ەلىمىزدە جول اپاتىنان كوز جۇماتىندار سانى جىل سايىن ارتىپ بارادى.
بيىل جارتى جىلدان استام ۋاقىت ىشىندە قازاقستان اۋماعىندا 1 200-دەن استام ادامنىڭ ءومىرىن قيعان 6 792 جول اپاتى بولعان. بۇل وتكەن جىلدىڭ سايكەس كەزەڭىمەن سالىستىرعاندا 13,6%-عا از, ياعني بىلتىر وسى ۋاقىت ارالىعىندا 7 862 وقيعا تىركەلىپ, 9 714 ادام زارداپ شەكتى. ال بيىل 8 482 ادام جارالانىپ, 1 232 ادام قازا تاپقان. دەمەك, بىلتىرعى ۇقساس كەزەڭىمەن سالىستىرعاندا كوز جۇمعاندار سانى 3,2%-عا وسكەن. قۇزىرلى ورگاندار جول-كولىك وقيعالارى كىمدەردىڭ كىناسىنەن بولاتىنىنا دا تالداۋ جاساعاندا جول اپاتىنىڭ دەنى جۇرگىزۋشىلەرمەن قاتىستى بولعان. سول سەبەپتى قۇزىرلى ورگاندار ءتارتىپتى قاتاڭداتىپ, جولدارداعى باقىلاۋدى كۇشەيتتى. جول بويىنداعى بەينە باقىلاۋ كامەراسىن مولايتىپ, كەيبىر جولداردا جول ءجۇرۋ قارقىنىن تومەندەتتى. ماسەلەن, جاقىندا بىرقاتار جولداعى كولىك جىلدامدىعىن 110 كم/ساع ەتىپ بەلگىلەنۋى – سونىڭ ايعاعى. ارينە, جىلدامدىقتى شەكتەۋ – جول قوزعالىسى قاۋىپسىزدىگىن كۇشەيتۋ ءۇشىن قولداناتىن شارانىڭ ءبىرى. دەگەنمەن بۇل ءتاسىل ءبىزدىڭ ەلدەگى كولىك اپاتىن بىردەن ازايتادى دەپ ايتۋ قيىن. سەبەبى جول اپاتىنىڭ ءبارى جىلدامدىقتى اسىرۋدان عانا بولىپ جاتقان جوق.
بىرىنشىدەن, ەلىمىزدەگى كوپتەگەن جولدىڭ ساپاسى ناشار, رەسپۋبليكالىق ماڭىزى بار جولداردىڭ ءوزىنىڭ جەتەرسىز تۇسى كوپ. ماسەلەن, ەلىمىزدەگى بارلىق جوعارى قارقىندى جولدىڭ ەكى باعىتى قاتار ءارى وتە جاقىن ورنالاسقان. بۇل تۇنگى كولىكتەردىڭ جول جۇرۋىنە قولايسىز. ياعني قارسى باعىتتاعى ماشينانىڭ جارىعى كوز ۇيالتىپ, العا تۋرا قاراۋعا مۇمكىندىك بەرمەيدى. كەيبىر كولىك يەلەرى جارىعى ەڭ كۇشتى, الىسقا تۇسەتىن شامىن قوسىپ الادى دا, قارسى باعىتتان كولىك كەلسە جارىقتى قايتارماي, قارسى باعىتتاعى كولىك يەسىنىڭ كورۋ مۇمكىندىگىنە ۇلكەن كەدەرگى جاسايدى. سوندىقتان الداعى ۋاقىتتا ەلىمىزدىڭ اۆتوجولدارىن جوبالاعاندا ەكى باعىتتاعى جولدى بولەك سالۋدى نەمەسە ەكى باعىتتىڭ اراسىن الىستاۋ سالىپ, ەكى ورتاعا باقال تالداردى ەگىپ, قارسى باعىتتان كەلەتىن كەدەرگىنى ازايتۋ كەرەك. استانا-ششۋچينسك, استانا-پاۆلودار جوعارى قارقىندى جولدارى سياقتى الدەقاشان سالىنىپ, پايدالانۋعا بەرىلگەن جولداردىڭ ورتاسىنداعى تەمىر بوگەسىنگە ارناۋلى جارىق توساتىن قالاقشا قالتقىلار ورناتىلۋى كەرەك. مۇنى ءبىز ويدان شىعارىپ وتىرعان جوقپىز, ءبارى شەتەلدە بار تاجىريبە سانالادى.
ەكىنشىدەن, ماشينالارعا جاسالاتىن تەحنيكالىق بايقاۋدى كۇشەيتۋ كەرەك. ابدەن توزعان, ىلدالداپ ءجۇرىپ جۇرگەن كونە ماشينالاردى اقشا بەرسە تەحنيكالىق بايقاۋدان وتكىزە سالاتىن جاعدايدى تۇبەگەيلى توقتاتسا.
ۇشىنشىدەن, جۇرگىزۋشى كۋالىگىن ساتىپ الۋعا تىيىم سالىنباي, جول اپاتى ازايمايدى.
تورتىنشىدەن, ۇزاق جولدارعا, قالا ارالارىنا جۇرەتىن تاكسيلەردى زاڭداستىرىپ, ولاردىڭ جۇيەلى ۋاقىتپەن ءجۇرۋىن قاتاڭ باقىلاۋ كەرەك. ويتكەنى قازىرگى جول اپاتىنىڭ كوبى تاكسي جۇرگىزۋشىلەرىنىڭ اقشا تابۋ ءۇشىن ۇيىقتاماي جول جۇرۋىنەن تۋىنداپ جاتقانى جاسىرىن ەمەس.
بەسىنشىدەن, قازىر ەلىمىزدە Toyota Alphard سياقتى 7-8 ورىنعا ارنالعان كولىكتەرگە قاتىستى جول اپاتى جيىلەپ كەتتى. سەبەبى بۇل كولىك ءتۇرى تاسجولدا جوعارى جىلدامدىقپەن جۇرگەندە, قارقىندى شۇعىل باسەيتۋگە تۋرا كەلسە, وڭاي اۋدارىلىپ كەتەتىن جايت تا ءجيى كەزدەسەدى ەكەن. سوندىقتان ەلىمىزگە شەتەلدەن كەلەتىن كولىكتەردى قاتاڭ قاداعالاپ, تەرىس تىزگىندى كولىكتەردىڭ جولاۋشى تاسىمالىمەن اينالىسۋىنا شەكتەۋ قويۋ كەرەك. سونداي-اق جول ساقشىلارىنىڭ جول بويىنداعى كەزەكشىلىك مىندەتىن دە كۇشەيتۋ قاجەت.
