مەملەكەت باسشىسى قاسىم-جومارت توقاەۆتىڭ ۆەتنام سوتسياليستىك رەسپۋبليكاسىنا رەسمي ساپارى با دين الاڭىندا ورنالاسقان ۇلت قاھارماندارى مونۋمەنتىنە جانە حو شي ءميننىڭ ماۆزولەيىنە گۇل شوعىن قويۋدان باستالدى.
1945 جىلى 2 قىركۇيەكتە حو شي مين وسى الاڭدا ۆەتنامنىڭ تاۋەلسىزدىگىن جاريالادى. پرەزيدەنت ۆەتنامنىڭ بوستاندىعى ءۇشىن كۇرەستە قازا تاپقان باتىرلاردىڭ جانە وسى ەلدىڭ ۇلت كوشباسشىسى حو شي ءميننىڭ رۋحىنا تاعزىم ەتتى. گۇل شوعىن قويۋ راسىمىنە قازاقستاننىڭ رەسمي دەلەگاتسياسى قاتىستى.
مەملەكەت باسشىسى ۆەتنام پرەزيدەنتى ۆو ۆان تحىونگپەن كەلىسسوز جۇرگىزدى. كەلىسسوزدەر الدىندا پرەزيدەنت سارايىندا رەسمي قارسى الۋ ءراسىمى ءوتتى. ەكى ەل باسشىلارىنا قۇرمەت قاراۋىلى روتاسىنىڭ باستىعى راپورت بەرگەن سوڭ, قازاقستان مەن ۆەتنامنىڭ مەملەكەتتىك ءانۇراندارى ورىندالدى. قاسىم-جومارت توقاەۆ پەن ۆو ۆان تحىونگ ءبىر-بىرىنە رەسمي دەلەگاتسيا مۇشەلەرىن تانىستىردى.
كەلىسسوز بارىسىندا ساۋدا-ەكونوميكالىق, ينۆەستيتسيالىق, ەنەرگەتيكالىق, كولىك-لوگيستيكالىق, اگروونەركاسىپتىك جانە مادەني-گۋمانيتارلىق سالالارداعى ىنتىماقتاستىقتى دامىتۋ پەرسپەكتيۆالارى تالقىلاندى. مەملەكەت باسشىسى قوناقجايلىق كورسەتكەنى ءۇشىن ۆو ۆان تحىونگقا العىس ايتىپ, وسى ساپارعا باسا ءمان بەرەتىنىن اتاپ ءوتتى.
«قازاقستان پرەزيدەنتى رەتىندە ءسىزدىڭ ەلىڭىزگە العاش رەت ساپارمەن كەلىپ وتىرمىن. مەن بۇل ساپارىما باسا ءمان بەرەمىن. قازاقستاندا ءسىزدىڭ ەلگە جانە ۆەتنام حالقىنا زور قۇرمەتپەن قارايتىنىن اتاپ وتكىم كەلەدى. ۆەتنامنىڭ ەكونوميكالىق جەتىستىكتەرى ەلدەرىمىزدىڭ ىنتىماقتاستىعىن ودان ءارى نىعايتۋعا بەرىك نەگىز بولادى. ءبىز ەكى مەملەكەت اراسىنداعى ەكونوميكالىق, ساياسي قاتىناستارعا باسا ءمان بەرەمىز جانە ۆەتنامنىڭ ەكونوميكالىق زور الەۋەتىن جانە ونىڭ حالىقارالىق ارەناداعى بەدەلىن جوعارى باعالايمىز» دەدى قاسىم-جومارت توقاەۆ.
پرەزيدەنت وتكەن جىلدىڭ قورىتىندىسى بويىنشا ءوزارا ساۋدا-ساتتىق جارتى ميلليارد دوللاردان اسقانىنا, بيىلعى التى ايدىڭ وزىندە 600 ميلليون دوللار بولعانىنا نازار اۋداردى. جىل سوڭىنا دەيىن بۇل ماڭىزدى كورسەتكىشتى 1 ميلليارد دوللارعا دەيىن جەتكىزۋ جوسپارلانىپ وتىر. مەملەكەت باسشىسى بۇگىنگى كەلىسسوزدەر ەكىجاقتى قاتىناستاردى دامىتۋدىڭ جاڭا كەزەڭىنە جول اشاتىنىنا سەنىم ءبىلدىردى.
ءوز كەزەگىندە ۆو ۆان تحىونگ ەكى ەل اراسىنداعى ىنتىماقتاستىقتى جانداندىرۋ ءىسىن جوعارى باعالاپ, قازاقستان مەن ۆەتنامنىڭ سەرىكتەستىگىن ودان ءارى نىعايتۋعا نيەتتى ەكەنىن جەتكىزدى.
«ءسىزدىڭ ەلىمىزگە جاساعان العاشقى رەسمي ساپارىڭىز ەكى مەملەكەتتىڭ ءداستۇرلى دوستىق قارىم-قاتىناسى مەن كوپجاقتى ىنتىماقتاستىعىن جانداندىرۋعا تىڭ سەرپىن بەرەتىنىنە سەنىمدىمىن. مەن قازاقستاندا ساپارمەن بولدىم. وتە تاماشا, عاجاپ ەل, حالقىنىڭ قوناقجايلىعىنا ءتانتى بولدىم. ۆەتنام قازاقستاننىڭ دامۋىن جانە ءسىزدىڭ باسشىلىعىڭىزبەن قازاقستان حالقىنىڭ جەتكەن زور تابىسىن ءجىتى باقىلاپ وتىر. ءسىزدىڭ تاجىريبەڭىز بەن ستراتەگيالىق كورەگەندىگىڭىزدىڭ ارقاسىندا قازاقستان ودان ءارى دامىپ, الەمدەگى جانە ايماقتاعى تۇراقتىلىقتى ساقتاۋعا ەلەۋلى ۇلەس قوساتىنىنا سەنىمدىمىن. ۆەتنام ۇلت-ازاتتىق كۇرەسى مەن مەملەكەتتىڭ بىرىگۋىنە جانە قازىرگى دامۋىنا قازاق حالقىنىڭ كورسەتكەن جاردەمىن ەشقاشان ۇمىتپايدى ءارى العىس ايتادى. ءبىز قازاقستانمەن اراداعى ءداستۇرلى دوستىق قاتىناسقا زور ءمان بەرەمىز جانە ەلىڭىزدى ورتالىق ازياداعى ماڭىزدى سەرىكتەس سانايمىز» دەدى ۆەتنام پرەزيدەنتى.
پرەزيدەنت قاسىم-جومارت توقاەۆ ارىپتەسى ۆو ۆان تحىونگتى قازاقستانعا مەملەكەتتىك ساپارمەن كەلۋگە شاقىردى. كەلىسسوزدەر قورىتىندىسى بويىنشا پرەزيدەنتتەر بىرلەسكەن كومميۋنيكە قابىلدادى. سونىمەن قاتار ساپار اياسىندا بىرقاتار قۇجاتتارعا قول قويىلدى. ولاردىڭ اراسىندا قازاقستان رەسپۋبليكاسىنىڭ ۇكىمەتى مەن ۆەتنام سوتسياليستىك رەسپۋبليكاسىنىڭ ۇكىمەتى اراسىنداعى ساۋدا-ەكونوميكالىق ىنتىماقتاستىقتى جەدەل دامىتۋ جونىندەگى 2023-2025 جىلدارعا ارنالعان بىرلەسكەن ءىس-قيمىلدار جوسپارى; قازاقستان رەسپۋبليكاسىنىڭ ۇكىمەتى مەن ۆەتنام سوتسياليستىك رەسپۋبليكاسىنىڭ ۇكىمەتى اراسىنداعى ۇلتتىق پاسپورتتاردىڭ يەلەرىن ۆيزالىق تالاپتاردان بوساتۋ تۋرالى كەلىسىم; قازاقستان رەسپۋبليكاسىنىڭ مادەنيەت جانە سپورت مينيسترلىگى مەن ۆەتنام سوتسياليستىك رەسپۋبليكاسىنىڭ مادەنيەت, سپورت جانە تۋريزم مينيسترلىگى اراسىنداعى تۋريزم سالاسىنداعى ىنتىماقتاستىق تۋرالى مەموراندۋم; «ساۋدا ساياساتىن دامىتۋ ورتالىعى» اق (QazTrade) مەن ۆەتنامنىڭ ساۋدانى دامىتۋعا جاردەمدەسۋ اگەنتتىگى (VietTrade) اراسىنداعى ساۋداعا جاردەمدەسۋ سالاسىنداعى ىنتىماقتاستىق تۋرالى مەموراندۋم; «قازپوشتا» اق مەن Viet Post كورپوراتسيا اراسىنداعى ەلەكتروندىق كوممەرتسيانى دامىتۋ سالاسىنداعى ءوزارا تۇسىنىستىك تۋرالى مەموراندۋم جانە تاعى باسقالارى بار.
