شورتانباي شىعارماشىلىعىن زەرتتەۋ بارىسىندا عالامتور قولدانۋشىلارىنىڭ ءبىرىزدى ەمەس مالىمەتتەرىنەن اياق الىپ جۇرگىسىز ەكەنىنە كوزىڭىز جەتەدى. زار زامان وكىلدەرىنىڭ بەلدى تۇلعاسى شورتانباي مىسالىن الىپ وتىرعان سەبەبىمىز دە بار. ويتكەنى بۇل اقىن سوڭعى ون جىلدا كوپ زەرتتەلىپ, كوپ سۇراقتاردىڭ شەشىمى تابىلىپ, زەرتتەۋشىلەردىڭ پىكىرى ءبىر ارناعا توعىسقانداي بولىپ ەدى. الايدا باسىن اشىپ الاتىن ماسەلەلەر جەتكىلىكتى ەكەن. سونىڭ ءبىرى اقىننىڭ سۋرەتى جايىندا بولماق.
ەستەرىڭىزگە سالا كەتەلىك, وسىدان ون شاقتى جىل بۇرىن عالىم مارات ابسەمەتوۆ, شورتانبايدىڭ سۋرەتىن ومبىداعى كازاچي ارحيۆىنەن تاۋىپ الىپ, «استانا – مىڭجىلدىق تاريحى بار قالا» اتتى كىتابىنا كىرگىزگەن ەدى. سۋرەتتىڭ سىرتىندا «چورتانباي» دەگەن جازۋى بولعان. قازاقتا باسقا شورتانباي جوق قوي دەپ, وسى سۋرەتتەگى بەينەنى اقىننىڭ سۋرەتى دەپ نەگىزگە الىپ, سۇيىنشىلەگەن ەدىك. الايدا ونى قاپەرگە الىپ جاتقاندار نەكەن-ساياق.
اقىن, جىراۋ عانا ەمەس, ۇلكەن مولدا بولعان تۇلعانى شورتانباي دەۋگە ابدەن كەلەتىندەي. دەسە دە, باسىندا بورىگى بار اقساقالدى كوبىمىز زار زامان اقىنىنا بالاپ, سول تۋرالى ماقالا اقپاراتتاردا قولدانىپ ءجۇر. بۇل سۋرەت تاعى ءبىر ۇلىق جىراۋعا ورتاق ەكەن. عالامتورداعى Wikipedia باسىندا بوركى بار, اقساقالدى ادام بەينەلەنگەن سۋرەتتى بۇقار جىراۋ دەپ تانىپ تۇر. ەندى ءبىر سۋرەتتە شورتانبايدى بۇرىندارى مۇرات موڭكەۇلىنا تيەسىلى سۋرەتكە ورتاقتاستىرىپ قويعان. قمدب سايتىندا شورتانبايدىڭ ءتورت اۋىز ءسوزىن جازىپ بۇقار-شورتانبايعا ورتاق سۋرەتتى سالىپ, تالاستىرىپ قويعان.
قاراپ وتىرساڭىز, بۇلاردىڭ دەنى سوزىنە سەنەتىن, ەل – حالىق وقيتىن اجەپتاۋىر بەدەلدى سايتتار. دەمەك, قازاقتىڭ باعىنا بىتكەن بەس اقىندى اجىراتىپ-تانىماي, نەگە وڭدى-سولدى قولدانا بەرەدى دەپ سۇراعىمىز كەلەدى. ەگەر نيەت بولسا ءسال ىزدەنسە, اقىننىڭ اتا-تەگىنەن باستاپ, شىن اتىنا دەيىن مالىمەتتەر جەتەرلىك ەدى عوي.
