ەلوردانىڭ قوعامدىق كەڭەسى استانانىڭ 2035 جىلعا دەيىنگى باس جوسپارىنىڭ جوباسىن ماقۇلدادى.
«استانا باس جوسپارى» جوبالاۋ ينستيتۋتىنىڭ قابىرعاسىندا وتكەن قوعامدىق تالقىلاۋ ەكى ساعاتتان استام ۋاقىتقا سوزىلدى. قاراپايىم تۇرعىندار الەۋمەتتىك نىساندارمەن, مەكتەپتەرمەن جانە بالاباقشالارمەن قامتاماسىز ەتۋ جانە شەت ايماقتاردى دامىتۋ, قورعالجىن تاس جولىنىڭ بويىنداعى گازبەن جابدىقتاۋ جانە كوشەتتەردى جويۋ ماسەلەلەرى, سونداي-اق ازاماتتىق قورعانىس, كوپىرلەر سالۋ, تۋننەلدى كارىز, نۇكتەلى قۇرىلىس, جەكە تۇرعان مەملەكەتتىك بالاباقشالار سالۋ جونىندەگى بيۋدجەتتىك باعدارلامانىڭ بولماۋى تۋرالى جانە ت. ب. كوكەيكەستى ۇسىنىس-تىلەگىن جەتكىزدى.
قوعامدىق تالقىلاۋ بارىسىندا كوتەرىلگەن قىزىقتى ماسەلەلەردىڭ ءبىرى حالىق سانى تۋرالى بولدى. بۇل رەتتە «ەلورداداعى حالىق سانىن جوعارى كورسەتكىشتەرگە دەيىن ارتتىرۋ قاجەت پە؟» دەگەن سۇراق قىزۋ تالقىلاندى. قازىر استانادا قازاقستان حالقىنىڭ 7%-دان استامى تۇرادى. مىسالى, توكيودا جاپونيا حالقىنىڭ 11%-ى, پاريجدە فرانتسيا حالقىنىڭ 3,3%-ى, انكارادا تۇركيا حالقىنىڭ 6,8%-ى, لوندوندا ۇلىبريتانيا حالقىنىڭ 13,4%-ى, ماسكەۋدە رەسەي حالقىنىڭ 9%-ى تۇرادى. قوعامدىق كەڭەستىڭ مۇشەلەرى, اسىرەسە كوشى-قون پروتسەستەرى ەسەبىنەن حالىق سانىنىڭ وسۋىنە ۇمتىلۋدىڭ قاجەتى جوق دەگەن باس جوسپاردىڭ ۇستانىمىن قولدايدى. قازاقستاننىڭ بارلىق ءوڭىرى كەز كەلگەن جەردە لايىقتى ءومىر سۇرۋگە, جۇمىس ىستەۋگە, ءبىلىم الۋعا, ساپالى مەديتسينالىق قىزمەت كورسەتۋگە مۇمكىندىك بەرۋ ءۇشىن تەڭگەرىمدى دامۋعا ءتيىس. ەلورداعا كوشىپ كەلۋشىلەردىڭ قاتارىن كوبەيتپەي-اق, اۋىلدىق اۋماقتاردى, شاعىن جانە ورتا قالالاردى دامىتۋ قاجەت.
قوعامدىق كەڭەس مۇشەلەرى استانا قالاسىنىڭ 2035 جىلعا دەيىنگى باس جوسپارىنىڭ جوباسىن تۇجىرىمدامالىق قالا قۇرىلىسى قۇجاتى رەتىندە قابىلداۋ جانە بەكىتۋ قاجەتتىگىن اتاپ ءوتتى. بۇل قۇجات جوبالاۋدىڭ ودان ءارى كەزەڭدەرى, بارلىق باعدارلاما اكىمشىلەرىنىڭ جۇمىسى, تىرشىلىكتى قامتاماسىز ەتۋ, الەۋمەتتىك جانە مادەني ينفراقۇرىلىم وبەكتىلەرىن سالۋ, قوعامدىق كەڭىستىكتەردى دامىتۋ, اباتتاندىرۋ جانە كوگالداندىرۋ ءۇشىن بيۋدجەتتىك وتىنىمدەردى دايىنداۋعا نەگىز بولادى.
تالقىلاۋ قورىتىندىسى بويىنشا ەلوردانىڭ قوعامدىق كەڭەسىنىڭ مۇشەلەرى تۇرعىندار تاراپىنان ايتىلعان ەسكەرتۋلەر مەن ۇسىنىستاردى ەسكەرە وتىرىپ, استانا قالاسىنىڭ 2035 جىلعا دەيىنگى باس جوسپارىنىڭ جوباسىن تۇتاستاي ماقۇلداۋدى ۇسىندى.
قوعامدىق كەڭەستىڭ جۇمىسىنا قالا باسقارمالارىنىڭ باسشىلارى, بۇقارالىق اقپارات قۇرالدارىنىڭ وكىلدەرى قاتىستى.
