ەلوردادا ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ قولداۋىمەن مۇمكىندىگى شەكتەۋلى ادامدارعا ارنالعان جۇمىس جارمەڭكەسى ءوتتى.
مۇگەدەكتىگى بار ازاماتتاردى كاسىبي وڭالتۋ ورتالىعىنىڭ الەۋمەتتىك قىزمەتكەرى ايدانا ماكىشەۆانىڭ ايتۋىنشا, بۇگىنگى تاڭدا مۇمكىندىگى شەكتەۋلى ادامدارعا ارنالعان بوس ورىندار كورمە-جارمەڭكەسى ءۇشىنشى رەت وتكىزىلىپ جاتىر.
– مۇنىڭ الدىندا ۇيىمداستىرىلعان كورمە-جارمەڭكەگە 180-گە جۋىق مۇگەدەكتىگى بار ادام قاتىسقان بولاتىن. بۇگىنگى ءىس-شاراعا 30-عا جۋىق جۇمىس بەرۋشىلەرمەن بىرگە 100-دەن استام مۇمكىندىگى شەكتەۋلى جان جۇمىس ىزدەپ كەلدى, – دەدى ايدانا ماكىشەۆا.
ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ قولداۋىمەن وتكەن ءىس-شارانى مۇگەدەكتىگى بار ازاماتتاردى كاسىبي وڭالتۋ ورتالىعى ۇيىمداستىردى. بۇل مەكەمە 2020 جىلدان بەرى جۇمىس ىستەيدى. مۇگەدەكتىگى بار ازاماتتاردى كاسىبي وڭالتۋ ورتالىعى ەرەكشە قاجەتتىلىكتەرى بار جانداردىڭ جۇمىسقا تۇرۋىنا جاردەمدەسىپ, ولاردى جارتى جىل بويى سۇيەمەلدەيدى.
مامانداردىڭ مالىمدەۋىنشە, بۇگىندە بوس ورىندارعا سۇرانىس كوپ. جۇمىس ورنى ءار ادامنىڭ مۇگەدەكتىك توبىنا سايكەس بولۋى ءتيىس. بىراق كەيدە ۆاكانسيالار ول تالاپتارعا ساي كەلمەي جاتادى. سوندىقتان كەيبىر ەرەكشە قاجەتتىلىكتەرى بار جاندار ءۇشىن بوس ورىن تابۋ قيىن كورىنەدى. بۇل جارمەڭكەگە ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە ينكليۋزيۆتى ءبىلىم الاتىن ستۋدەنتتەر دە قاتىستى.
– جالپى ۋنيۆەرسيتەت بويىنشا ينكليۋزيۆتى ءبىلىم الۋ كاتەگورياسىنا جاتاتىن 134 ءدارىس الۋشى بار. سونىڭ 33-ءى بيىل وقۋ بىتىرەدى, 2-ەۋى دوكتورانتۋرادا, قالعاندارى باكالاۆريات بويىنشا وقۋىن ءتامامداپ جاتىر. سونداي-اق ينكليۋزيۆتى قولداۋ قىزمەتى وقۋ بىتىرگەننەن كەيىن ءارى قاراي جۇمىسقا ورنالاسۋىنا ءبىزدىڭ سەرىكتەس مەكەمەلەرمەن بىرىگىپ مەموراندۋمعا قول قويدى, – دەدى ل.گۋميلەۆ اتىنداعى ەۋرازيا ۇلتتىق ۋنيۆەرسيتەتى جاستار دەپارتامەنتىنىڭ ديرەكتورى جامبىل تىلەپوۆ.
