ەلوردادا ايماقتىق اۋىلشارۋاشىلىق جارمەڭكەلەر ماۋسىمى جالعاسۋدا. داستۇرگە ساي وتكەن سەنبى, جەكسەنبى كۇنى جەتىسۋ مەن الماتى وبلىسىنىڭ تاۋار وندىرۋشىلەرى ءوز ونىمدەرىن ۇسىندى.
قوس وبلىستىڭ اۋىل شارۋاشىلىعى وندىرۋشىلەرى ءوز ءونىمىن دەلدالسىز تىكەلەي ساتىپ, سونىڭ سالدارىنان ءونىم باعاسى نارىقتىق باعادان 10-20 پايىزعا تومەن بولدى.
«استانا ارەنا» ستاديونىنىڭ جانىندا تاڭعى ساعات 9.00-دە باستالعان جارمەڭكە الاڭىندا جۇرتتىڭ قاراسى قالىڭ بولىپ, ساۋدا قىزا ءتۇستى.
وڭتۇستىكتەگى ەڭبەككەرلەر 84 توننا كوكونىس, 62 توننا جەمىس-جيدەك, 48,7 توننا كارتوپ, 41,5 توننا ەت, 9 توننادان استام ءسۇت ونىمدەرى, 8 توننا بالىق, 500 كەلى بال, سونداي-اق وسى وبلىستاردا وندىرىلەتىن 189 توننا وزگە دە ءونىمدى اكەلىپتى.
جالپى, جارمەڭكەگە جەتىسۋ مەن الماتى وبلىسىنان بارلىعى 500 تونناعا جۋىق ءونىم جەتكىزىلدى.
«وتكەندە قىزىلوردالىقتاردان بالىق العان ەدىم. بۇل جولى جەتىسۋدىڭ بالىعىن الدىم. ودان بولەك, الاتاۋدىڭ توپىراعىنان ءنار العان كارتوبىن ساۋدالادىم» دەدى قالا تۇرعىنى جانار تاڭاتاروۆا.
ەگەر ەلوردادا جيدەك تەرۋ ماۋسىمى اياقتالعان بولسا, بۇل جارمەڭكەدەن جاڭا پىسكەن قۇلپىناي مەن تاڭقۋراي ساتىپ الا الاسىز. كەيبىر ورىنداردا ۇزىن-سونار كەزەك بولىپ: الماتىنىڭ برەندىنە اينالعان اپورت الماسى, قىزاناق, بۇرىش ۇلكەن سۇرانىسقا يە بولدى, ال كارتوپ, پياز, سارىمساق جانە ءسابىزدى قاپ-قاپتاپ اكەتىپ جاتقاندار كوپ بولدى.
سونداي-اق جاڭا, تابيعي ونىمدەر دە نازاردان تىس قالمادى: قولدىڭ سۇزبەسى, قايماق, قىمىز, ماي جانە ت.ب. ساتۋشىلار تارازىنىڭ دۇرىستىعىنا كۇماندانار بولسا, جارمەڭكە اۋماعىندا تەكسەرۋگە بولاتىن تارازى قويىلدى.
ەستەرىڭىزگە سالا كەتەتىنى, 24-25 قىركۇيەكتە باتىس قازاقستان جانە اتىراۋ وبلىسى ونىمدەرىنىڭ جارمەڭكەسى ۇيىمداستىرىلادى.
