جىل سايىن تامىز ايىنىڭ ءار ءۇشىنشى سەنبىسىندە حالىقارالىق قاڭعىباس جانۋارلاردى قورعاۋ كۇنى اتالىپ وتەدى. ەلوردادا بۇل ماسەلەگە ەرەكشە كوڭىل ءبولىنىپ كەلەدى.
استانا قالاسى اكىمىنىڭ باستاماسىمەن ەلوردادا 2020 جىلدان باستاپ جانۋارلاردى قورعاۋ ماسەلەلەرى جونىندەگى كەڭەس جۇمىس ىستەيدى. ونىڭ قۇرامىنا زووباق ۇيىمدارىنىڭ وكىلدەرى, قوعام قايراتكەرلەرى, ۆەتەرينارلار كىرەدى. بۇگىندە ولارعا ەرىكتىلەر دە جاردەمدەسۋدە. ەلوردا ەرىكتىلەرى قاراۋسىز جۇرگەن يتتەر مەن مىسىقتاردى تاماقتاندىرىپ, كۇتۋگە كومەكتەسەدى.
بۇگىندە استانا بويىنشا 6 بريگادا قاراۋسىز جۇرگەن جانۋارلاردى ۇستاۋمەن اينالىسادى: ءار اۋدانعا ءبىر-بىردەن جانە تاعى ءبىر جەدەل ارەكەت ەتۋ بريگاداسى بار.
جالپى ەلوردادا 2017 جىلدان باستاپ وسى ماقساتتا ەرەكشە ادىستەر قولدانىلىپ كەلەدى. وندا تور, تۇزاق, جەم قولدانىلادى.
ۇستالعان يتتەر مەن مىسىقتار يەسىنە قايتارىلعانعا دەيىن نەمەسە ءۇشىنشى تۇلعاعا بەرىلگەنگە دەيىن ۋاقىتشا ۇستاۋ پۋنكتىندە 60 كۇن بولادى. بۇل رەتتە تالاپ مەموراندۋم اياسىندا «اۋلاۋدى توقتات!» زووقورعانىس ۇيىمىنا بەرىلەدى. 60 كۇن ىشىندە دەگەلمينتيزاتسيا, قۇتىرۋعا قارسى ۆاكتسيناتسيا جانە چيپتەۋ سياقتى ءتيىستى ۆەتەرينارلىق-پروفيلاكتيكالىق شارالار جۇرگىزىلەدى.
قازىرگى تاڭدا ۋاقىتشا ۇستاۋ پۋنكتىندە 3000-نان استام يت پەن 200 مىسىق بار. قاڭعىباس جانۋارلارعا قاتىستى ماسەلەنى شەشۋدىڭ نەگىزگى ءادىسىنىڭ ءبىرى – ولاردى زارارسىزداندىرۋ. سوڭعى ءۇش جىلدا 9500 جانۋار زارارسىزداندىرىلدى.
