باس قالامىزداعى قۇرىلىسى توقتاپ قالعان ءىرى جوبا – جەرۇستى جولى (LRT) تۋرالى كەيىنگى كەزدە كوپ ايتىلىپ ءجۇر. قازىر ونى قايتادان قولعا الىپ, جۇزەگە اسىرۋ ءتيىمدى ەكەنى بەلگىلى بولدى. وسىعان بايلانىستى ءوزىمنىڭ كوكەيىمدە جۇرگەن ويىمدى ورتاعا سالۋدى ءجون كوردىم.
دۇرىس, LRT-نى باستاعان ەكەن, ەندى ونى اياقتاۋ كەرەك. باعانالاردىڭ ءۇستىن بايلانىستىرىپ تۇراتىن بەتون جولدار قويىلىپ جاتىر. سوعان قوسا ايالدامالار سالسا, قۋاتتى ەلەكتر ەنەرگياسىن جۇمساماي, ونى ۇنەمدەپ, جاياۋ جول جۇرگىنشىلەرگە ارناپ ءجولۇستى جولىن دا قوسا سالسا دەگەن ۇسىنىسىم بار. مۇنى, سىزبادا كورسەتكەنىمدەي, تۇگەل اينەكپەن دوعالاي قاپتاسا, بۇل استانانىڭ قىسىندا بورانى, جاۋىندى-شاشىندى, جازىندا قاپىرىق ىستىعى مەن جەلى كۇنى-ءتۇنى جاياۋ جۇرگىنشىلەر مەن ۆەلوسيپەد, ساموكات تەپكەندەرگە وتە قولايلى ورىن بولماق. استانا بيۋدجەتىنە از دا بولسا قاراجات ءتۇسىپ وتىرار ەدى.
جەرۇستى جاياۋ جولداردىڭ قانداي تيىمدىلىگى بولۋى مۇمكىن؟ ول الدىمەن جولاۋشىلاردىڭ قاۋىپسىزدىگى ءۇشىن ماڭىزدى. بۇل ءوز كەزەگىندە كوشەدەگى كولىك كەپتەلىسىنىڭ سەيىلۋىنە سەپتەسەدى ءارى جاياۋ جۇرگەن ادام دەنساۋلىعىنا وتە پايدالى.
سوڭعى ۋاقىتتا ساعات 07:30-09:00 مەن 18:00-19:30 ارالىعىندا قالانىڭ نەگىزگى كوشەلەرىندە كەپتەلىس كوپ بولادى. بۇل استانالىقتار ءۇشىن ايتارلىقتاي كەدەرگى تۋدىرىپ وتىرعانى انىق. LRT-نىڭ باعاسىن كوتەرمەي, ونىڭ جانىنان جاياۋ جۇرگىنشىلەر جولىن سالسا, سول ءتيىمدى بولار ەدى.
جۇرت وتەتىن ايالداما تۇسىنا ساۋدا نۇكتەلەرىن ورناتۋعا بولادى. ياعني بۇل ورىندار – شاعىن جانە ورتا بيزنەستى دامىتۋعا ارنالعان قولايلى ورىننىڭ ءبىرى. ارنايى عيمارات ىشىندە ورنالاسپاعاندىقتان, ونىڭ جالعا الۋ قۇنى دا الدەقايدا ارزانداۋ بولارى ءسوزسىز. مۇنداي ساۋدا الاڭدارىنا قىزىعۋشىلىق تانىتاتىن جۇرتتىڭ قاراسى قالىڭ بولارىنا ەش كۇمان جوق. سەبەبى بۇل – قولدانىستا بار تاجىريبە. ءسوز ورايى كەلگەندە ايتا كەتەيىك, الماتى قالاسىنداعى جاعدايدى مىسال ەتۋگە بولادى. جەراستى نەمەسە جەرۇستى وتپەلى جولدارىنىڭ قايسىسىنا بارساق تا, كاسىبىن دوڭگەلەتىپ وتىرعان ساۋداگەرلەردى كورەمىز. ءبىرى ءتۇرلى ءتاتتى-ءدامدىسىن ساتسا, ەندى ءبىرى تىگىن شەبەرحاناسىن اشىپ العان. ال ولار كۇزەت قىزمەتتەرىمەن ارنايى كەلىسىمگە وتىرعاندىقتان, قاۋىپسىزدىگىنە الاڭدامايدى. سوندىقتان بۇل بىزگە دە قاجەت ءۇردىس. جاعدايى تومەن وتباسىلاردىڭ ءوز كۇنىن ءوزى كورۋى ءۇشىن ازداپ قول ۇشىن سوزعانىمىز بولار ەدى.
ايتپاقشى, جەرۇستى جولىنا, اسىرەسە قارت كىسىلەر مەن مۇمكىندىگى شەكتەۋلى جانداردىڭ ءمىنىپ-تۇسۋىنە قيىندىق تۋعىزباس ءۇشىن ارناۋلى جەدەلساتىنى دا قوسا ورناتقان ابزال.
– باسقا قالالاردا, قولدانىلاتىن قۇرىلىس ءادىستەرىنەن بولەك, ءتۇرلى نۇسقاداعى كونسترۋكتورلى تەكشە ءپىشىندى ءوزارا قوسىلاتىن جۇيەنى تاڭداۋعا بولادى. قۇرامداستار مىناداي ساناتقا ءبولىنۋى مۇمكىن: كىرۋ توبى, ەسكالاتور كوتەرۋ بلوكتارى, جەلىلىك وتپەلى ورىندارى. ال ولاردى بىرىزدەندىرۋ جانە بىرىڭعاي ستاندارت بويىنشا جۇرگىزۋ وڭاي. ارقايسىسىنىڭ ءوز ەرەكشەلىگى بولۋى مۇمكىن. ماسەلەن, ەسكالاتور كوتەرگىش بلوكتاردا ساتىلار دا, ءتىپتى قاجەت جاعدايدا ليفتىلەر دە بولادى. ءار ايالدامادا جۇرگىنشىلەرگە كەرەكتى جاراقتارمەن اجەتحانالار بولادى. ال قولايسىز اۋا رايى جاعدايىندا مۇنداي جابىق ايالدامالار جاياۋ جۇرگىنشىلەردىڭ جايلىلىعىن قامتاماسىز ەتە الادى. الداعى ۋاقىتتا ءتىپتى عيماراتتان عيماراتقا دەيىنگى جابىق وتكەلدەر جاياۋ جول جۇيەسىن ودان ءارى دامىتۋىنا نەگىز بولادى ەكەن.
تاعى ءبىر ۇسىنىس – جەرۇستى جولىن, ياعني LRT-نى تەمىرجول ۆوكزالى مەن اۋەجايدىڭ اراسىندا قوسسا دەيمىن. ەكەۋىنىڭ اراقاشىقتىعى – 22 شاقىرىم. ەكى ورتاعا 11 ايالداما كەرەك.
2023 جىلى قالالىق اكىمدىك وسى LRT-نىڭ جوسپارىن ازىرلەپ, حالىققا ارنايى تانىستىرسا قۇبا-قۇپ بولار ەدى. بۇعان LRT – «جىبەك جولى» دەگەن اتاۋ بەرسە جاراسار ەدى.
قازىر الەم كوز تىگىپ وتىرعان باس قالامىزعا تۋريستەردىڭ كەلۋى دە جىل ساناپ ارتۋدا. جاياۋ ءجولۇستى جولىن ءتيىمدى ورناتسا, قالانىڭ ادەمى جەرلەرىن جاياۋ جۇرگىنشىلەر سەرۋەندەپ تاماشالار ەدى ءارى قالانىڭ كورىكتى جەرلەرىنىڭ بىرىنە اينالار ەدى.
رىسبەك اسقارۇلى,
استانا قالاسىنىڭ تۇرعىنى
