كەشە استانا قالالىق كوممۋنيكاتسيالار قىزمەتىندە ەلوردا ءماسليحاتىنىڭ توراعاسى ەرلان كاناليموۆتىڭ قاتىسۋىمەن بريفينگ ءوتتى. ول استانانى جايلى جانە قاۋىپسىز قالاعا اينالدىرۋ ءۇشىن قولايلى ورتا قالىپتاستىرۋ, سونداي-اق الەۋمەتتىك ماسەلەلەردى شەشۋ باعىتىندا جۇرگىزىلىپ جاتقان جۇمىستار تۋرالى ايتىپ, جۇرتشىلىقتى تولعاندىرعان ساۋالدارعا جاۋاپ بەردى.
«بيىل وتكەن ءماجىلىس پەن بارلىق دەڭگەيدەگى ماسليحاتتارعا سايلاۋ مەملەكەت باسشىسى ايتقان ساياسي جانە كونستيتۋتسيالىق رەفورمالاردىڭ قيسىندى قورىتىندىسى بولدى. وسى وزگەرىستەردىڭ بارلىعى ءماسليحاتتاردىڭ وزدەرىن قالىپتاستىرۋ پروتسەسىن جاڭارتتى دەۋگە تولىق نەگىز بار. ەگەر بۇرىن ۇمىتكەرلەر تەك پارتيالىق تىزىمدەر بويىنشا تاڭدالسا, ەندى ءبىر مانداتتى وكرۋگتەر بويىنشا سايلانادى. قازىر ەلوردانىڭ ءماسليحاتىندا Amanat, «اق جول», «بايتاق» جانە «قازاقستان حالىق پارتياسىنان» 34 دەپۋتات بار» دەدى ە.كاناليموۆ.
ءماسليحات توراعاسىنىڭ ايتۋىنشا, تۇرعىندارمەن كەزدەسۋلەردە, نەگىزىنەن, كوممۋنالدىق-تۇرمىستىق ماسەلەلەر ايتىلادى: قوعامدىق كولىك جۇمىسى, اباتتاندىرۋ, كوگالداندىرۋ, قوقىس شىعارۋ.
«ءماسليحات دەپۋتاتتارى الەۋمەتتىك جاعىنان از قامتىلعان وتباسىلارعا تۇرعىن ۇيلەردى گازداندىرۋعا ماتەريالدىق كومەك مولشەرىن 130 اەك-كە بەكىتتى. كوپتەگەن وتباسىنىڭ بۇل كومەككە قولى جەتتى. سونىمەن قاتار, قاجەتتى قۇجاتتار ءتىزىمى قىسقاردى» دەپ ءتۇسىندىردى ءماسليحات توراعاسى.
ول استانالىق پوليتسيا بىلىكتى كادرلاردىڭ, اتاپ ايتقاندا, ۋچاسكەلىك, مەكتەپ جانە كامەلەتكە تولماعاندار جونىندەگى ينسپەكتورلاردىڭ تاپشىلىعىن سەزىنىپ وتىرعانىن ايتتى.
«پۋنكتتەر مەن ستاتسيونارلىق مودۋلدىك بەكەتتەردى اشۋ قاجەت. توتەنشە جاعدايلار دەپارتامەنتىنىڭ ماتەريالدىق-تەحنيكالىق بازاسىن جانە جەكە قۇرامىن الەۋمەتتىك قولداۋ بويىنشا جۇمىستار جۇرگىزىلۋدە. ءورت ءسوندىرۋ بولىمدەرىنىڭ عيماراتتارىندا جوندەۋ جۇمىستارى جۇرگىزىلىپ, ءورت ءسوندىرۋ دەپولارى سالىنۋدا, قاجەتتى جابدىقتار ساتىپ الىنۋدا, الەۋمەتتىك ماسەلەلەر شەشىلۋدە: قۇتقارۋشىلاردىڭ بالالارى لاگەرلەرگە جىبەرىلىپ, وتباسىلارعا پاتەر ساتىپ الۋعا سەرتيفيكاتتار بولىنۋدە» دەدى ول.
ءماسليحات توراعاسى مەكتەپتەر مەن ستۋدەنتتىك جاتاقحانالاردىڭ قۇرىلىسىنا جەكە توقتالدى.
«Amanat پارتياسى ەلوردالىق فيليالىنىڭ سايلاۋالدى باعدارلاماسىن ورىنداۋ بويىنشا جول كارتاسى اياسىندا استانادا 2027 جىلعا دەيىن 53 مەكتەپ سالۋ جوسپارلانعان. ولاردىڭ 11-ءى بيىل سالىنادى. الەۋمەتتىك نىسانداردىڭ قاجەتتىلىكتەرىن ەسكەرە وتىرىپ, قالانىڭ بارلىق اۋدانىندا ورنالاساتىن بولادى. «جايلى مەكتەپ» قاناتقاقتى جوباسى اياسىندا 2025 جىلعا دەيىن 89 مىڭ ورىندىق 24 مەكتەپتى پايدالانۋعا بەرۋ جوسپارلانۋدا» دەدى ە.كاناليموۆ.
ونىڭ ايتۋىنشا, بيىل ەلوردانىڭ بارلىق مەملەكەتتىك مەكتەپتەرىنىڭ باستاۋىش سىنىپ وقۋشىلارى تەگىن ىستىق تاماقپەن قامتاماسىز ەتىلەدى. حالىقتىڭ الەۋمەتتىك وسال توپتارى ساناتىنداعى 5-11-سىنىپ وقۋشىلارى مەكتەپ اسحانالارىندا جەڭىلدىك نەگىزىندە تاماقتانۋدى جالعاستىرۋدا.
«وتكەن جىلى مەنەدجمەنت, بيزنەس جانە ءبىلىم كوللەدجى ستۋدەنتتەرىنە ارنالعان جاتاقحانا اشىلدى. جاقىندا پوليتەحنيكالىق كوللەدجدە زاماناۋي شەبەرحانالارى بار جاتاقحانا پايدالانۋعا بەرىلەدى. دەپۋتاتتىق كورپۋستىڭ كۇش-جىگەرىنىڭ باسىم بولىگى ەلوردادا 16 تۇرعىن ءۇي الاپتارىنىڭ تۇرعىندارى ءۇشىن قولايلى جاعدايلاردى جاقسارتۋعا باعىتتالعان. بيىل «ۇركەر» تۇرعىن الابىندا دەنە شىنىقتىرۋ-ساۋىقتىرۋ كەشەنى اشىلدى. مۇندا حقكو, پوليتسيا پۋنكتى, قارتتارعا ارنالعان كلۋب, بالالارعا ارنالعان قىسقا مەرزىمدى بولمەلەرى جانە ت. ب. قاراستىرىلعان» دەپ جالعادى ءسوزىن سپيكەر.
ۇلەستىك قۇرىلىس ماسەلەسى ەلوردا اكىمى مەن ءماسليحاتتىڭ تۇراقتى باقىلاۋىندا. 2019 جىلى استانادا 150-گە جۋىق پروبلەمالى تۇرعىن ءۇي بولعان. وسى جىلدىڭ باسىندا قۇرىلىس كەزەڭىندە 32 ءۇي بولدى.
«مەملەكەت باسشىسىنىڭ تاپسىرماسىنا سايكەس, اعىمداعى جىلى 16 نىساننىڭ قۇرىلىسى اياقتالعان سوڭ, 6 نىساندا 1500-گە جۋىق ۇلەسكەر ءوز پاتەرىنىڭ كىلتىن الادى» دەدى ءماسليحات توراعاسى.
2600 ۇلەسكەرگە اعىمداعى جىلدىڭ سوڭىنا دەيىن پاتەر كىلتى تاپسىرىلادى.
