وتكەن دەمالىس كۇندەرى استانادا وڭىرلىك اۋىل شارۋاشىلىعى جارمەڭكەلەرىنىڭ ماۋسىمى باستالدى. ونىڭ جۇمىسى تۋرالى قالانىڭ كوممۋنيكاتسيالار قىزمەتىندە وتكەن بريفينگتە استانا قالاسى ينۆەستيتسيالار جانە كاسىپكەرلىكتى دامىتۋ باسقارماسى باسشىسىنىڭ ورىنباسارى ماقسات جاڭاباەۆ مالىمدەدى.
استانادا 2 قىركۇيەكتەن باستاپ وڭىرلەردىڭ تاۋار وندىرۋشىلەرىنىڭ قاتىسۋىمەن وڭىرلىك اۋىل شارۋاشىلىعى جارمەڭكەلەرىنىڭ ماۋسىمى باستالدى. ولار ءار سەنبى مەن جەكسەنبىدە قازان ايىنىڭ 29-ىنا دەيىن وتەدى.
ەلوردادا العاشقى بولىپ تۇركىستان وبلىسىنىڭ اگرارشىلارى ءوز ونىمدەرىن ۇسىندى. جارمەڭكەگە ءوز تاۋارلارىمەن 70-كە جۋىق اۋىل شارۋاشىلىعى وندىرۋشىلەرى كەلدى, ولار 556 توننا ءونىم اكەلدى. بارلىق ءونىم نارىقتاعى باعادان ەداۋىر تومەن ساتىلۋدا.
– الداعى دەمالىس كۇندەرى ەلورداعا اتىراۋ جانە جامبىل وبلىستارىنىڭ اۋىل شارۋاشىلىعى وندىرۋشىلەرى كەلەدى. 16-17 قىركۇيەك كۇندەرى – باتىس قازاقستان وبلىسى مەن قىزىلوردا وبلىسىنىڭ تاۋار وندىرۋشىلەرىن كۇتەمىز. بۇدان ءارى الماتى جانە جەتىسۋ وبلىستارى, ودان سوڭ اقتوبە, قوستاناي, پاۆلودار, اباي, شىعىس قازاقستان وبلىسى جانە سولتۇستىك قازاقستان وبلىسى, قاراعاندى, ۇلىتاۋ وبلىستارى ءوز ونىمدەرىن ۇسىناتىن بولادى. وڭىرلىك جارمەڭكەلەر ماۋسىمىن 28 جانە 29 قازاندا اقمولا وبلىسىنىڭ اۋىل شارۋاشىلىعى وندىرۋشىلەرى اياقتايدى دەپ جوسپارلانىپ وتىر, – دەدى ماقسات جاڭاباەۆ.
باسقارما باسشىسى سونداي-اق بيىل اۋىل شارۋاشىلىعى جارمەڭكەسىن وتكىزۋ ورنى وزگەرگەنىن اتاپ ءوتتى. وتكەن جىلى ول تۇران داڭعىلى, 48 مەكەنجايىندا ورنالاسقان «استانا ارەنا» الدىنداعى اۆتوتۇراقتا وتكىزىلسە, بيىل جارمەڭكەنى وتكىزۋ ورنى تاۋەلسىزدىك داڭعىلى, 50 مەكەنجايىنداعى قازۇوۋ («شابىت») الدىنداعى الاڭعا كوشىرىلدى.
ەلوردادا دەمالىس كۇندەرى قالالىق جارمەڭكەلەر دە وتكىزىلەدى. ولارعا ازىق-تۇلىك تاۋارلارىن كوتەرمە جەتكىزۋشىلەر جانە جاقىن ماڭداعى اۋدانداردان شارۋا قوجالىقتارى قاتىسادى. جارمەڭكەلەر ءار اۋداندا, ارنايى بەلگىلەنگەن جەردە وتەدى.
استانانى ازىق-تۇلىك تاۋارلارىمەن قامتاماسىز ەتۋدە ەلوردانىڭ ازىق-تۇلىك بەلدەۋىن قۇرايتىن اقمولا, پاۆلودار جانە قاراعاندى وبلىستارىنىڭ شەكارالاس اۋداندارى شەشۋشى ءرول اتقارادى. بۇل رەتتە اقمولا وبلىسىنىڭ اكىمدىگىمەن قاراوتكەل, تالاپكەر, قوياندى جانە جىبەك جولى اۋىلدارىندا وندىرىستىك كاسىپورىندار مەن ينفراقۇرىلىمدىق وبەكتىلەردى ورنالاستىرا وتىرىپ, ساۋدا-ەكونوميكالىق جانە كولىكتىك-لوگيستيكالىق كووپەراتسيانى جۇزەگە اسىرۋ جونىندەگى جول كارتاسىنا قول قويىلدى. بۇدان ءارى جۇمىس وسى جول كارتاسى شەڭبەرىندە جۇزەگە اسادى.
– استانا اگرارلىق ءوڭىر ەمەس جانە تۇتىناتىن 2 ملن توننا ازىق-تۇلىك تاۋارلارىنىڭ تەك 3 ءتۇرىن, ناقتىراق ايتساق, ۇن, كەسپە ونىمدەرى جانە نان عانا وندىرەمىز, قالعاندارى باسقا وڭىرلەردەن اكەلىنەدى جانە يمپورتتالادى. سوندىقتان اكىمدىك ءوز ءوندىرىسىن ۇلعايتۋعا ەرەكشە كوڭىل بولەدى. وسىعان بايلانىستى ءبىز جۇيەلى شارالار قابىلداپ جاتىرمىز, اتاپ ايتقاندا, ساۋدا ينفراقۇرىلىمى مەن اوك وڭدەۋ ونەركاسىبىن دامىتۋعا باسا نازار اۋدارامىز, – دەدى ماقسات جاڭاباەۆ.
تاماق ونەركاسىبى سالاسىندا ءوندىرىس كولەمى 72 مىڭ توننا بولاتىن 8 جوبا ء(سۇت زاۋىتى, ەت كومبيناتى, نان زاۋىتى, جارتىلاي فابريكاتتار, ۇن جانە كونديتەرلىك ونىمدەر جانە ت. ب.), سونداي-اق قۋاتى 14 مىڭ توننا بولاتىن ەكى جىلىجاي كەشەنى سالىنۋدا. جىل بويى نان زاۋىتى مەن كوكونىس قويمالارىن, سونداي-اق كونديتەرلىك فابريكانى اياقتاۋ جوسپارلانىپ وتىر.
سونىمەن قاتار, مەملەكەت باسشىسىنىڭ تاپسىرماسى بويىنشا جالپى اۋدانى 70 مىڭ شارشى مەتردى قۇرايتىن ساقتاۋ ورىندارى – 2 كوتەرمە-تاراتۋ ورتالىعى, 2 كوكونىس قويماسى جانە 2 قويما كەشەنى سالىنىپ جاتىر. نارىقتى مونوپولياسىزداندىرۋ اياسىندا 10 ملرد تەڭگە جەكە ينۆەستيتسياعا 2 زاماناۋي بازار سالىنىپ جاتىر.
