ەرىكتىلەر ءىسى ەرەن

قازاقستان-سولتۇستىك يرلانديا فۋتبول ماتچىنان كەيىن ەلوردانىڭ ەرىكتى جاستارى ستاديوندى جيناۋعا كومەكتەستى. ەلىمىزدە ەرىكتىلەر قوزعالىسىنا ەرەكشە ءمان بەرىلەدى. حالىقارالىق ۆولونتەرلەر فورۋمىنىڭ استانادا وتكەنى دە سونىڭ ءبىر ايعاعى. سول جيىندا مەملەكەت باسشىسى قاسىم-جومارت توقاەۆ سوڭعى ءۇش جىلدا ەلىمىزدە ەرىكتىلەر سانى ءۇش ەسەگە كوبەيگەنىن اتاپ وتكەن ەدى. استانادا «ۆولونتەرلىكتى دامىتۋدىڭ جول كارتاسى» قابىلدانعان. 30-عا جۋىق ۇيىم بەلسەندى جۇمىس جۇرگىزەدى.

الەمنىڭ 34 ەلىنىڭ بەلسەندى ۆولونتەرلەرى العاش رەت ەلورداداعى حالىقارالىق ۆولونتەرلەر فورۋمىندا باس قوسقان ەدى. جيىندا ءسوز سويلەگەن مەملەكەت باسشىسى قاسىم-جومارت توقاەۆ سوڭعى ءۇش جىلدا ەلىمىزدە ەرىكتىلەر سانى ءۇش ەسە كوبەيگەنىن ايتتى. بۇگىندە رەسپۋبليكا بويىنشا 680-گە جۋىق ۆولونتەرلىك ۇيىم جانە 200 مىڭنان اسا ەرىكتى بار.

تۇركىستان قالاسىندا وتكەن ۇلتتىق قۇرىلتايدا دا پرەزيدەنت ۆولونتەرلىك قوزعالىستىڭ وتانشىلدىق رۋحتى كوتەرۋدەگى ماڭىزىن ايرىقشا اتاپ: «مەن ەرىكتىلەر تۋرالى ۇنەمى ايتىپ ءجۇرمىن. سەبەبى ەرىكتىلەر – ەڭ الدىمەن, پاتريوت جاندار. ولار ەلىمىزدىڭ دامۋىنا, ونىڭ كەلبەتىن جاقسارتۋعا زور ۇلەس قوسىپ جاتىر. ءبىز بۇكىل قوعام بولىپ ەرىكتىلەردى قولداۋىمىز كەرەك, ولاردىڭ ەڭبەگىن باعالاپ, ماراپاتتاپ وتىرۋ قاجەت» دەدى.

قازاقتا بۇرىننان اسار جاساپ, ەش اقىسىز ءبىر-بىرىنە كومەكتەسىپ, قولداۋ كورسەتۋ ءداستۇرى بۇگىنگى ۆولونتەرلىكپەن ۇندەسەتىنى ءسوزسىز. كۇنى كەشە عانا ەلوردادا وتكەن قازاقستان مەن سولتۇستىك يرلانديانىڭ ويىنىنان كەيىن «استانا ارەنا» ستاديونىندا بوتەلكە, پلاستيك, ءتۇرلى قاعازدى قالدىرعان كورەر­مەن از بولعان جوق. ال سول قوقىس­تى تازالاپ, جانكۇيەر­لەردى تازالىققا شاقىرعان ەلوردالىق ەرىكتىلەر بولدى. «استانا جاستارى» ەرىكتىلەرىنىڭ بۇل ءىسىن پرەزيدەنت ايرىقشا اتاپ ءوتىپ, العىسىن بىلدىرگەنى بار. ءيا, جان دۇنيەسىنىڭ قالاۋىمەن جاقسى ىسكە جۇمىلعان جاستار جۇزدەپ سانالادى. باس قالادا قازىر 30-عا جۋىق ەرىكتىلەر قوزعالىسى بار. ولارعا 40 مىڭنان اسا ادام بەلسەندى تۇردە قاتىسادى. «استانا جاستارى» رەسۋرستىق ورتالىعى ۆولونتەر قوزعالىسىن دامىتۋ ءبولىمىنىڭ باسشىسى ەلۆيرا ەسمۇحانوۆانىڭ سوزىنشە, ورتالىق بازاسىندا ۆولونتەرلەر جىلى اياسىندا جانە 2021-2023 جىلدارى ۆولونتەرلىكتى دامىتۋدىڭ «جول كارتاسىن» ورىنداۋ شەڭبەرىندە قالالىق ۆولونتەرلەر شتابى جۇمىس ىستەيدى. تۇراقتى تۇردە 30 ۆولونتەرلىك ۇيىممەن جانە 20 باستاماشىل توپپەن, 4 ۇەۇ-مەن بىرلەسە قىزمەت اتقارۋدا. شتابتا 5 مىڭنان اسا بەلسەندى ۆولونتەر بار.

جاستاردىڭ بەلسەندىلىگى بايقالادى

«ەرىكتى بولعىسى كەلەتىندەر سانى ارتىپ كەلەدى. اسىرەسە جاسوسپىرىمدەر تاراپىنان قىزىعۋشىلىق ەرەكشە بايقالادى. ءبىرى شىن پەيىلىمەن وزگەلەرگە كومەكتەسكىسى كەلەدى, ەندى ءبىرى جاڭا ورتا تابۋعا ۇمتىلادى, ۋاقىتىن ءتيىمدى وتكىزگىسى كەلەدى. جاستار event-ۆولونتەرلىك, الەۋمەتتىك ۆولونتەرلىك, eco-ۆولونتەرلىك جانە ادامداردى ىزدەۋ سەكىلدى بىرنەشە باعىتتا جۇمىلدىرىلادى. دالىرەك ايت­قاندا, event باعىتى حالىقارالىق دەڭگەيدەگى جيىندارعا ارنالسا, كەيىنگىسىندە جاستار الەۋمەتتىك ماڭىزى بار باستامالاردا قىزمەت ەتەدى. ال eco ءبولىمىنىڭ ەرىكتىلەرىنە تابيعاتتى ايالاپ, قورشاعان ورتانى قورعاۋ مىندەتى تاپسىرىلادى. ءىز-ءتۇسسىز جوعالعان جانداردى دا تابۋعا كومەكتەسەدى» دەدى ە.ەسمۇحانوۆا.

اتالمىش ورتالىق بيىل ۆولونتەرلەرمەن بىرگە 1000-نان اسا ءىس-شارا وتكىزدى. دزيۋدودان ازيا چەمپيوناتى, «Kazakhstan Security System» فورۋمى, «Eurasian Book Fair», ناۋرىز «ەكسپو» سياقتى حالىقارالىق اۋقىمداعى ءىس-شارالارعا ۇنەمى قاتىسادى. سونداي-اق پوليتسيا دەپارتامەنتى, تجد-مەن بىرلەسىپ گازداندىرۋ تۋرالى حالىقتى اقپاراتتاندىرۋ, جىلىتۋ ماۋسىمى مەن كوكتەمگى سۋ تاسقىنى كەزىندەگى قاۋىپسىزدىك شارالارى, شومىلۋ ماۋسىمىنداعى مىنەز-قۇلىق ەرەجەلەرى, حالىق ساناعى ماسەلەسى بويىنشا حالىققا اقپاراتتىق-ءتۇسىندىرۋ جۇمىستارىن تۇراقتى نەگىزدە جۇرگىزەدى جانە ەسىرتكى ساتۋ تۋرالى مالىمەتتەرى بار قابىر­عالاردى بوياۋعا كومەكتەسەدى.

«ماسەلەن, «ادرەسا زابوتى» جوباسى اياسىندا «استانا جاستارى» ۆولونتەرلەرى جالعىزباستى 40 زەينەتكەردىڭ جەكە اۋلاسىن تازالاۋعا قول ۇشىن سوزدى. كاسىپورىندار مەن ۆولونتەرلىك ۇيىمدار قار تازالاۋ بويىنشا 20 اكتسيا ۇيىم­داستىردى. وعان 2 مىڭنان اسا ۆولونتەر مەن كاسىپورىن قىزمەتكەرى جۇمىلدىرىلدى. بۇگىندە ۆولونتەرلىك ۇيىمدارمەن بىرلەسىپ «BizBirgemiz», «قاۋىپسىز قالا», «قامقورلىق مەكەنجايلارى», «ارداگەرلەردى ارداقتايىق», «Taza Alem» سەكىلدى مىڭعا جۋىق اكتسيا وتكىزىلدى. مۇقتاج جاندارعا ازىق-تۇلىك سەبەتتەرىن تاراتۋ, كيىم-كەشەك جانە جيھازبەن قامتاماسىز ەتۋ, وقىتۋ جانە تاعى باسقا دا كومەك تۇرلەرى كورسەتىلدى. «Taza Alem» ەكولوگيالىق جوباسى دا قارقىندى جۇزەگە اسىپ كەلەدى. بۇگىندە ۆولونتەرلەر اتالمىش اكتسيا اياسىندا وزەن جاعاسىن, اقبۇلاقتىڭ ساعالارىن تازارتتى» دەدى ۆولونتەر قوزعالىسىن دامىتۋ ءبولىمىنىڭ باسشىسى.

ۆولونتەرلىك جاس تالعامايدى

قوعامدىق جۇمىستارعا بەلسەندى ارالاسۋ ءۇشىن ادەتتە 14-17 جاس ارالىعىنداعى جاستار نيەت بىلدىرەتىن كورىنەدى. سەبەبى بۇل – ولاردىڭ بىلۋگە, كورۋگە, جاڭا ورتامەن ارالاسىپ, بوس ۋاقىتتى ءتيىمدى پايدالانۋعا ۇمتىلاتىن كەزەڭى. دەسە دە جۇرتقا جاردەم بەرۋ, كوپكە كومەك كورسەتۋ جاس تاڭدامايدى. قازىر ەرىكتىلەردىڭ ساپىن تۇزەگەندەردىڭ باسىم بولىگى – 29 بەن 54 جاس ارالىعىنداعى ازاماتتار. بۇل ۆولونتەرلىك تەك جاستاردىڭ ءىسى دەگەن تاپتاۋرىن تۇسىنىكتى ىعىستىرىپ شىعاردى. سونداي جانداردىڭ قاتارىندا بۇۇ-داعى قازاقستاننان شىققان العاشقى حالىقارالىق ۆولونتەر تەلجان جۇنىسبەكوۆ بار. قايىرىمدى جاننىڭ باستى ۇستانىمى – «كەڭ بولساڭ, كەم بولمايسىڭ». «ۆولونتەرلىك قوزعالىستىڭ پايداسى قانداي, جاستارعا بەرەرى نە؟» دەگەن ساۋالدى بەلگىلى ەرىكتىگە قويعان ەدىك.

– ۆولونتەرلىك جەتكىنشەكتەردىڭ بويىنداعى جالقاۋلىقتان ارىلۋعا كومەكتەسەدى, وزگەلەرگە كومەك كورسەتۋدەن ازاماتتىڭ ادامگەرشىلىك سەزىمى ويانادى. ولار تەگىن جۇمىس ىستەسە دە, قوعامنىڭ دامۋىنا اسەر ەتىپ وتىر. ەرىكتى بولۋ ادامنىڭ سانا-سەزىمىن كەڭەيتەدى, ادام كوپشىل, جاناشىر بولادى. ءوز باسىم افريكا ەلدەرىندە جۇمىس ىستەپ, كوپ جاننىڭ العىسىنا بولەندىم. ەرىكتى ءۇشىن ودان اسقان ماراپات جوق, – دەدى ت.جۇنىسبەكوۆ.

ەرەكشە مەكتەپتەن وتەدى

جاقىندا استانادا ورتالىق ازيا ەلدەرىنە ورتاق كەڭسە –  حالىقارالىق ۆولونتەرلەر ورتالىعى اشىلدى. مۇندا ءاربىر ەرىكتى ءوز باستاماسىن جۇزەگە اسىرا الادى. ال «جاستارعا بۇل قىزمەتتىڭ قىر-سىرىن ۇيرەتەتىن, تاربيەلەپ, وقىتاتىن مەكەمە بار ما؟» دەگەن سۇراعىمىزعا استانا قالاسىنىڭ جاستار ساياساتى باسقارماسىنىڭ باسشىسى قايرات قامباروۆ جاۋاپ بەرىپ, قازىر «ۆولونتەرلەر مەكتەبى» جۇمىس ىستەپ تۇرعانىن ايتتى. مۇندا ءتۇرلى سالانىڭ ماماندارى شاقىرىلىپ, كونفليكتولوگيا, پسيحولوگيا ساباقتارىن وقىتىپ, قالانىڭ كورىكتى جەرلەرىنىڭ تاريحى تۋرالى, وزگە ەلدەردىڭ ازاماتتارىنىڭ مەنتاليتەتىن زەرتتەۋ بويىنشا دارىستەر ءوتىپ قانا قويماي, العاشقى مەديتسينالىق كومەك كورسەتۋدىڭ جولدارىنا دەيىن ۇيرەتەدى ەكەن. مۇنىڭ ءبارى ۆولونتەرلەرگە قيىندىقتاردىڭ الدىن الۋعا ىقپال ەتەدى. «ەرىكتىلەر مەكتەبى» جوباسى جاقىندا باستاۋ الادى. تولىق اقپاراتتى «استانا جاستارى» جرو بىلۋگە بولادى.

«ەكى جىلدان اسا ۋاقىت ەرىكتىلەر قاتارىندامىن. مەن ءۇشىن بۇل ءومىرىمنىڭ ءبىر بولشەگى. شاراپاتقا مۇقتاج ادامعا دەمەۋ بولىپ, قاريالاردىڭ باتاسىن الۋ ارقىلى ىنتام ارتىپ, العا قاراي جۇرۋگە ۇمتىلدىم. ارينە, ۆولونتەرلىك ۇيىمداردىڭ بولاشاقتا قارجىلىق جاعىنان تاۋەلسىز بولعانىن قالايمىن. سەبەبى كەي ۇيىمدار ءۇشىن دەمەۋ­شىلىك قاراجات تارتۋ قيىنعا سوعادى» دەدى ءوز سوزىندە ەلوردالىق ەرىكتى نۇرگۇل مۇراتباي.

ەرىكتىلەردىڭ جوبالارىن قولداۋ ماقساتىندا قالالىق جاستار ساياساتى ماسەلەلەرى باسقارماسىمەن ءۇش جىل قاتارىنان «ۆولونتەرلىك باستامالاردى قولداۋعا باعىتتالعان شاعىن گرانت» جوباسى ىسكە اسىرىلۋدا. 2022 جىلى 98 قاتىسۋشى اراسىنان توپ جارعان 20 جەڭىمپاز انىقتالىپ, ولارعا 350 مىڭ تەڭگە كولەمىندە شاعىن گرانتتار بەرىلدى. جوبا بيىل دا جالعاسىن تابادى.

ر.S: استانانىڭ ايشىقتى كەلبەتىن ادامگەرشىلىككە نەگىزدەلگەن جاناشىر ىستەر جاقسارتا تۇسۋدە. سان عاسىر بويى ساباقتاسىپ كەلە جاتقان جومارتتىقتىڭ ءتىنى وسىلايشا بىرىككەن بىرلىككە, ۇيىعان ۇيىمشىلدىققا ۇلاسىپ, كەيىنگى بۋىننىڭ ىزگىلىك وتىن لاۋلاتىپ, جالعاستىرىپ كەلە جاتقانى قۋانتادى.