استانا قالاسى ءماسليحاتىنىڭ دەپۋتاتتارى بىرقاتار الەۋمەتتىك نىساندى ارالاپ, اتقارىلىپ جاتقان جۇمىسپەن تانىستى. سونىڭ بارىسىندا تۇرعىندارعا قولايلى جاعداي جاساۋدا كەدەرگى كەلتىرەتىن ماسەلەلەر انىقتالدى.
ءماسليحات دەپۋتاتتارىنىڭ قاتارىندا كەندەباي ادامبەكوۆ, ءمادينا اجىكەنوۆا, جانارگۇل كۇلماعامبەتوۆا, باۋىرجان قاسىمبەرگەباەۆ, ارسلانبەك ماعزۇم, باۋىرجان سمايىلوۆ بولدى. ولار «استانا قالاسىندا مەملەكەتتىك-جەكەمەنشىك ارىپتەستىكتى ىسكە اسىرۋ ناتيجەلەرى» تاقىرىبىندا جاريا تىڭداۋعا دايىندالۋ اياسىندا الەۋمەتتىك نىسانداردى ارالادى.
الدىمەن دەپۋتاتتار قالاداعى ت.بيگەلدينوۆ پەن جەلتوقسان كوشەلەرىنىڭ قيىلىسىندا ورنالاسقان اقىلى تۇراقتارعا باردى. قازىرگى ۋاقىتتا قالا بويىنشا 7300-گە جۋىق اقىلى تۇراق بار. مۇندا ءار كولىك كۇنىنە شامامەن 40 مينۋتتاي تۇرادى. الداعى ۋاقىتتا اقىلى تۇراقتار ەكسپو اۋماعىندا پايدا بولماق. جوبا ىسكە قوسىلعالى بەرى اقىلى تۇراقتاردان 300 ميلليوننان اسا قارجى تۇسكەن. اۋرۋحانا, بالاباقشا, مەكتەپ, حالىققا قىزمەت كورسەتۋ ورتالىعى سەكىلدى الەۋمەتتىك نىسانداردا اقىلى تۇراقتىڭ بولۋى كولىك قوزعالىسىن ازايتۋعا سەپتەسەدى. بۇل تۋرالى استانا قالاسى كولىك جانە جول-كولىك ينفراقۇرىلىمىن دامىتۋ باسقارماسى باسشىسىنىڭ ورىنباسارى ەرجان ديحانباەۆ ايتتى.
ودان كەيىن دەپۋتاتتار قالا سىرتىندا ورنالاسقان قاۋىپتى قالدىقتاردى, ونىڭ ىشىندە قۇرامىندا سىناپ بار جانە مەديتسينالىق قالدىقتاردى كادەگە جاراتۋ, قايتا وڭدەۋ بويىنشا قىزمەت كورسەتەتىن ءوندىرىس ورتالىعىنا باردى. مۇندا «Kazecotech» جاۋاپكەرشىلىگى شەكتەۋلى سەرىكتەستىگى باسشىسى ۆلاديمير اندرەەۆ اتقارىلعان جۇمىستار جايىندا اڭگىمەلەدى.
«مەملەكەتتىك-جەكەمەنشىك ارىپتەستىك جوباسىن ىسكە اسىرۋ كەزىندە سوڭعى 3 جىلدا بيزنەستىڭ الەۋمەتتىك جاۋاپكەرشىلىگى رەتىندە جەكە سەرىكتەس وتەۋسىز نەگىزدە تۇرعىن ۇيلەردىڭ جانىنان بەس سىناپ قۇيۋدى جويىپ, 4 كگ-نان استام سىناپ جينادى. 13 ملن تەكشە مەتردەن استام اۋانىڭ لاستانۋىنا جول بەرىلمەدى» دەدى ۆ.اندرەەۆ.
وعان قوسا, دەپۋتاتتار قالاداعى گۋمانيتارلىق كوللەدجدىڭ جۇمىسىمەن تانىستى. استانا قالاسى ءبىلىم باسقارماسىنىڭ باسشىسى قاسىمحان سەنعازىەۆ تە قاتىسىپ, قالادا پەداگوگ كادرلاردى دايارلاۋ جۇمىسىنا قاتىستى سۇراقتارعا جاۋاپ بەردى.
پەداگوگيكالىق ءبىلىم ەلوردانىڭ 4 وقۋ ورنىندا بەرىلەدى. ولار: ل.گۋميلەۆ اتىنداعى ەۋرازيا ۇلتتىق ۋنيۆەرسيتەتى, نازارباەۆ ۋنيۆەرسيتەتى, ا.قۇسايىنوۆ اتىنداعى ەۋرازيا گۋمانيتارلىق ينستيتۋتى جانە استانا حالىقارالىق ۋنيۆەرسيتەتى. ونىڭ ىشىندە وقۋ گرانتىنىڭ 65 پايىزى استانا حالىقارالىق ۋنيۆەرسيتەتىنە تيەسىلى. 2026-2027 جىلعا دەيىن 100 مىڭ بالاعا 3500 پەداگوگ قاجەت بولادى.
سونداي-اق حالىق قالاۋلىلارى قالاداعى پاراليمپيادالىق جاتتىعۋ ورتالىعىنا باردى. مۇندا مۇمكىندىگى شەكتەۋلى جاندار جۇيەلى تۇردە سپورتپەن شۇعىلدانادى. بۇگىنگى تاڭدا مۇندا سپورتتىڭ ءار تۇرىنەن جاتتىعۋ وتەدى.
«ءبىز ارىپتەستەرىمىزبەن بىرنەشە نىسانعا بارىپ قايتتىق. مۇنداعى باستى ماقسات – مەملەكەت تاراپىنان قانداي قولداۋ كورسەتىلىپ جاتقانىن كورۋ. ماسەلەن, ءبىز ەڭ سوڭىندا مۇمكىندىگى شەكتەۋلى جاندارعا ارنالعان ورتالىقتاردا بولدىق. مۇندا كەلۋشىلەر ءۇشىن بارلىق جاعداي جاسالعان» دەدى استانا قالاسى ءماسليحاتىنىڭ دەپۋتاتى ءمادينا اجىكەنوۆا.
