«دوس-مۇقاسان» اتاۋىمەن اتى اڭىزعا اينالعان انسامبل تۋرالى كوركەم فيلم جالپىۇلتتىق پروكاتقا شىقتى. ەفرات ءشارىپوۆتىڭ ستسەناريى بويىنشا Aray Media Group ستۋدياسى تۇسىرگەن ءفيلمنىڭ پروديۋسەرى – ايگۇل بايبەك. مۋزىكالىق دراما رەجيسسەرى – ايدىن ساحامان. كينوجوبا مادەنيەت جانە سپورت مينيسترلىگى مەن ۇلتتىق كينەماتوگرافيانى قولداۋ مەملەكەتتىك ورتالىعىنىڭ قولداۋىمەن ءتۇسىرىلدى.
ايگىلى ءانسامبلدىڭ 55 جىلدىعىنا ارنالعان كينوتۋىندى ءتۇسىرىلىمى ەكى جىلعا جۋىق ۋاقىتتى قامتىدى. ءتۇسىرىلىم جۇمىستارى ەلىمىزدىڭ ءار وڭىرىندە جۇرگىزىلدى. فيلم جارتى عاسىردان استام تاريحى بار ءانسامبلدىڭ قۇرىلۋ جانە قالىپتاسۋ حيكاياسىن باياندايدى. بۇل – ءارتۇرلى جاستاعى اۋديتورياعا ارنالعان, «ۇلتتىق فيلم» مارتەبەسىنە يە بولعان وتباسىلىق كينوتۋىندى.
ءانسامبلدىڭ قۇرىلۋ تاريحى 1967 جىلدىڭ 1 تامىزىنان باستالادى. سول كۇنى پاۆلودار وبلىسىنىڭ باياناۋىل اۋىلىنداعى مادەنيەت ءۇيىنىڭ ساحناسىندا العاشقى رەت ونەر كورسەتكەن قازاق پوليتەحنيكالىق ينستيتۋتىنىڭ ستۋدەنتتەرى جينالعانداردى تامساندىردى. اتاۋى ونىڭ ۇيىمداستىرۋشىلارى دوسىم سۇلەەۆ, مۇرات قۇسايىنوۆ, قاميت سانباەۆ, الەكساندر ليتۆينوۆ ەسىمدەرىنىڭ العاشقى بۋىندارىنان قۇرالعان. كەيىن قۇرامى تولىعىپ, اۋىسىپ وتىردى.
فيلمدە باستى رولدەردى استانا قالاسى جاستار تەاترىنىڭ ءبىر توپ ءارتىسى سومدايدى. اتاپ ايتقاندا, دوسىم سۇلەەۆتى – مەيىرعات امانگەلدين, مۇرات قۇسايىنوۆتىڭ ۇلعايعان كەزىن – عاني قۇلجانوۆ, قاميت سانباەۆتى – ەلدوس شايكەنوۆ, ءشامشا بەركىمباەۆانى – اينۇر راحيپوۆا, ۋسماديار ماحانوۆتى ازامات ەسقۇلوۆ وينايدى. ءفيلمنىڭ مۋزىكالىق رەداكتورى – «جاستار» تەاترىنىڭ حورمەيستەرى انەل سىرگەباەۆا.
بايان اسىلبەكوۆا
