Amanat توراعاسى ەرلان قوشانوۆ پارلامەنت ماجىلىسىندە پارتيا فراكتسياسىنىڭ جينالىسىن وتكىزدى. وتىرىستا ەلىمىزدەگى وتباسى, انا مەن بالا قۇقىعىن قورعاۋدىڭ قازىرگى جاعدايى تالقىلاندى. سونداي-اق فراكتسيا جۇرتشىلىقپەن بىرلەسىپ ازىرلەگەن بالالاردىڭ قاۋىپسىزدىگىن قامتاماسىز ەتۋ جونىندەگى جاڭا زاڭ جوباسى تانىستىرىلدى.
جيىندى اشقان ەرلان قوشانوۆ جاس ۇرپاقتىڭ بالالىق شاعىنىڭ بارىنشا قاۋىپسىز ءارى باقىتتى بولۋىنا جاعداي جاساۋ مەملەكەت باسشىسى ساياساتىنىڭ جانە Amanat پارتياسى باسىمدىعىنىڭ ءبىرى ەكەنىن اتاپ ءوتتى. ينكليۋزيۆتى ءبىلىم بەرۋ جولعا قويىلىپ كەلەدى, «جايلى مەكتەپ» جوباسى جۇزەگە اسىپ جاتىر, بارلىق باستاۋىش سىنىپ وقۋشىسى تەگىن تاماقپەن قامتاماسىز ەتىلدى, بالالارعا ارنالعان الەۋمەتتىك تولەمدەر ۇلعايۋدا. كەلەر جىلدان باستاپ بۇعان دەيىن بولماعان «ۇلتتىق قور – بالالارعا» جاڭا باعدارلاماسى ىسكە قوسىلادى.
«بالالاردىڭ تولىققاندى ءارى باقىتتى بالالىق شاعى ءۇشىن مەملەكەتتىك دەڭگەيدە بارلىق جاعداي جاسالىپ جاتىر. دەگەنمەن ءالى دە شەشىمىن كۇتىپ وتىرعان ماسەلەلەر بار. سولاردىڭ ءبىرى – بالالاردى زورلىق-زومبىلىقتان قورعاۋ. سوندىقتان پرەزيدەنت قاسىم-جومارت توقاەۆ جولداۋدا بالالاردىڭ قاۋىپسىزدىگىن قامتاماسىز ەتۋ بويىنشا جاڭا زاڭ جوباسىن ازىرلەۋدى تاپسىردى. Amanat پارتياسى جۇرتشىلىقپەن بىرگە وسى زاڭ جوباسىن دايىندادى» دەدى پارتيا توراعاسى.
ەرلان قوشانوۆ بۇعان دەيىن پارتيا الەۋمەتتىك جەلىلەردە بالالاردى قورلاۋمەن كۇرەسۋگە مۇمكىندىك بەرەتىن كيبەربۋللينگكە قارسى زاڭ شىعارۋ باستاماسىن كوتەرگەنىن ەسكە سالدى. سونداي-اق بالالارعا پسيحولوگيالىق جانە وزگە دە كومەك كورسەتۋ ءۇشىن پارتيا جانىنان «111» سەنىم تەلەفونى ۇيىمداستىرىلدى. بۇگىنگە دەيىن «Amanat – 111 جەدەل قىزمەتىن» 47 مىڭنان استام ادام پايدالاندى. بۇل جۇمىستى جاڭا دەڭگەيدە جالعاستىرۋ ءۇشىن وسى جوبانى ۇكىمەتكە بەرۋ ۇيعارىلدى.
جيىن بارىسىندا بالا قۇقىقتارى جونىندەگى ۋاكىل, Amanat پارتياسى جانىنداعى وتباسى جانە حالىقتى الەۋمەتتىك قورعاۋ ماسەلەلەرى جونىندەگى رەسپۋبليكالىق كەڭەستىڭ جەتەكشىسى دينارا زاكيەۆا بالالاردىڭ قاۋىپسىزدىگىن قامتاماسىز ەتۋ جونىندەگى زاڭ جوباسىن تانىستىردى. قۇجاتتا زورلىق-زومبىلىقتان زارداپ شەككەن بالالارعا كومەك كورسەتۋدىڭ بىرىڭعاي باعدارلاماسىن ەنگىزۋ, بالالار ينفراقۇرىلىمىنىڭ قاۋىپسىزدىگىن قامتاماسىز ەتۋ, كامەلەتكە تولماعاندارعا قاتىستى جاسالعان قىلمىس ءۇشىن جازانى قاتاڭداتۋ, وزبىرلىق جاساعان ادامعا پسيحولوگيالىق كومەك كورسەتۋ كۋرسىن ەنگىزۋ بويىنشا نورمالار ازىرلەندى. سونداي-اق كامەلەتكە تولماعاندارعا قاتىستى جاسالعان قاتىگەزدىككە, فيزيكالىق زورلىق-زومبىلىققا بايلانىستى قىلمىستار ءۇشىن تاراپتاردىڭ تاتۋلاسۋىنا مۇمكىندىك بەرىلمەيدى.
جاڭا زاڭ جوباسىندا ۇسىنىلعان وزگەرىستەردىڭ وزەگى مەن ماڭىزىن وقۋ-اعارتۋ ءمينيسترى عاني بەيسەمباەۆ اتاپ ءوتتى. ءىس-شارا بارىسىندا Amanat پارتياسىنىڭ حاتشىسى شولپان كارينوۆا, ءماجىلىس دەپۋتاتى ەدىل جاڭبىرشين, «بالالار قورعاۋىندا» قورىنىڭ ديرەكتورى جانار احمەتوۆا, تۇركىستان وبلىسى بويىنشا بالا قۇقىقتارى جونىندەگى ۋاكىل گۇلجان ۆەروتسكايا, «قورعاۋ-استانا» قب باسشىسى اننا رىل جانە جيىنعا قاتىسقان وزگە دە تۇلعالار زاڭ جوباسىن قولداپ, پىكىر ءبىلدىردى.
فراكتسيا وتىرىسىن قورىتىندىلاي كەلە, پارتيا توراعاسى ەرلان قوشانوۆ زاڭ جوباسىن جۇرتشىلىقپەن جانە مۇددەلى مەملەكەتتىك قۇرىلىمدارمەن كەڭىنەن تالقىلانۋىنىڭ, قۇجاتتى تەزىرەك قابىلداۋدىڭ اسا ماڭىزدى ەكەنىن اتاپ ءوتتى. جاڭا زاڭ جوباسى ەلىمىزدە بالالارعا قاتىستى جاسالاتىن زورلىق-زومبىلىقپەن كۇرەسۋدىڭ مەملەكەت ءۇشىن جاڭا ءتيىمدى قۇرالى بولۋى كەرەك.
