استانا ەلدىڭ ساياسي ورتالىعى عانا ەمەس, عىلىمي-اعارتۋشى, رۋحاني-مادەني جانە بۇقارالىق سپورت ورتالىعىنا اينالدى. اسىرەسە ەلدىڭ ابىرويىن اسىرعان سپورتتىق ءىس-شارالار كوپتەپ وتەدى. وعان VII قىسقى ازيا ويىندارىنىڭ ءوتۋى دالەل بولادى. ودان بولەك, بوكس, دزيۋدو, گرەك-ريم, ەركىن كۇرەس, شاحمات, تاعى باسقا سپورت تۇرلەرىنەن الەم جانە ازيا چەمپيوناتىنىڭ بايراعى كوتەرىلدى. ارينە, حالىقارالىق دەڭگەيدەگى جارىستاردى وتكىزەتىن سپورت سارايلارى تالاپقا ساي بولۋى ماڭىزدى. ەلوردا سپورت كەشەندەرىنىڭ ينفراقۇرىلىمىمەن ماقتانا الادى. ءبىز وسىعان توقتالۋدى ءجون كوردىك.
«الاۋ» مۇز ايدىنى
13 جىل بۇرىن ازيا ويىندارى قارساڭىندا ەسىگىن اشقان «الاۋ» جابىق مۇز ايدىنى قىسقى سپورت تۇرلەرىن دامىتاتىن بىرەگەي كەشەنگە اينالدى.
ءۇش مۇناراسىمەن تانىمال عيماراتتىڭ جالپى اۋماعى 65481 شارشى مەتردى قۇرايدى. حالىقارالىق ستاندارت بويىنشا مۇزدى تەز قاتىراتىن تەحنولوگيامەن جابدىقتالدى. ايدىننىڭ ۇزىندىعى – 400 مەتر, كورەرمەن مىنبەرى – 7462 ورىن.
مۇندا ەكى حوككەي كورتى, تورەشىلەر زالى, ءباسپاسوز زالى, ويىن زالى (24×34); اتلەتيكالىق دايارلىق جانە حورەوگرافيا زالى, فيتنەس-ورتالىق, تير, 180 ورىنعا ەسەپتەلگەن مەيرامحانا, 42 بولمەلى شاعىن قوناق ءۇيى بار.
كەشەننىڭ سىرتىندا جازعىتۇرىم اشىق باسسەين, جاعاجاي ۆولەيبولى مەن ميني-فۋتبولعا ارنالعان الاڭى قاراستىرىلعان.
مۇندا 500-گە جۋىق ءجاسوسپىرىم شورت-ترەك, شايبالى حوككەي, دوپتى حوككەي, كيورلينگ, مانەرلەپ سىرعاناۋ جانە تاعى باسقا قىسقى سپورت تۇرلەرىنەن جاتتىعادى.
2011 جىلدان بەرى كۇز-قىس ايلارىندا مۇز ايدىنىنا جاپپاي سىرعاناۋ ماۋسىمى اشىلدى.
جۇيرىكتەر جارىساتىن «سارىارقا»
«سارىارقا» ۆەلوترەگىنە بارعانىمىزدا استانادا Silk Way series Astana I جانە II (CL2) ترەكتەرىندە ۆەلوسپورتتان حالىقارالىق جارىسىنا كۋا بولدىق. وندا قازاقستاننان بولەك, وزبەكستان, يران, ءباا جانە ليتۆا ەلىنىڭ سپورتشىلارى بابىن سىنادى.
2011 جىلى ءپىشىمى ۆەلوشاباندوزدىڭ شلەمىنە ۇقسايتىن سالتاناتى جاراسقان كەشەن اشىلدى. ونىڭ جالپى اۋماعى – 44957 شارشى مەتر, كورەرمەن مىنبەرى – 9195 ورىن. مۇندا ۆەلوسيپەد سپورتىنا ارنالعان ترەكتەن باسقا, مۇز سىرعاناعى, قوناق ءۇي, مەيرامحانا, فيتنەس ورتالىعى, كەڭسە بولمەلەرى, كونفەرەنتس زالدارى, بوكس زالى, گيمناستيكا زالى, ويىن زالى جانە شاعىن فۋتبول الاڭى بار.
12 جىلدان بەرى مۇندا ۆەلوسيپەد سپورتىنان وليمپيادالىق دايارلىق ورتالىعىنىڭ سپورتشىلارى جاتتىعادى.
جانكۇيەرلەر كوپ جينالاتىن «استانا ارەنا»
راسىندا, «استانا ارەنا» فۋتبول ستاديونى – ەلوردالىقتار مەن قالا قوناقتارىنا ەرەكشە اسەرگە بولەيتىن كەشەن. ونى ءوزىم دە سەزىندىم. قازاقستان – بەلارۋس اراسىندا وتكەن ماتچتى جانكۇيەر رەتىندە كورىپ, ۇلتتىق قۇرامانىڭ جەڭىسىنە قاتتى قۋانعانىم ءالى ەسىمدە.
ستاديون ويىن بارىسى بارلىق تاراپتان انىق كورىنەتىن امفيتەاتر ۇلگىسىندە جاسالعان سپورت كەشەنىنىڭ سىيىمدىلىعى – 30000 ورىن. الاڭنىڭ اينالاسىن قورشاي ورناتىلعان استىڭعى تەرراسادا – 15000, ونىڭ ۇستىندەگى باتىس جانە شىعىس بالكوندا 15000 ورىن بار. جابىنى جاساندى ويىن الاڭىنىڭ اۋدانى – 105×65 مەتر.
2011 جىلى ءVىى قىسقى ازيا ويىندارىنىڭ اشىلۋ ءراسىمى وتتى. قازىرگى كەزدە مۇندا قازاقستان سۋپەركۋبوگى مەن پرەمەر-ليگا ويىندارى, ەۋروپا چەمپيوناتى ليگاسىنا ىرىكتەۋ كەزەڭدەرى
ۇيىمداستىرىلادى جانە فۋتبولدان قازاقستان ۇلتتىق قۇراماسى, «استانا» فك-نىڭ ءوز الاڭىنداعى ماتچتارىن قابىلدايدى.
«بارىس – ارەنا» حوككەيشىلەر الاڭى
ەلىمىزدىڭ ابىرويىن اسقاقتاتىپ جۇرگەن «بارىس» حوككەي
كلۋبىنىڭ الاڭى رەتىندە تانىمال «بارىس – ارەنا» سپورت سارايى ءوزىنىڭ ارحيتەكتۋرالىق شەبەرلىگىمەن قىزىقتىرادى.
بۇل كەشەندە «بارىس», «نوماد», «توميريس» جانە مەكتەپ كوماندالارى دا جاتتىعادى. قازىر ماۋسىمنىڭ اياقتالۋىنا بايلانىستى «بارىس» حوككەي كومانداسى دەمالىستا, جاڭا ماۋسىم شىلدە ايىندا اشىلادى.
وليمپيادالىق تالاپتارعا ساي سالىنعان كەشەننىڭ قۇرىلىسى 2012 جىلى باستالىپ, 2015 جىلى پرەزيدەنت كۋبوگىمەن سالتاناتتى تۇردە ەسىگىن اشتى.
سپورت كەشەنىندە 5 جاستان 16 جاسقا دەيىنگى بالالار جانە جاسوسپىرىمدەر مەكتەبى جۇمىس ىستەيدى. ستاديون 12000 كورەرمەنگە ارنالعان.
اتاقتى پالۋان سارايى
الەمدىك جارىستار وتكىزىلەتىن «جەكپە-جەك» سارايى 2019 جىلى حالىقارالىق سپورت فەدەراتسياسىنىڭ ستاندارتتارى مەن تالاپتارىنا سايكەس سالىنعان.
سپورت كەشەنىندە جەكپە-جەكتىڭ بارلىق تۇرلەرىنەن حالىقارالىق جارىستار وتكىزىلەدى. سونىمەن قاتار بوكس, كۇرەس, دزيۋدو, اۋىر اتلەتيكا سەكىلدى سپورت تۇرلەرىنىڭ بارلىعىنان حالىقارالىق جارىستار وتكىزۋگە دە بولادى.
ال سپورت زالى 5 مىڭ ادامعا ارنالعان. سونىمەن قاتار 25 مەترلىك باسسەين, فيتنەس-ورتالىعى, قوناقۇي مەن شاعىن فۋتبول الاڭى دا بار.
2020 جىلى «جەكپە-جەك» سارايىنا ماسكەۋ وليمپياداسىنىڭ چەمپيونى جاقسىلىق ۇشكەمپىروۆتىڭ ەسىمى بەرىلدى.
شىنار ءابيىر,
ل.گۋميلەۆ اتىنداعى
ەۋرازيا ۇلتتىق ۋنيۆەرسيتەتىنىڭ 2-كۋرس ستۋدەنتى
