استانا قالاسىندا وتكەن اپتادا 72 جول-كولىك وقيعاسى تىركەلىپ, 48 ادام ءارتۇرلى دارەجەدەگى جاراقاتپەن اۋرۋحاناعا جەتكىزىلسە, ءۇش ادام وقيعا ورنىندا كوز جۇمدى. مۇنداي كەلەڭسىزدىكتىڭ باستى سەبەبى – جىلدامدىقتى شامادان تىس ارتتىرىپ, كوپە-كورنەۋ جول ەرەجەسىن ساقتاماۋ. اسىرەسە 18 بەن 30-دىڭ اراسىنداعى جاستاردىڭ كوبىنە قالا كوشەلەرىندە باعدارشامنىڭ قىزىل تۇسىنە باعىنباۋ, جول بويىنداعى ەكى تۇتاس جولاقتى قاساقانا كەسىپ ءوتۋ سياقتى ادام ومىرىنە قاۋىپ تۋدىراتىن ورەسكەل ەرەجە بۇزۋشىلىقتار ءجيى بولاتىنى انىقتالىپ وتىر.
جاقىندا ەلوردادا كولىك تاسقىنى اراسىندا ەرسىلى-قارسىلى ءجۇرىپ كەلە جاتقان اۆتوكولىك جول پوليتسياسى قىزمەتكەرلەرىنىڭ كۇمانىن تۋدىرىپ, توقتاتقاندا رۋلدە وتىرعان جاس جىگىت قولىنا سارعايىپ كەتكەن جۇرگىزۋشى كۋالىگىن ۇستاي تۇسەدى. بۇدان سەكەم العان ءتارتىپ ساقشىلارى ونى تاركىلەپ, ساراپتاماعا جىبەرگەندە, جىگىت ۇسىنعان جۇرگىزۋشى كۋالىگى قولدان جاسالعان جالعان قۇجات بولىپ شىقتى.
جاسىراتىنى جوق, كەيىنگى كەزدە جۇرگىزۋشى كۋالىگىن وقىماي, ەمتيحان تاپسىرماي وڭاي جولمەن الاتىندار قاتارى ازايماي وتىر. وسىعان بايلانىستى قازىر سىبايلاس جەمقورلىققا قارسى ءىس-قيمىل اگەنتتىگى زاڭسىز كومەك ۇسىناتىن دەلدالداردىڭ جولىن كەسۋ ماقساتىندا مامانداندىرىلعان حالىققا قىزمەت كورسەتۋ ورتالىقتارىندا جۇرگىزۋشى كۋالىگىن الۋ راسىمدەرىن قاتاڭداتۋ شارالارىن جۇزەگە اسىرا باستادى.
جاسىراتىنى جوق, كەيىنگى كەزدە جۇرگىزۋشى كۋالىگىن وقىماي, ەمتيحان تاپسىرماي وڭاي جولمەن الاتىندار قاتارى ازايماي وتىر
ناقتىراق ايتساق, سىبايلاس جەمقورلىققا قارسى قىزمەت اگەنتتىگى ىشكى ىستەر مينيسترلىگىمەن بىرلەسىپ, مامانداندىرىلعان حالىققا قىزمەت كورسەتۋ ورتالىقتارى قىزمەتىنە مونيتورينگ جۇرگىزۋدى باستادى. وعان سەبەپ جاقىندا عانا اشكەرە بولعان بىرنەشە جىل بويى كولىك قۇرالدارىن زاڭسىز رەسىمدەۋمەن اينالىسىپ كەلگەن قىلمىستىق توپتىڭ قۇرىقتالۋى بولىپ وتىر. قازىر وسى ءىس بويىنشا تەرگەۋ امالدارى جۇرگىزىلىپ, جۇرگىزۋشى كۋالىگىن بەرۋ راسىمدەرى قاتاڭداتىلدى.
سونداي-اق, مونيتورينگ بارىسىندا اۆتوكولىكتەردى تىركەۋ مەن جۇرگىزۋشى كۋالىكتەرىن زاڭسىز بەرۋدىڭ شارتتارى انىقتالعان.
اقپاراتتىق جۇيەلەردىڭ وسالدىعى, پروتسەستەردىڭ جەتكىلىكسىز تسيفرلاندىرىلۋى, كولىكتى تىركەۋ راسىمدەرىنىڭ جەتىلدىرىلمەگەنى, ەمتيحانداردى قابىلداۋداعى قۇقىقتىق ولقىلىقتار, اۆتومەكتەپتەردە ءاتۇستى وقىتۋ – وسى فاكتورلاردىڭ بارلىعى زاڭسىز دەلدالدىق قىزمەتتەردىڭ پايدا بولۋىنا ىقپال ەتكەن.
مونيتورينگ ناتيجەلەرى بويىنشا سىبايلاس جەمقورلىققا قارسى ءىس-قيمىل اگەنتتىگى ۋاكىلەتتى مەملەكەتتىك ورگانداردىڭ اتىنا 22 ۇسىنىس جولداعان. قازىرگى تاڭدا ۇسىنىستاردىڭ جارتىسىنان كوبى ورىندالعان.
ماسەلەن, ىشكى ىستەر مينيسترلىگى ءوزىنىڭ بارلىق اۋماقتىق بولىمشەلەرىندە اۆتوكولىك قۇرالدارىنىڭ دەرەكقور بازاسىنا تۇزەتۋ ەنگىزۋ مۇمكىندىگىن توقتاتتى.
سونىمەن قاتار ىشكى ىستەر ءمينيسترىنىڭ بۇيرىعىمەن جۇرگىزۋشى كۋالىكتەرىن بەرۋ ءراسىمى كۇشەيتىلدى. وندا ەمتيحان الۋشىلاردىڭ مىندەتتى بيومەترياسى مەن تەستىلەۋدىڭ بارلىق پروتسەسىن ۆيدەوتىركەۋ ەنگىزىلدى, ەمتيحانداردى قايتا تاپسىرۋ رەگلامەنتى وزگەرتىلدى.
قاناتقاقتى رەجيمدە ارنايى حقكو مەن ءىىم-دە جاڭا اقپاراتتىق جۇيەلەر ىسكە قوسىلدى.
قابىلدانىپ جاتقان شارالارعا قاراماستان, مامانداندىرىلعان حقكو-لاردا قۇجاتتاردى رەسىمدەۋگە كومەك ۇسىناتىندار ءالى دە بولۋى مۇمكىن. «كومەكشىلەردىڭ» زاڭسىز قىزمەتىنە جۇگىنبەي, ەگەر ءسىز وسىنداي فاكتىلەرگە تاپ بولساڭىز, 1424 قىسقا نومىرىنە حابارلاسىڭىز دەلىنگەن انتيكور مالىمدەمەسىندە.
ساعي ورال
