.
سونداي-اق, ءبىلىم بەرۋ ساپاسىن ارتتىرۋ ءۇشىن جىل سايىن پەداگوگيكالىق ماماندىقتارعا گرانتتار بولىنەدى. ەگەر ءۇش جىل ىشىندە 1400 گرانت بولىنسە, بيىل تاعى 1 مىڭ گرانت ءبولىندى. جەكە ينۆەستوردىڭ ەسەبىنەن پەداگوگيكالىق ينستيتۋت اشۋ دا جوسپارلانىپ وتىر.
ۇلەسكەرلەر: 15 مىڭ وتباسىدان 2 مىڭى قالدى
«ساقالدى» قۇرىلىستاردى اياقتاۋ بويىنشا اتقارىلىپ جاتقان جۇيەلى جۇمىس تۋرالى ايتقان التاي كولگىنوۆ 2022 جىلدىڭ سوڭىنا قاراي قۇرىلىسى ۇزاققا سوزىلعان 150 ءۇيدىڭ 120-سىندا ماسەلە شەشىلەتىنىن جەتكىزدى.
– ءبىزدىڭ الدىمىزدا 16 مىڭ ۇلەسكەر وتباسىنىڭ ماسەلەسىن شەشۋ مىندەتى تۇردى. بۇل – جاي عانا ساندار ەمەس, ۇزاق جىلدار بويى جالدامالى پاتەرلەردى جاعالاعان تۇرعىنداردىڭ تاعدىرى. ولار بۇرىننان-اق ءوز ۇيلەرىنە كىرۋلەرى ءتيىس بولعان. بيىل قۇرىلىسى ۇزاققا سوزىلعان تاعى 30 كوپپاتەرلى تۇرعىن ءۇيدى سالىپ ءبىتىرۋدى جوسپارلاپ وتىرمىز.
ۇزاققا سوزىلعان قۇرىلىستارداعى جۇمىستىڭ اياقتالۋى مەملەكەت باسشىسىنىڭ باقىلاۋىندا. جىل سوڭىنا دەيىن اياقتالاتىن «ساقالدى» قۇرىلىس سانى 150-دەن 120-نى قۇرايدى, ۇلەسكەرلەر سانى 15 مىڭ وتباسىدان 2 مىڭ وتباسىعا دەيىن قىسقارادى. سوعان قاراماستان, تاعى 30 ۇزاققا سوزىلعان قۇرىلىس قالىپ وتىر. ولاردىڭ قۇرىلىسىن اياقتاۋ بويىنشا ناقتى جوسپارلانعان مەرزىم بار, – دەدى التاي كولگىنوۆ.
تۇرعىندار گازداندىرۋ پايداسىن ءتۇسىندى
ەلوردانى گازداندىرۋ بويىنشا جۇمىستار جالعاسىپ جاتقانىن اتاپ وتكەن قالا اكىمى سارىارقا جانە الماتى اۋداندارىنداعى ۇيلەر گازعا قوسىلۋ مۇمكىندىگىمەن تولىق قامتاماسىز ەتىلگەنىن جەتكىزدى. ول ءۇشىن قالادا 680 شاقىرىمنان استام گاز تاراتۋ جەلىلەرى سالىندى, ورامىشىلىك جەلىلەر تارتىلدى.
– كۇن سايىن گازعا قوسىلعان ۇيلەردىڭ سانى ارتىپ كەلەدى. بۇگىندە گازعا 6 مىڭنان استام ءۇي قوسىلدى. ىنتالاندىرۋ جانە الەۋمەتتىك ءالجۋاز توپتارعا كومەك كورسەتۋ ءۇشىن بىرقاتار الەۋمەتتىك شارالار قابىلداندى. اتاپ ايتقاندا, ۇيلەردى گازعا قوسۋعا ارنالعان قۇجاتتار ءتىزىمى ەكى ەسە قىسقارتىلدى; حالىقتىڭ مۇقتاج ساناتتارىنا بولەتىن سومانى 430 مىڭ تەڭگەگە نەمەسە 2 ەسەدەن استام ۇلعايتتىق; تەگىن نەگىزدە گازدى ەسەپكە الۋ قۇرالدارى بەرىلەدى; ءۇيدى گازعا قوسۋ ءۇشىن بانكتەر ارقىلى ءبولىپ تولەۋ جانە پايىزسىز كرەديتتەۋ بار.
تۇرعىندار گازداندىرۋدىڭ پايداسى جايلى ايتىپ جاتىر. كومىر ساتىپ الۋدىڭ, كۇلدى تازارتۋدىڭ, تاۋلىك بويى ۇيگە بايلانىپ وتىرۋدىڭ قاجەتى جوق. گازداندىرۋ ەكولوگيالىق جاعىنان دا تازا جانە قاۋىپسىز. ءبىز سونداي-اق گازعا الەۋمەتتىك نىسانداردى قوسامىز. تۇرعىن الاپتاردا ورتالىق جىلۋ جۇيەسىنە قوسىلماعان الەۋمەتتىك نىساندار بار. ولار اۆتونومدى جىلۋ كوزدەرى ارقىلى جىلىتىلدى. كومىر نەمەسە ديزەل وتىنى ارقىلى جىلىتۋ بىرنەشە ەسە قىمبات. الماتى جانە سارىارقا اۋداندارىنداعى 20 الەۋمەتتىك نىساننىڭ 13-ءى گازعا اۋىستىرىلدى, قالعان 7 نىسان بويىنشا ىسكە قوسۋ-جوندەۋ جۇمىستارى جۇرگىزىلىپ جاتىر. وسى نىسانداردى گازعا اۋىستىرۋ ەسەبىنەن جالپى ۇنەمدەۋ جىلىنا 1 ملرد تەڭگەدەن اسادى. مىسالى, ەگەر بۇرىن ديزەل وتىنىمەن جىلىتۋ كەزىندە №40 مەكتەپ جىلىنا شامامەن 160 ملن تەڭگە جۇمساعان بولسا, گاز قوسىلعالى بۇل سوما 4 ەسەگە ازايدى. «شاراپات» الەۋمەتتىك قىزمەت كورسەتۋ ورتالىعىنىڭ ۇنەمدەگەن قارجىسى جىلىنا 60 ملن تەڭگەدەن اسادى, – دەدى التاي كولگىنوۆ.
بۇعان قوسا, بايقوڭىر جانە ەسىل اۋداندارىندا گاز قۇبىرىن سالۋ جۇمىستارى جۇرگىزىلىپ جاتىر. بيىل اۋداندىق «تۇران», «تەلمان» قازاندىقتارى ارقىلى «ۇركەر», «ءوندىرىس», «تەلمان», «پريگورودنىي», «Family Village» جانە «Garden Village» شاعىن اۋداندارىنا گاز جەتكىزۋ جەلىلەرىنىڭ قۇرىلىسى باستالدى. ال «شۇبار» شاعىن اۋدانىندا جوبالاۋ جۇمىستارى جۇرگىزىلۋدە.
– ەلوردانى گازداندىرۋ مەملەكەت باسشىسىنىڭ باقىلاۋىندا. گازداندىرۋ قالانىڭ ەكولوگياسىن ەداۋىر جاقسارتىپ قانا قويماي, جەكە سەكتور تۇرعىندارى ءۇشىن قولايلى جاعداي جاساۋعا مۇمكىندىك بەرەدى, – دەدى التاي كولگىنوۆ.
750-دەن استام اۋلا مەن قوعامدىق كەڭىستىكتەر اباتتاندىرىلدى
ەلوردادا جاڭا تارتىلىس نۇكتەلەرى پايدا بولعانىن, وندا قالا تۇرعىندارى مەن قوناقتارى بوس ۋاقىتىن دەنساۋلىققا پايدالى ءارى جايلى وتكىزە الاتىنىن ايتقان قالا اكىمى سوڭعى جىلدارى استانادا 750-دەن استام اۋلالار مەن قوعامدىق كەڭىستىكتەر – ساياباقتار, سكۆەرلەر, بۋلۆارلار اباتتاندىرىلعانىن جەتكىزدى.
ماسەلەن, وسى جىلى ەلوردادا بەيبىتشىلىك جانە كەلىسىم سارايى اۋدانىندا امفيتەاتر, قالانىڭ وڭ جاعالاۋىنداعى تاعى ءبىر جاياۋ جۇرگىنشىلەر جولى, «ۆسترەچا» ساۋدا ءۇيى جانىنداعى قوعامدىق كەڭىستىك, «بەيبىتشىلىك جانە كەلىسىم» ساياباعى, قالا الاڭى جانە ت. ب. سالىندى.
– ەلوردا تۇرعىندارى مەن قوناقتارى بوس ۋاقىتىن قولايلى جانە دەنساۋلىققا پايدالى ەتىپ وتكىزە الاتىن اشىق اسپان استىنداعى ورىنداردى قۇرۋ وتە ماڭىزدى. «استانا – جايلى قالا» ماستەر-جوسپارى اياسىندا ءبىز جىل سايىن 250-گە جۋىق اۋلا مەن قوعامدىق كەڭىستىكتەردى اباتتاندىردىق. وسىلايشا, سوڭعى جىلدارى 750-دەن استام اۋلالار مەن قوعامدىق كەڭىستىكتەر اباتتاندىرىلدى.
بىرنەشە مىسال كەلتىرەيىن: بەيبىتشىلىك جانە كەلىسىم سارايىنىڭ جانىنا امفيتەاتر سالدىق. وندا شىعارماشىل جاستاردىڭ, ارتىستەردىڭ جانە ت. ب. قويىلىمدارى وتەدى. باراەۆ كوشەسىندە تاعى ءبىر جاياۋ جۇرگىنشىلەر پرومەنادى اباتتاندىرىلدى, كوشە سپورتى كوليزەيى اشىلدى, كوپىر ماڭىنداعى كەڭىستىكتەر اباتتاندىرىلدى. وڭ جاعالاۋدا ءبىز ءبىرىنشى جاياۋ جۇرگىنشىلەر پرومەنادىن, ورتالىق ساياباقتى, سۋبۇرقاقتارى بار قالالىق الاڭدى, «تەاتر» بۋلۆارىن, جاعالاۋدى جانە
ت. ب. ءوزارا بىرىكتىردىك, – دەپ اتاپ ءوتتى التاي كولگىنوۆ.
استانا اكىمى اباتتاندىرۋ كەزىندە تۇرعىن الاپتارعا ەرەكشە نازار اۋدارىلاتىنىن اتاپ ءوتتى. تەك تۇرعىن الاپتاردا 300-گە جۋىق اۋلا مەن قوعامدىق كەڭىستىك اباتتاندىرىلدى, «كوكتالدا» اۋماعى 16 گەكتار ساياباق سالىندى.
– قوعامدىق كەڭىستىكتەر مەن اۋلا اۋماقتارىندا اركىم ءوز قالاۋى بويىنشا اينالىساتىن ءىس تابادى. بۇل – باسكەتبول/فۋتبول الاڭدارى, workout-ايماقتار, تىنىش دەمالۋعا ارنالعان ايماقتار, اتكەنشەكتەر, شىعارماشىلىق ونەر كورسەتۋگە ارنالعان ساحنالار, سكەيت-ايماقتار جانە ت. ب. – دەدى استانا اكىمى.
زياتكەرلىك كولىك ۋاقىتتان ۇتادى
استانادا زياتكەرلىك كولىك جۇيەسىن دامىتۋ جالعاساتىنىن اتاپ وتكەن التاي كولگىنوۆ بۇل جۇيە كوشە-جول جەلىسىنىڭ وتكىزۋ قابىلەتىن ارتتىرۋعا, كولىك قوزعالىسىنىڭ كەشىگۋىن ازايتۋعا, جول ءجۇرۋ ۋاقىتىن قىسقارتۋعا جانە ت. ب. مۇمكىندىك بەرەتىنىن ايتىپ ءوتتى. كولىك جانە كوشە-جول جەلىسى سالاسىنداعى تسيفرلىق شەشىمدەر, كەشەندى كولىك سحەماسىنىڭ تۇجىرىمداماسىنا توقتالدى.
– استانادا زياتكەرلىك كولىك جۇيەسىن پايدالانۋ ەسەبىنەن كولىك جىلدامدىعى 18%-عا ۇلعايدى, جول ءجۇرۋدىڭ ورتاشا ۋاقىتى 20%-عا ازايدى. «اقىلدى» باعدارشامدار كەپتەلىس كەزىندە وڭتايلى جۇمىس رەجيمىن تاڭداۋعا مۇمكىندىك بەرەدى. وسىلايشا جولدارداعى قوزعالىستى جەڭىلدەتەدى. قالادا باعدارشام نىساندارىنىڭ 40%-دان استامى زياتكەرلىك فۋنكتسيالارمەن جابدىقتالعان. كەلەسى كەزەڭدە باعدارشام نىساندارىنىڭ شامامەن 80%-ىن ينتەللەكتۋالدى جۇيەمەن قامتۋدى جوسپارلاپ وتىرمىز, – دەدى التاي كولگىنوۆ.
بۇعان دەيىن ەلوردادا كەشەندى كولىك سحەماسى تۇجىرىمداماسى بەكىتىلگەنىنە توقتالعان قالا اكىمى بۇل حالىقتىڭ جىل سايىنعى ءوسۋىن جانە جولدارداعى ترافيكتىڭ ۇلعايۋىن ەسكەرە وتىرىپ, قالالىق كولىكتىڭ 10 جانە ودان دا كوپ جىلعا بىرىڭعاي تەحنيكالىق كوزقاراسىن ازىرلەۋگە مۇمكىندىك بەرەتىنىن اتاپ ءوتتى. سونداي-اق كەشەندى كولىك سحەماسى جاڭا كوپىرلەردىڭ, كولىك ايىرىقتارىنىڭ سانىن ۇلعايتۋدى, كوشەلەردى كەڭەيتۋدى, جولداردى اشۋدى, قوعامدىق كولىكتى ايتارلىقتاي جاڭعىرتۋدى جانە ت. ب. كوزدەيدى.
– وسى جىلدىڭ تامىز ايىندا ۇلى دالا داڭعىلىنداعى جاڭا كوپىر بويىنشا قوزعالىس اشىلدى. ەسىل وزەنى ارقىلى تاۋەلسىزدىك داڭعىلىندا تاعى ءبىر كوپىر سالۋ كەلەسى جىلى اياقتالادى دەپ جوسپارلانىپ وتىر. سونىمەن قاتار, سوڭعى جىلدارى 400-دەن استام كوشە جوندەلدى. ولاردىڭ جارتىسى تۇرعىن الاپتاردا, – دەدى التاي كولگىنوۆ.
جىلۋ جانە سۋمەن قامتۋ جوسپارى
قالانىڭ قارقىندى دامۋى مەن حالىقتىڭ ءوسۋىن ەسكەرە وتىرىپ, استانادا ءۇش گاز جىلۋ ستانساسىنىڭ, 3-جەو-نىڭ, 3-سورعى-سۇزگى ستانساسىنىڭ جانە ت. ب. ستراتەگيالىق نىسانداردىڭ قۇرىلىسى جۇرگىزىلىپ جاتىر. استانا اكىمى وسى قۇرىلىس جۇمىستارىنا دا توقتالدى.
– 2019 جىلدىڭ باسىندا ەلوردادا 1 ميلليون 30 مىڭنان استام ادام تۇردى. بيىل 1 ملن 330 مىڭنان استام ادام. 3-4 جىل ىشىندە حالىق سانى 300 مىڭ ادامعا ءوستى. بۇل ساندى وبلىس ورتالىقتارىنداعى ادام سانىمەن سالىستىرۋعا بولادى. سول سەبەپتەن ينجەنەرلىك ينفراقۇرىلىمدى سالۋ قاجەت. بۇل – سۋ, جارىق, جىلۋ. وزدەرىڭىز بىلەتىندەي, 3-جەو-3 ۇزاق مەرزىمدى قۇرىلىسقا اينالىپ, 10 جىلدان استام ۋاقىت بويى سالىنىپ كەلەدى. مەردىگەرگە حابارلاما جىبەرىلىپ, ول قۇرىلىس قارقىنىن ارتتىردى. بىراق 3-جەو-نىڭ دە قۋاتى جەتكىلىكسىز بولادى. سوندىقتان ءۇش گاز جىلۋ ستانساسىنىڭ قۇرىلىسى باستالدى. ولاردىڭ ارقايسىسىنىڭ قۋاتى 3-جەو-نىڭ قۋاتىنان اسىپ تۇسەدى. گاز ستانسالارى كەلەسى جىلدان باستاپ كەزەڭ-كەزەڭىمەن پايدالانۋعا بەرىلەدى. سونىمەن قاتار, ءبىز «ناۋرىز», «جۇلدىز», «اراي» جانە ت. ب. ەلەكتر قوسالقى ستانسالارىن جوبالاۋدى جانە رەكونسترۋكتسيالاۋدى جۇرگىزۋدەمىز, – دەدى التاي كولگىنوۆ.
– بۇگىندە قالا تاۋلىگىنە 300 مىڭ تەكشە مەتر سۋ تۇتىنادى. جاڭا سورعى-سۇزگى ستانساسىنىڭ قۋاتى – تاۋلىگىنە 100 مىڭ تەكشە مەتردەن استام سۋ. ونىڭ جۇمىسى ءىشىنارا وسى جىلدىڭ سوڭىنا دەيىن ىسكە قوسىلادى. سول كەزدە قالاعا تاۋلىگىنە 35 مىڭ تەكشە مەتر سۋ كەلەدى. 2023 جىلدان باستاپ قۋاتتىلىعى تاۋلىگىنە 100 مىڭ تەكشە مەتردەن استام سۋدى قۇرايدى, – دەدى التاي كولگىنوۆ.
ەسەپ بەرگەننەن كەيىن استانا اكىمى قالالىق ءماسليحات دەپۋتاتتارىنىڭ سۇراقتارىنا جاۋاپ بەردى. وندا قاجىمۇقان مۇڭايتپاسوۆ ستاديونى, تەمىرجول اۋرۋحاناسى, ەكولوگيا, ت. ب. وزەكتى ماسەلەلەر تۋرالى ەگجەيلى-تەگجەيلى ايتتى.
