جاقىندا استاناداعى ساكەن سەيفۋللين مۋزەيى جاڭا جادىگەرلەرمەن تولىقتى. الماتىداعى مەملەكەتتىك ورتالىق مۇراجايى قورىندا ساقتالعان ساكەننىڭ جەكە زاتتارى باس قالاداعى ونىڭ مۋزەيىنە تاپسىرىلدى.
اقىننىڭ جارى گۇلباھرام باتىربەكقىزى قايتىس بولعاننان كەيىن, 1979 جىلى ونىڭ نەمەرە ءسىڭلىسى سوفيا ابدۋللاقىزى ساكەن سەيفۋلليننىڭ 21 دانا جەكە بۇيىمدارىن مەملەكەتتىك ورتالىق مۇراجايىنا وتكىزگەن. 1998 جىلى سونداعى ساكەننىڭ جەكە زاتتارىنىڭ 11 داناسى باس قالاداعى ساكەن سەيفۋللين مۋزەيىنە اكەلىنگەن. ال سوفيا باتىربەكوۆا وتكىزگەن بۇيىمداردىڭ قالعان بولىگى بۇگىنگە دەيىن ورتالىق مۇراجايدا بولعان.
ساكەن سەيفۋللين مۋزەيى تاراپىنان جازىلعان توقتاۋسىز سۇرانىستان كەيىن بيىلعى تامىز ايىندا مادەنيەت جانە سپورت ءمينيسترى داۋرەن اباەۆتىڭ ارالاسۋىمەن ساكەن سەيفۋلليننىڭ جەكە بۇيىمدارى اقىننىڭ مۋزەيىنە تولىقتاي اكەلىندى.
بۇل قاتاردا سىرتى ويىلىپ ورنەكتەلگەن كۇمىس تۇز سالعىش جانە 84, 875 پروبالارى بار التىن جالاتىلعان قاسىق, ماسكەۋدەگى د.كۋزنەتسوۆ زاۋىتىندا جاسالعان, سىرتىندا ەكى باستى بۇركىتتىڭ سۋرەتى بار اق فارفور بوكال, سىرتىنا يەروگليفتەر سالىنعان كۇمىس ساۋىتىمەن 200 گرامدىق حرۋستال ستاكان, ءاتىردى سەبۋگە ارنالعان مەلحيور پۋلۆەريزاتور, كۇمىس قاسىق, قىرلى شىنى گرافين, قوڭىراۋى بار مەحانيكالىق ۇستەل ساعاتى بار. بۇل ساعاتتى ساكەن سەيفۋللين 1925 جىلى ورىنبور قالاسىندا ساتىپ الىپ, 1934 جىلى ءىنىسى ماجيتكە سىيعا تارتقان.
جاڭا جادىگەرلەردى تانىستىرۋ شاراسىنا قوعام قايراتكەرلەرى, ساكەنتانۋشى عالىمدار, ساكەن سەيفۋللين اتىنداعى №80 مەكتەپ-گيمنازيا مۇعالىمدەرى مەن وقۋشىلارى قاتىستى. وسى مۋزەيدىڭ تۇڭعىش ديرەكتورى روزا اسىلبەكوۆا, فيلولوگيا عىلىمدارىنىڭ دوكتورى سەرىك نەگيموۆ, ارداگەر ۇستاز وسپان سۇلەيمەنۇلى, ءانشى, ونەرتانۋشى, قازاقستاننىڭ ەڭبەك سىڭىرگەن ءارتىسى سەرىك وسپانوۆ ساكەن تۇلعاسى جايىندا ءسوز ساباقتادى. شارا سوڭى ءان-جىرعا ۇلاستى.
