استانادا جىلىتۋ كەزەڭىنىڭ باستالۋى قارساڭىندا جانە تۇرعىن ءۇي سەكتورىندا ءورتتىڭ الدىن الۋ ماقساتىندا اعىمداعى جىلدىڭ 15 تامىزىنان باستاپ «ءورت قاۋىپسىزدىگى ايلىعى» ءجۇرىپ جاتىر.
قالالىق توتەنشە جاعدايلار دەپارتامەنتى ۇيىمداستىرعان بۇل ءىس-شارا بوگەنباي باتىر داڭعىلى, 4 مەكەنجايىندا ورنالاسقان №5 مامانداندىرىلعان ءورت ءسوندىرۋ بولىمىندە جەكە قۇرامنىڭ ساپ تۇزەۋىمەن باستالدى. استانا قالاسى توتەنشە جاعدايلار دەپارتامەنتى سارىارقا اۋداندىق توتەنشە جاعدايلار باسقارماسىنىڭ باس مامانى ايدانا ماديەۆانىڭ ايتۋىنشا, اعىمداعى جىل باسىنان بەرى استانا قالاسى بويىنشا 406 ءورت وقيعاسى تىركەلگەن. تۇرعىن ءۇي سەكتورلارىنداعى ءورتتىڭ نەگىزگى سەبەپتەرى پەشپەن جىلىتۋ, ەلەكتر جابدىقتارىن قولدانۋ كەزىندە ءورت قاۋىپسىزدىگى تالاپتارىنىڭ ساقتالماۋى بولىپ جاتادى.
– جىل سايىن كۇن سۋىتا باستاعاندا جانە جىلىتۋ ماۋسىمى جاقىنداعاندا, ادامداردىڭ ورتتەن قايتىس بولۋى مەن جاراقاتتانۋدىڭ الدىن الۋ ماقساتىندا دەپارتامەنت جەكە تۇرعىن ءۇي سەكتورىن ارالاۋ ارقىلى الدىن الۋ ءىس-شارالارىن جۇرگىزەدى. ول ءۇش كەزەڭگە بولىنگەن. 1-كەزەڭ – 15 تامىزدان 15 قىركۇيەككە دەيىن; 2-كەزەڭ – 15 قىركۇيەكتەن 15 قازانعا دەيىن جانە 3-كەزەڭ 15 قازاننان باستاپ جىلىتۋ كەزەڭىنىڭ سوڭىنا دەيىن جالعاسادى. ءىس-شارا شەڭبەرىندە دەپارتامەنت قىزمەتكەرلەرى اۋلالاردى ارالاۋ ارقىلى رەيد جۇرگىزەدى, ۇگىت-ناسيحات جۇمىسى كۇشەيتىلەدى, – دەدى ايدانا ماديەۆا.
ودان ءارى ەرىكتىلەر توتەنشە جاعدايلار باسقارماسىنىڭ وكىلدەرىمەن بىرگە حالىقتىڭ الەۋمەتتىك وسال توپتارىنىڭ تۇرعىن ۇيلەرىنە رەيدكە شىقتى. بيىل الەۋمەتتىك وسال توپقا جاتاتىن 200 وتباسىدان ءوتىنىش تۇسكەن. اكىمدىكتەن كومەك سۇراعانداردىڭ ءبىرى – كوپبالالى ءارى مۇگەدەك بالانى اسىراۋشى انا ءۇمىت عازيزقىزى. رەيد بارىسىندا ينسپەكتورلار الدىمەن قىرقىنشى ستانساسىنداعى تورەقۇلۇلى, 19 مەكەنجايىندا تۇراتىن انانىڭ ۇيىنە كەلىپ, الەۋمەتتىك وسال توپتاعى تۇرعىننىڭ جىلىتۋ ماۋسىمىنا دايىندىق بارىسىمەن تانىستى. ارالاۋ بارىسىندا پەشتەر مەن مۇرجالاردى, ەلەكتر جىلىتقىشىنىڭ دۇرىس ورناتىلۋىنا باستى نازار اۋدارىلدى. ماماندار جىلىتۋ قۇرالىنىڭ اينالاسىنداعى جارىقتى بىتەۋ كەرەك ەكەنىن, ونىڭ الدىنا مىندەتتى تۇردە مەتالل قاڭىلتىر قويىپ, قۇبىردى ءۇش ايدا ءبىر رەت تازالاپ تۇرۋدىڭ قاجەتتىگىن ەسكەرتتى. سودان سوڭ ءورت قاۋىپسىزدىگى ايلىعىنىڭ ءبىرىنشى كەزەڭىن وتكىزۋ اياسىندا تجد باسقارماسىنىڭ الماتى اۋدانى بويىنشا ينجەنەرى ساعىنتاي قادىربەكوۆ ەلوردالىق تۇرعىننىڭ ۇيىنە جىلىتۋ ماۋسىمى كەزىندە ءيىس ءتيىپ قالماس ءۇشىن ۋلى گازدى انىقتايتىن دابىل قوندىرعىسىن تەگىن ورناتىپ بەردى.
– وتكەن پەش جاعۋ ماۋسىمىندا جەكە تۇرعان 110 ۇيدەن ءورت شىققان. دەگەنمەن بۇل كورسەتكىش بىلتىرعىمەن سالىستىرعاندا 23 پايىزعا كەم. استانا قالاسى بويىنشا بارلىعى 935 تۇرعىن ءۇي ەسەپتە تۇر جانە دە جاتاقحانا مەن كوممەرتسيالىق قىزمەت رەتىندە قايتا جاسالعان 1162 تۇرعىن ءۇي-جاي بار. 2022-2023 جىلىتۋ ماۋسىمىندا قالا بويىنشا تۇرعىن ۇيلەرگە 308 داتچيك ورناتىلدى. سونىڭ ناتيجەسىندە بىلتىر قالادا بولعان ءورتتىڭ بىرىندە دىبىستىق قۇرىلعىنىڭ كومەگىمەن بۇتىندەي ءبىر وتباسى امان قالدى, – دەدى س.قادىربەكوۆ.
حالىقتىڭ الەۋمەتتىك وسال توپتارىنىڭ تۇرعىن ۇيلەرىن ارالاۋ ارقىلى ءتىلسىز جاۋدىڭ الدىن الۋ ءىس-شارالارى 15 قىركۇيەككە دەيىن جالعاسادى.
