– ءبىلىم سالاسى – مەملەكەت باسشىسىنىڭ ۇنەمى باستى نازارىندا. جولداۋدا كوپتەگەن يگى باستاما ايتىلعانى ءمالىم. ەگەمەندى ەلىمىزدىڭ الدىڭعى قاتارلى مەملەكەتتەردىڭ قاتارىنا قوسىلۋىنا قىزمەت ەتەتىن بولاشاق ۇرپاقتى الەمدىك دەڭگەيدە ءبىلىم بەرۋ, ءبىلىم مازمۇنىنا جاڭاشا قاراۋ – باستى مىندەتتىڭ ءبىرى.
پرەزيدەنتتىڭ جولداۋىندا مەنى قۋانتقانى – «جايلى مەكتەپ» جوباسى اياسىندا ەلىمىزدە 400-گە جۋىق مەكتەپ سالىناتىنى. سەبەبى ەلىمىزدە دەموگرافيالىق ءوسىمنىڭ ۇلعايۋىنا بايلانىستى, مىسالى, 2027 جىلعا قاراي قازاقستاندا مەكتەپ جاسىنداعى بالالار سانى 5 ملن-عا دەيىن ارتادى دەسەك, سايكەسىنشە, ءبىلىم الاتىن مەكەمەلەردىڭ كوبەيۋى زاڭدى ەمەس پە؟! سونداي-اق اۋىلدىق جەرلەردە 300-دەن استام دەنساۋلىق ساقتاۋ نىسانى سالىنىپ جاتقانى قانشاما سىرقاتتانىپ جۇرگەن جاننىڭ دەرتىن ەمدەيتىنى ءسوزسىز.
مەنى تولعاندىرىپ جۇرگەن ماسەلەنىڭ ءبىرى – يگەرىلمەي جاتقان نەمەسە زاڭسىز بەرىلگەن 8 ميلليون گەكتار جەردىڭ مەملەكەت مەنشىگىنە قايتارىلۋى. بۇل – ناقتى ىسكە اسقان شارالاردىڭ ءبىرى عانا, ودان باسقا اتقارىلعان جۇمىستار كوپ.
«ادىلەتتى قازاقستاندى قۇرامىز دەسەك, ساياسي-ەكونوميكالىق رەفورما جاساۋ جەتكىلىكسىز. ەڭ باستىسى, قوعامدىق سانا, ازاماتتاردىڭ نيەتى وزگەرۋى كەرەك. ونسىز باسقا جۇمىستىڭ ءبارى بەكەر. مەن بۇل تۋرالى ۇلتتىق قۇرىلتايدىڭ ەكىنشى وتىرىسىندا ناقتى ايتتىم. ۇلتتىڭ جاڭا ساپاسىن قالىپتاستىرۋ ەلىمىز ءۇشىن ايرىقشا ماڭىزدى. ءاربىر ازاماتىمىز, اسىرەسە, جاستار ەڭ جاقسى قاسيەتتەردى بويىنا ءسىڭىرۋى قاجەت. ونىڭ ءبارى بىرىگىپ, ءبىرتۇتاس قوعامدىق قاسيەتكە اينالادى. اركىم وتانشىل, ءبىلىمپاز, ەڭبەكقور, ءتارتىپتى, ادال, ءادىل, ۇنەمشىل ءارى جاناشىر بولسا, الىنبايتىن اسۋ جوق. ابايدىڭ «تولىق ادام» ىلىمىنەن باستاۋ الاتىن «ادال ازامات» تۇجىرىمداماسىنىڭ تۇپكى ءمانى – وسى. تاعى دا قايتالايمىن: ادىلەتتى قازاقستان جانە ادال ازامات ۇعىمدارى ەگىز قۇندىلىق رەتىندە ءاردايىم قاتار جۇرۋگە ءتيىس. شىن مانىندە, ادالدىق جوق جەردە ەشقاشان ادىلدىك بولمايدى» دەدى قاسىم-جومارت كەمەلۇلى ءوز جولداۋىندا.
ءاربىر ادام ءىسى مەن ءسوزى ءبىر جەردەن شىعاتىن ادال ازامات بولسا, ادىلدىك ورنايدى.
قازاقستان – ءبىزدىڭ جالعىز عانا وتانىمىز. ونىڭ ىرگەسى بەرىك, كەرەگەسى كەڭ, ءتورت قۇبىلاسى تۇگەل بولۋى – ءوز قولىمىزدا. بابالاردان ميراس بولعان ۇلان-عايىر جەردى قورعاۋ, ونى وركەندەتۋ – ءبىزدىڭ پەرزەنتتىك پارىزىمىز.
سامال نۇعىمانوۆا,
شەيح حاليفا بەن زايد ال-ناحايان اتىنداعى №84 مەكتەپ-ليتسەي ديرەكتورى
