استانا قالاسىنىڭ قوعامدىق دەنساۋلىق ساقتاۋ باسقارماسى وكىلدەرى مەن مەديتسينالىق ۇيىمدار باسشىلارى ارنايى جيىندا مەملەكەت باسشىسىنىڭ حالىققا جولداۋىن تالقىلادى.
جيىن قاتىسۋشىلارى ەل دامۋى جولىندا اتقارىلاتىن جۇمىستار مەن جولداۋدا ايتىلعان مىندەتتەر بويىنشا ويلارىن ورتاعا سالدى جانە مەملەكەت باسشىسىنىڭ باستامالارىن قولدايتىنىن ءبىلدىردى.
– مەملەكەت قۋاتتىلىعىنىڭ ءبىر كورىنىسى – جوعارى ساپالى مەديتسينا. جولداۋدا ادامدار ەلىمىزدىڭ باستى قۇندىلىعى ەكەنىن, ۇلت ساۋلىعى جاقسى بولسا عانا قوعام ورنىقتى داميتىندىعى ايتىلعان. دەنساۋلىق ساقتاۋ سالاسى بويىنشا ايتىلعان ماسەلەلەر قاشان دا وزەكتى. پرەزيدەنت دەنساۋلىق ساقتاۋ جۇيەسىن تۇراقتى ۆاكتسينالاۋعا دايىنداۋ قاجەتتىگىن اتاپ ءوتتى. كوروناۆيرۋسپەن بايلانىستى ەمەس اۋرۋلاردىڭ بەلەڭ الۋىن بولدىرماۋ كەرەك. پاندەميا جاعدايىندا جوسپارلى سكرينينگتەر مەن وپەراتسيالار كەيىنگە قالدىرىلادى. كوپتەگەن بالالار ستاندارتتى ۆاكتسينانى المايدى. مۇنداي جاعدايعا جول بەرمەۋ قاجەت. ادىلەتتى مەملەكەت, بەرەكەلى قوعام قۇرۋدا ەلوردالىق دارىگەرلەر بەلسەندىلىك تانىتىپ, جاڭا ۇسىنىستاردىڭ جۇزەگە اسىرىلۋىنا ۇيىتقى بولماق, – دەدى باسقارما باسشىسى تيمۋر مۇراتوۆ شارا بارىسىندا. باسقارما باسشىسى سونىمەن قاتار مەديتسينالىق سانيتارلىق العاشقى كومەك بەرۋ ۇيىمدارىندا جۇرگىزىلىپ جاتقان ەكپە الۋ جۇمىستارى مەن كۇن تارتىبىندەگى ماڭىزدى ماسەلەلەرگە توقتالدى.
