ەلورادادا ءدىن ماسەلەلەرى بويىنشا رەسپۋبليكالىق اقپاراتتىق-ءتۇسىندىرۋ توبى مۇشەلەرىنىڭ قاتىسۋىمەن رۋحاني-ادامگەرشىلىك قۇندىلىقتاردى قالىپتاستىرۋ جانە دۇرىس ءدىني باعىتتى ناسيحاتتايتىن سەمينارلار ءوتتى.
حالىقتىڭ ءدىني ساۋاتتىلىعىن ارتتىرۋ, قوعامدا ءداستۇرلى رۋحاني-ادامگەرشىلىك قۇندىلىقتاردى قالىپتاستىرۋ, ءدىني ەكسترەميزمنىڭ الدىن الۋ ماقساتىندا وتكىزىلگەن بۇل شارانى استانا قالاسى اكىمدىگىنىڭ ءدىن ىستەرى باسقارماسى مەن دىندەردى زەرتتەۋ ورتالىعى بىرلەسىپ وتكىزدى.
ءىس-شارا سپيكەرلەرى رەتىندە بىلىكتى ءدىنتانۋشىلار, ءدىن سالاسىنداعى رەسپۋبليكالىق اقپاراتتىق-ءتۇسىندىرۋ توبىنىڭ تەولوگتارى, اتاپ ايتقاندا, پسيحولوگ, ل.گۋميلەۆ اتىنداعى ەۇۋ «پسيحولوگيا» كافەدراسىنىڭ وقىتۋشىسى ا.نۋريدينوۆ, ەلوردالىق دىندەردى زەرتتەۋ ورتالىعىنىڭ تەولوگ مامانى ا.نۇراحمەتۇلى, PhD دوكتور, يسلامتانۋشى ي.بەرداليەۆ, پسيحولوگ ج.سىدىقوۆا, يسلامتانۋشى ت.قوجاحمەتوۆا, س.روزا جانە ت.ب. ءسوز سويلەدى.
شاراعا ستۋدەنتتەر, وقىتۋشىلار, اسكەري قىزمەتشىلەر, سپورتشىلار, جاتتىقتىرۋشىلار, ساۋداگەرلەر, كاسىپورىن قىزمەتكەرلەرى جانە جەكە كاسىپكەرلەر قاتىستى.
– ءبىر اپتا ۋاقىتقا جوسپارلانعان بۇل شارا الداعى جۇما كۇنى اياقتالادى. استانا قالاسىنداعى مەملەكەتتىك مەكەمەلەردە, وقۋ ورىندارىندا, ساۋدا-ساتتىق ورتالىقتارىندا, اسكەري بولىمدەردە لەكتسيا وقىپ, قاراپايىم حالىققا ءدىني ماسەلەلەردى ءتۇسىندىرىپ, ءداستۇرلى ءدىنىمىز بەن كەرىتارتپا اعىمداردىڭ پارقىن اشىپ ايتتىق. ماقساتىمىز – جۇرتتىڭ جات اعىم جەتەگىندە كەتۋىنىڭ الدىن الۋ, – دەيدى استانا قالالىق دىندەردى زەرتتەۋ ورتالىعىنىڭ تەولوگ مامانى ارمان نۇراحمەتۇلى
